Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

INt iaer als die coninck Ozias gestoruen is, ⁺heb ic ghesien den Heere sittende op eenen seer hooghen ende opghehauen stoel, ende die dinghen die onder hem waren veruulden den tempel.

+ A

2

Die Seraphims stonden daer op, ses vloegelen hadde die eene, eude ses vloghelen die andere, met den tween bedecten sij sijn aensicht, ende met den tween bedecten sij sijn voeten, ende metten tween vloghen sij.

3

Ende sij riepen tot malcanderen, ⁺ende sij seyden, Heylich, Heylich, Heylich is die Heere die Godt der heyrscaren, gheheel aertrijck is vol van sijnder glorien.

+ B

4

Ende die ouerste posten der herren sijn beroert gheweest van die stemme des gheens die riep, ende het huys is vol roocs gheworden.

[p. *559]

[afbeelding]

5

Ende ick heb gheseyt, Wee my dat ick ghesweghen hebbe, want ick ben een besmet man van lippen, ende ick woone int midden des volcs dat besmette lippen heeft, ende den coninck den Heere der heyrscaren heb ick ghesien met mijnen ooghen.

6

Ende tot mi is gheuloghen een vanden Seraphims, ende in sijn hant was een gloeyende coelken, dat hy met een tanghe ghenomen hadde vanden outaer.

7

⁺Ende heeft mijnen mont gheraect ende heeft gheseyt. Siet ick heb hier mede v lippen gheraect, ende v ongherechticheyt sal v affghenomen worden, ende v sonde sal ghesuyuert worden.

+ C

8

Ende ick heb ghehoort die stemme des Heeren segghende, Wien sal ick seynden? ende wie sal ons gaen? Ende ick heb gheseyt, Siet hier ben ik, sendt my.

9

Ende hy heeft gheseyt. Gaet, ende ghy sult desen volcke segghen. Hoort al hoorende, ende en willet niet verstaen, ende siet het visioen, ende en willet niet kennen.

10

Verblint het herte van desen volcke, ende zijn ooren beswaert ende sluyt zijn ooghen, dattet by auontueren niet en sie met sijnen ooghen, ende met zijnen ooren hoore, ende met zijn herte verstae, ende dattet bekeert worde, ⁺ende dat icse ghenase.

+ D

11

Ende ick heb gheseyt, Heere hoe langhe? Ende hy heeft gheseyt, Tot dat die steden verwoest worden sonder bewoonder, ende die huysen sonder mensche, ende het lant sal woest verlaten worden.

12

Ende die Heere sal die menschen verre wech doen, ende hy sal vermenichfuldicht worden die verlaten was int midden der aerden.

13

Ende noch sal in haer wesen verthiendinghe, ende sij sal bekeert worden, ende sij sal sijn tot een toonsele ghelijck den terebinthus boom, ende ghelijck den eyken boom, die zijn tacken wtstrect, het sal heylich saet wesen dat in haer staen sal.