Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .l. Capittel.

1

⁺SImon die sone van Onias die groote priester, die in sijn leuen dat huys gheuesticht heeft, ende in zijn daghen heeft hy den tempel versterct.

+ A

2

Oock soo is die hoocheyt des tempels van hem ghefundeert, een dobbel timmeragie, ende die hooghe wanden vanden tempel.

3

In sijnen daghen hebben wtghevloten die waterputten, ende ghelijck een zee zijn sij veruult bouen maten.

4

Die sijn volck besorcht heeft, ende dat verlost van die verderffenisse.

5

Die machtich gheweest heeft die stadt te timmeren, die glorie vercreghen heeft int verkeeren onder tvolck, ende den inganck, ende des huys ende voerhoefs heeft hy verbreydt.

6

Als een morghensterre int midden des neuels, ende ghelijck een volle mane in haren daghen licht gheeft,

7

ende ghelijck een blinckende sonne, alsoo heeft hy claer gheschenen in den tempel Gods.

8

Ghelijck den reghenboghe wederscijnende tusschen die wolcke der glorien, ende als een bloem der roosen inden tijt vanden voersomer, ende als lelien die aen den loop des waters sijn, ende als welriekende wieroock in die daghen des somers.

9

⁺Ghelijck wtscijnende vier, ende wieroock berrende int vier.

+ B

10

Als een licht vat van goude verciert met alle costelijcke ghesteenten.

11

Als eenen groeyende olijfboom, ende als eenen cypressen boom in die hoochde sij seluen opheffende, in dien dat hy nam dat costelijck cleedt der glorien, ende ghecleedt worde met die volcomenheyt der cracht.

12

Int opgaen vanden heylighen outaer, soo heeft hy glorie ghegheuen den habijte der heylicheyt.

13

Maer int ontfanghen der deelen wt die handen der priesteren, soo was hy oock staende neffens den outaer. Omtrent hem was een croone der broederen, ende als een plantinghe van cederboomen opden berch Libanus.

14

Sij hebben alsoo by hem ghestaen als palm tacken, ende alle Aarons sonen in hen glorie.

15

Ende die offerande des Heeren was in hen handen voer alle die vergaderinghe van Israel, ende bedienende dat volbringhen op den outaer, om seer prijselijck te maken die offerande van den hooghen coninck,

16

heeft hy zijn handt wtghestrect tot die natte offerande, ende hy heeft ten offer ghestort het bloet der wijndruyuen.

17

Hy heeft wtghestort opt fundament des outaers eenen goddelijcken rueck den hooghen prince.

18

⁺Doen hebben die kinderen van Aaron met die wt gheslaghen tromppetten gheluyt ghemaect, ende sij hebben doen hooren een groote stemme ter ghedenckenisse voer Godt.

+ C

19

Doen heeft hem alle tvolck te samen ghehaest, ende sij sijn gheuallen op hen aensicht op die aerde om te aenbidden den Heere haren Godt, ende om ghebeden te presenteren den almachtighen hooghen Godt,

20

ende sij hebben hem grootelijck ghelooft singhende met haren stemmen, ende int groot huys is vermeerdert een gheluyt vol suetticheyts.

21

Ende tvolck heeft den hooghen Heere ghebeden int ghebedt, tot dat die eere des Heeren volmaect was, ende tot dat sij haren dienst volbracht hadden.

22

Doen heeft hy nedercomende sijn handen opghehauen ouer alle die verghaderinghe der kinderen van Israel om den Heere die glorie te gheuen van sijnen lippen, ende om in sijnen naem te glorieeren,

23

ende hy heeft

[p. *555]

sijn ghebedt herhaelt willende toonen die cracht Godts.

24

⁺Ende hy heeft noch meer ghebeden den Godt van allen die groote dinghen ghedaen heeft in tgheheel eertrijcke, die ons daghen vermeerdert heeft van ons moeders lichaem, ende heeft met ons ghedaen nae sijn bermherticheyt,

+ D

25

dat hy ons gheue vrolijcheyt des herten, ende dat peys mach werden in onse daghen in Israel, ten eewighen daghen,

26

dat die kinderen van Israel gheloouen moghen, dat Godts bermherticheyt met ons is dat hy ons verlosse in sijn daghen.

27

Twee volcken haet mijn ziele, maer tderde dat ic hate en is gheen volck.

28

Die daer sitten opden berch Seir, ende die Philistijnen, ende het dwaes volck datter woont in Sichimis.

29

Die leeringhe der wijsheyt ende der onderwijsinghe heeft in desen boeck ghescreuen Iesus Sirachs sone een Ierosolimiter, die die wijsheit vernieut heeft wt sijn herte.

30

Salich is hy die in dese goede dinghen verkeert die dese stelt in sijn herte, hy sal aitijt wijs sijn.

31

Want eest dat hy dese dinghen doet, soe sal hy tot alle dinghen bequaem sijn, want het licht Godts is sijn teeken.