Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

[p. *562]

1

⁺ENde daer sal een roede wtgaen van die wortele van Iesse, ende een bloeme sal wt haer wortele opgaen.

+ A

2

Ende op hem sal rusten den gheest des Heeren, den gheeft der wijsheyt, ende des verstants, den gheest des raets, ende der stercheyt den gheest der wetenheyt, ende der goedertierenheyt.

3

Ende hem sal veruullen den gheest van die vreese des Heeren. Hy en sal nae dat ghesichte der ooghen niet ordeelen, noch nae tghehoor der ooren en sal hy niet straffen.

4

Maer hy sal in die rechtuerdicheyt die arme ordeelen, ende hy sal in die gherechticheyt straffen voer die saechtmoedighe der eerden, ende hy sal deerde slaen met die roede sijns monts, ende met den adem sijnder lippen sal hy den ongoddelijcken dooden.

5

Ende rechtuerdicheyt sal den gordel sijnder lendenen wesen, ende tghelooue eenen riem sijnder lendenen.

6

⁺Die wolf sal metten lamme woonen, ende den lupaert metten ionghen boxkens rusten. Het calf ende den leuw ende tscaep sullen tsamen woonen, ende een cleyn kindeken salse drijuen.

+ B

7

Het calf ende den beyre sullen weyden, hen ionghen sullen tsamen rusten, eude den leuw sal als eenen osse caff eten.

8

Ende een sprakeloos kint vander borst sal ghenuecht hebben opt cot van een slanghe, ende int hol van den Basiliscus sal een ghespeent kint sijn hant steken.

9

Sij en sullen gheen hinder doen oft dooden op mijnen gheheelen heylichen berch, want die eerde in veruult met die kennisse des Heeren, als die wateren der zee ouerdeckende.

10

In dien dach die wortel van Iesse die daer staet ten teeken der volcken dese sullen die Heydenen bidden, ende sijn graff sal glorioes wesen.

11

⁺Ende tsal wesen op dien dach, dat die Heere sal ten tweeden zijn handt daer toe doen, om te besitten dat ouerblijfsel zijns volcs, dat achter ghelaten sal worden vanden Assiriers, ende van Egypten, ende van Phethros, ende van der Morianen lant, ende van Elam, ende van Sennaar, ende van Emath, ende van die eylanden der zee.

+ C

12

Ende hy sal een teeken opheffen in die natien, ende hy sal vergaderen die voervluchtighe van Israel. Ende die verstroydde van Iuda sal hy vergaderen van die vier hoecken der aerden.

13

Ende die nydicheyt van Ephraim sal affghenomen worden, ende die vianden van Iuda sullen vergaen. Ephraim en sal Iudam niet benyden, ende Iudas en sal niet strijden teghen Ephraim.

14

⁺Ende sij sullen vlieghen op die scouderen van Philisthijm, doer die zee, sij sullen tsamen beroouen die kinderen vanden oosten. Idumeen ende Moab sullen ghebodt van haerder hant sijn, ende die kinderen van Ammon sullen onderdanich sijn.

+ D

15

Ende die Heere sal verwoesten die tonghe der zee van Egypten, ende hy sal sijn hant opheffen op den vloet, in die stercheyt sijns gheests, ende hy sal dien deylen in seuen riuieren, alsoo dat die ghescoeydde daer doer sullen gaen.

16

Ende daer sal eenen wech sijn mijnen ouerghebleuen volcke, dat achterghelaten sal worden vanden Assiriers, ghelijc alst Israel gheweest heeft opden dach als hy wten lande van Egypten opghinck.