Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺DAt visioen Isaie Amos sone, het welcke hi ghesien heeft op Iudam ende Ierusalem in die daghen van Ozias, Ioatham, Achaz, ende Ezechias, die coninghen van Iuda.

+ A

2

Hoort ghi hemelen, ende vaetet metten ooren ghy eerde. Want die Heere heuet ghesproken. Ick heb kinderen opgheuoedt ende verheuen, maer sij hebben my versmaet.

3

Den osse heeft sijnen besitter ghekent, ende den ezel die cribbe sijns heeren, maer Israel en heeft my niet ghekent, ende mijn volck en heuet niet verstaen.

4

Wee den sondighen volcke, den volcke dat swaer is van boosheyt, den arghen sade, den seer boosen kinderen, ⁺sij hebben den Heere verlaten, den heylighen van Israel hebben sij gheblasphemeert, sij sijn vervreemt achterwaerts.

+ B

5

Waer om sal ick v voerts slaen, die noch meer ouertredinghe daer toe doet? Alle hooft es quelende, ende alle herte is truerende.

6

Van die plante des voets, totten top des hoofs soo en is in hem gheen ghesontheyt. Die wonde ende blauwe strame, ende die swillende quetsuere en is niet verbonden, noch gheheelt met medecijne, noch versaecht met olien.

7

V lant is verwoest, v steden sijn verbrant metten viere, v lantscap verslinden voer v die vreemde, ende het sal verwoest worden als in die viandelijcke verderuenisse.

8

Ende die dochter van Sion sal verlaten worden als een lommer huysken inden wijngaert, ende als een hutteken in die concommer plaetse, ende ghelijck een stadt die verdoruen wort.

9

⁺En hadde die Heere der heyrscaren ons gheen saet ghelaten soe souden wy als Sodoma gheweest hebben, ende als Gomorrha souden wy ghelijck sijn.

+ C

10

Hoort des Heeren woert ghy princen der Sodomiters, vaet metten ooren die wet ons Gods ghy volck van Gomorrha.

11

Waer toe brengdi my die menichte van uwen slachofferanden seyt die Heere? Ick bens vol, die heelbrantofferen der rammen, ende dat vet des inghewants van die vette beesten, ende dbloet der calueren ende der lammeren ende der bocken en heb ick niet ghewilt.

12

Als ghy voer mijn aensicht quaemt, wie heeft dese dinghen versocht wt uwe handen, dat ghy wandelen soudt in mijn voerhouen?

13

⁺en brengt voert aen gheen sacrificie meer te vergheefs, den ruecoffer is my een affgrijselijcheyt. Die feeste der nieuwer maent ende den sabboth dach, ende v ander feestaghen en sal ick niet ghedooghen, v vergaderinghen sijn onrecht,

+ D

14

uwe nieuwe maenden ende v feestdaghen heeft mijn ziele ghehaet, sij sijn my moetelijck gheworden, ick heb ghearbeyt int verdraghen.

15

Ende als ghy v handen sult wtreycken, dan sal ick mijn ooghen van v keeren, ende als ghy tghebedt vermenichfuldicht dan en sal ick niet verhooren, want v handen sijn vol bloets.

16

Wert ghewasschen, weest suyuer, ende doet wech het quaet uwer ghedachten van mijnen ooghen. Hout op van quaet te doene,

17

leert wel doen, ⁺soect het recht ordeel. Coemt te helpen den verdructen, doet recht die weese, bescermt die weduwe.

+ E

18

Ende coemt ende besculdicht my seyt die Heere, eest dat v sonden gheweest sullen hebben als scaerlaken graen, soo sullen sij ghelijck sneu wit ghemaect worden, ende al hebben die gheweest soo root als vermilioen, soe sullen die als wolle wit sijn.

19

Eest dat ghy wilt, ende my hoort, soe suldi die goeden der aerden eten.

20

Maer eest dat ghijt niet en wilt, ende my tot gramscap verwecket, soe sal dat sweert v verslinden. Want den mont des Heeren heuet ghesproken.

21

Hoe is die ghetrouwe stadt vol oordels een hoere gheworden? die rechtuerdicheyt heeft in haer ghewoont, maer nu woonen daer in dootslaghers.

22

⁺V siluer es verkeert in schuym, uwe wijn is ghemenghet met water.

+ F

23

V princen sijn onghetrouwe, ghesellen der dieuen. Sy alle beminnen ghauen, ende volghen die wederloonen. Den weese en doen sij gheen recht, ende der weduwen sake en coemt niet binnen tot hen.

24

Daer om seyt die Heere die God der heirscaren, die sterke van Israel. Och ick sal vertroost worden ouer mijn vianden, ende ick sal ghewroken worden van mijn vianden.

25

Ende ick sal mijn hant omkeeren tot v, ende ick sal heel suyuer wtbranden uwen schuym, ende wechnemen allen v ten.

26

Ende ick sal wederom v richters opstellen, ghelijck sij te voren waren, ende v raetslieden ghelijck in die oude tijden, daer na suldi ghenoemt worden die stadt van des gherechtighen, ⁺een ghetrouwe stadt.

+ G

27

Sion sal doert ordeel verlost worden, ende sij sullense wederom brengen in die rechtuerdicheyt,

28

ende hy sal die boose quaet doenders ende die sondaren te samen vernielen, ende die den Heere verlaten hebben sullen verdaen worden.

29

Want sij sullen bescaemt worden van den affgoden den welcken sij sacrificie ghedaen hebben, ende ghy sult v scamen van die cruyt houen die ghy wtuercoren hadt,

30

als ghy zijn sult ghelijck eenen eycken boom wiens bladeren aff vallen, ende als eenen hoff sonder water.

31

Ende v stercheyt sal wesen als een voncke van vlas, ende v werck als een gheynstere viers, ende die sullen beyde tsamen ontsteken worden, ende daer en sal niemant sijn diese wt blussche.