Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

HEt woert dat ghesien heeft Isaias Amos sone op Iudam ende Ierusalem.

2

⁺Ende daer sal in die wterste daghen bereedt sijn den berch van des Heeren huys, op den top der berghen, ende hy sal verhauen worden bouen die hueuelen, ende tot hem sullen vloeyen alle die Heydenen.

+ A

3

Ende daer sullen veel volcken gaen ende segghen. Coemt ende laet ons opclimmen totten berch des Heeren,

[p. *557]

ende tot dat huys van Iacobs Godt, ende hy sal ons sijn weghen leeren, ende wy sullen wandelen in sijn paden. Want van Sion sal die wet wtgaen, ende het woert des Heeren van Ierusalem.

4

Ende hy sal die Heydenen ordeelen, ende hy sal veel volcken straffen, ende sy sullen hen sweerden te samen smeden tot ploech couteren, ende hen lancien tot seysenen. ⁺Deen volck en sal teghen dander volck gheen sweert opheffen, noch sij en sullen voerts niet meer gheoeffent worden ten strijde.

+ B

5

Ghy huys van Iacob, coemt en laet ons wandelen int licht des Heeren.

6

Want ghy hebt v volck verworpen thuys van Iacob, want sij sijn veruult als hier voermaels, ende sij hebben waer seggers ghehadt ghelijck die Philistinen ende den vreemden kinderen hebben sij aenghehanghen.

7

Dlant is veruult met siluer ende gout ende haerder scatten en is gheen eynde, ende haer lant is veruult met peerden, ende ontellijck sijn haer waghenen.

8

Ende haer lant is veruult met affgoden. Het werck haerder handen hebben sij aenghebeden, dwelck hen vingheren ghemaect hebben.

9

Ende die mensch heeft hem ghebuycht, ende die man is vernedert, ⁺daer om en vergheues hen niet.

+ C

10

Gaet in die steenrootse, ende verbercht v in die holen der eerden van dat aenschijn der vreesen des Heeren, ende van die glorie sijnder maiesteyt.

11

Die opghehauen ooghen des menschen sijn vernedert, ende die hoocheyt der mannen sal nedergheboocht worden, ende die Heere sal alleene verhauen worden op dien dach.

12

Want den dach des Heeren der heyrscaren op alle houerdighe ende verhauene, ende op alle vermetelijcke, ende die sal vernedert worden.

13

Ende op alle die cederboomen van Libanus die hooghe ende recht op ghescoten sijn, ende op alle die eycke boomen van Basan,

14

ende op alle hooghe berghen, ende op alle opghehauen hueuelen,

15

ende op alle hooghe torren, ende op alle vaste mueren.

16

Ende op alle die scepen van Tharsis, ende op alle dat schoon om sien is.

17

Ende die hoocheyt der menschen sal nedergheboocht worden, ⁺ende die hoocheyt der mannen sal vernedert worden, ende die Heere sal alleen verhauen worden op dien dach.

+ D

18

Ende die affgoden sullen gheheel vernielt worden.

19

Ende sij sullen gaen in die speluncken der steenrootsen, ende in die diepe cuylen der eerden, van daensicht der vreesen des Heeren, ende van die glorie sijnder maiesteyt, als hy opghestaen sal sijn om die eerde te slaen.

20

In dien dach sal die mensch wechworpen die affgoden sijns siluers ende die affgoden sijns gouts, die welcke hy voer sij seluen ghemaect hadde om te aenbidden, mollen, ende vleedermuysen.

21

Ende hy sal gaen in die spleten der steenrootsen, ende in holen der steenen, van daensicht der vreesen des Heeren, ende van die glorie sijnder maiesteyt, als hy opghestaen sal sijn om die eerde te slaen.

22

Daer om rustet vanden mensch wiens adem in sijn noesgaten is, want hy is hooghe gheacht.