Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ICk sal mijnen beminden singhen het liedeken van mijns ooms sone van sijnen wijngaert. Mijn lief heeft eenen wijngaert ghecregen inden hoec den sone der olien.

+ A

2

Ende hi heeft dien bethuynt, ende hi heeft daer die steenen wtgecoren, ende hi heeften wtuercoren geplant, ende hy heeft eenen torre int midden van dien ghetimmert, ende een persse heeft hy daer in ghetimmert, ende hi heeft verbeyt dat hy druyuen voertsbrengen soude, ende hi heeft wilde druyuen voertsbracht.

3

Nu dan ghy bewoonders vann Ierusalem, ende ghy mannen van Iuda ordeelt tusschen my ende mijnen wijngaert.

4

Wat eest dat ick mijnen wijngaert sculdich was te doene, ende hem niet ghedaen en hebbe? Ist dit dat ic verwacht hebbe dat hy druyuen voersbrengen soude, ende hy heeft wilde druyuen voertsbracht?

5

Ende nu sal ic v thoonen wat ic mijnen wijngaert doen sal. ⁺Ick sal sijnen thuyn affnemen, ende hy sal wesen tot een beroouinge, ic sal sijnen want omworpen, ende hy sal tot een vertredinghe wesen.

+ B

6

Ende ick sal dien verwoest setten, hy en sal niet ghesnoeyt worden, ende hy en sal niet ghegrauen worden, ende die bremen ende dornen sullender op wassen, ende den wolcken sal ic ghebieden datse ouer hen gheenen reghen en reghenen.

7

Want den wijngaert vanden Heere der heyrscaren is dat huys van Israel, ende die mannen van Iuda sijn zijn wellustich spruytsel. Ende ic heb verwacht, dat hy ordeel doen soude, ende siet tis boosheit, ende rechtuerdicheyt, ende siet tis gheroep.

8

Wee v die deen huys aen dander huys te samen voeghet, ende den eenen acker aen den anderen coppelt, tot die pale der plaetsen. ⁺Suldi ghi alleen woonen int midden der aerde?

+ C

9

In mijn ooren sijn dese dinghen, seyt die Heere der heyrscaren. Ten sij datter veel huysen verwoest worden groot ende schoone sonder bewoonder.

10

Want thien boenderen der wijngaerden sullen een fleschken maken. Ende dertich mudden saetcorens, sullen drij mudden maken.

11

Wee v die smorghens vroech tsamen opstaet om die dronckenscap te hanteren, ende te drincken totten auont toe, dat ghi vanden wijn soudt heet sijn.

12

Die harpe ende lyre, ende die bomme, ende pijpe, ende den wijn, sijn in uwe maeltijden. Maer des Heeren werck en aensiedi niet, noch die wercken sijnder handen en aenmercti niet.

13

Daer om is mijn volck gheuanghen gheleyt, om dat gheen wetenhenheyt en hadde, ende sijn edele sijn vergaen van honghere, ⁺ende sijn menichte is van dorste wtghedroocht.

+ D

14

Daer om heeft die helle haer ziele verbreyt, ende heeft haren muyl open ghedaen sonder eenich eynde. Ende sijn stercke sullen nederdalen, ende sijn volck, ende sijn hooghe ende gloriose, tot haer.

15

Ende die mensch sal gecromt worden, ende die man vernedert, ende die ooghen der hooghen sullen nederghedruct worden.

16

Ende die Heere der heyrscaren sal verheuen worden int ordeel, ende die heylighe Godt sal gheheylicht worden in die rechtuerdicheit.

17

Ende die lammeren sullen weyden nae hen ordene. ⁺Ende die aencomelinghen sullen eten die woestijnen in vruchtbaerheyt verkeert wesende.

+ E

18

Wee v die de ongherechticheyt treckt met zeelkens der ydelheyt, ende die sonde als een strenghe des waghens.

19

Die segghet, Hy haeste hem, ende sijn werck come gheringhe, op dat wijt sien moghen, ende den raet vanden heylighen van Israel come ende ghenake, ende wy sullent weten.

20

Wee die tquaet goet noemt, ende tgoet quaet, stellende die duysternisse voer dlicht, ende dlicht voer duysternisse, die dat bitter soet maect, ende het soet bitter.

21

Wee v die wijs sijt in v ooghen, ende by v seluen voersienich.

22

Wee v die machtich sijt om wijn te drincken, ende stercke mannen om dronckenscap te menghen.

23

⁺Die den boosen rechtuerdich maect om ghiften, ende die rechtuerdicheyt des rechtuerdighens van hem neemt.

+ F

24

Daer om ghelijck die tonghe des viers die stoppele verslint, ende als die hitte der vlammen verbrant, alsoo sal hen wortel als asschen sijn, ende hen groeytsel sal als ghestubbe opgaen. Want sij hebben verworpen die wet vanden Heere der heyrscaren, ende die wtsprake der heylichs van Israel hebben sij gheblasphemeert.

25

Daer om is die rasende gramscap des Heeren ghestoort op sijn volck, ende hy heeft sijn hant wtghestrect daer op, ende heeft dat gheslaghen, ende die berghen sijn verstoort gheweest, ende hen doode lichamen sijn gheworden als dreck int midden der straten. In alle dese dinghen, en is niet afghekeert sijn rasende gramscap, maer sijn hant is noch wtghestrect.

26

Ende hi sal een baniere opheffen verre in die natien, ende hi sal tot hem wispelen van die eynden der eerden, ende siet hy sal haestende rasschelijck comen.

27

⁺Onder hen en is gheen die moede is oft arbeydende, hy en sal niet sluymeren noch slapen. Ende den gordel sijnder lendenen en sal niet ontbonden worden, noch den riem sijnder schoenen en sal niet gebroken worden.

+ G

28

Sijn pijlen sijn scerp, ende alle sijn boghen sijn ghespannen. Die clauwen van sijnen peerden sijn als eenen herden steen, ende sijn raderen sijn als tghedruyssch van een tempeest.

29

Sijn ghebriesch als des leeuws, hy sal briesschen als die welpens der leuwen, ende hi sal grimmen, ende houden den roof, ende hi sal dien omuanghen, ende daer en sal niemant wesen diet ontnemen sal.

30

Ende hi sal op hem gheluyt gheuen op dien dach als een gheluyt der zee. Wy sullen op die eerde sien, ende siet die duysternissen der tribulacien, ende het licht is doncker gheworden in sijn duysterheyt.