Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺VVant siet, die heerscapper die Heere der heyrscaren sal van Ierusalem, ende van Iuda wechnemen den machtighen ende den stercken, alle die stercte des broots, ende alle die stercte des waters,

+ A

2

den stercken ende den strijtbaren man, den richter, ende den propheet, den waersegghere ende den ouden.

3

Den prince ouer vijftich mannen, ende den eerlijcken van aensichte, ende den raetsman, ende den wijsen vanden constighen wercluyden, ende den verstandighen van die verborghen wtsprake.

4

Ende ick sal hen kinderen tot princen gheuen, ende wijsachtighen mannen sullen heerscappie ouer hen hebben.

5

Ende het volck sal ouervallen deen man ouer den anderen man, ende een ieghelijck ouer sijnen naesten. Het kint sal beroerte maken tgehen den ouden, ⁺ende die onedel teghen den edelen.

+ B

6

Want een man sal aengrijpen sijnen broeder, sijns vaders huysghenoot. Ghy hebt een cleedt, weest ons prince, ende dese veruallinghe sij onder v hant.

7

Hy sal antwoerden op dien dach segghende. Ic en ben gheen medecijn meester, ende in mijn huys en is gheen broot, noch cleedt, en wilt my niet maken eenen prince des volcs.

8

Want Ierusalem is gheuallen, ende Iudas is heel mede gheuallen. Want hen tonghen ende hen vonden sijn teghen den Heere, dat sij verwecken souden die ooghen sijnder maiesteyt.

9

Die kennisse haers aensichts sal hen antwoerden, ende hen sonde hebben sij ghelijck Sodoma vercondicht, noch sij en hebbens niet verborghen, wee haerder zielen. Want hen sijn quade dinghen weder om gheloont.

10

Segghet den rehtuerdighe, dat wel is. Want die vrucht sijnder vonden sal hy eten.

11

Wee den ongoddelijcken ten quade, want den wederloon sijnder handen sal hem gescieden.

12

Hen scatters hebben mijn volck berooft ende die vrouwen hebben heerscappie ouer hen ghehadt. Mijn volck die v salich noemen, ⁺die selue bedrieghen v ende den wech uwer ganghen verderuen sij.

+ C

13

Die Heere staet om te ordeelen, ende hy staet om te ordeelen die volcken.

14

Die Heere sal ten ordeel comen met die ouders sijns volcs, ende met sijn princen, want ghy hebt den wijngaert af gheten, ende den roof vanden armen is in v huys.

15

Waer om verterdy mijn volck, ende maelt heel in stucken die aensichten der armen, seyt die Heere die Godt der heyrscaren?

16

Ende die Heere heeft geseyt, Om dat die dochteren van Sion opghehauen sijn gheweest, ende hebben ghewandelt met eenen wtghestrecten hals, ende met dat wincken der ooghen ghinghen sij, ende maecten hant gheslach, sij wandelden ende met haren voeten hebben sij eenen ghemaecten ganck voertghegaen.

17

Daer om heeft die Heere caluwe ghemaect den top des hoofs der dochteren van Sion, ende die Heere sal hen hair affblooten.

18

In dien dach sal die Heere wech nemen dat cieraet der schoenen, ende die maenskens,

19

ende die hals banden, ⁺ende die borst cieraeten, ende die armringhen, ende die mithren,

+ D

20

ende die vlecht sceytselen, ende die beencieraden, ende die cleyn ghewronghen ketenkens, ende die riekerkens ende die oorringhen,

21

ende die vingheringhen, ende die peerlen opt voerhooft hanghende,

22

ende die cierlijcke ouercleederen, ende die mantelkens, ende die lijnen doecken, ende die naelden,

23

ende die spieghelen, ende die sweet doecken, ende die huyuen, ende die kerspen kelen.

24

Ende daer sal sijn voer den sueren rueck stanck, ende voer den riem een zeelken, ende voer dat ghecrolt haer, caluheyt, ende voer dat borstlap, een hayren cleedt.

25

Ende v alderschoonste mans sullen metten sweerde uallen, ende v stercke mannen inden strijdt.

26

Ende haer poorten sullen trueren ende rouwe maken, ende sij sal verlaten op die eerde sitten.