Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlix. Capittel.

1

⁺DIe memorie van Iosias is ghemaect als dat mencsel des ruecwers eens apotekers werck.

+ A

2

In alle monden sal sijn ghedenckenisse als honich soet worden, ende ghelijck dat muysijck spel inden maeltijt des wijns.

3

Hy is van Godt ghescict tot des volcs bekeeringhe, ende hy heeft wech ghenomen die affgrijselijcheden der ongoddelijcheyt.

4

Ende hy heeft sijn herte totten Heere ghescict, ende in die daghen der sondaren, heeft hy die godsdiensticheyt versterct,

5

Sonder Dauid ende Ezechiam ende Iosiam hebben sij alle sonde ghedaen,

6

⁺want die coninghen van Iuda hebben die wet des alderhoochsten verlaten, ende sij hebben versmaet die vreese Gods.

+ B

7

Want sij hebben hen rijck den anderen ghegheuen, ende hen glorie den vreemden volcke.

8

Die welcke hebben die vercoren stadt der heylicheit verbrant, ende haer weghen woest ghemaect, in Ieremias hant.

9

Want desen hebben sij qualijck mishandelt, die van sijns moeders lichaem was een geheylicht propheet, om om te worpen, ende wt te trecken ende wt te verderuen ende wederom te timmeren, ende te vernieuwen.

10

Ezechiel die daenschouwen der glorien ghesien heeft, het welcke hy hem ghetoont heeft in den waghen des Cherubins.

11

⁺Want hy der vianden mentie ghemaect heeft in den reghen, om wel te doen den ghenen die rechte weghen ghetoont hadden.

+ C

12

Ende die beenderen der twaelf propheten moeten wt spruyten van hen plaetse, want sij hebben Iacob versterct, ende hebben hem verlost doer tghelooue der cracht.

13

Hoe sullen wy grootelijck moghen prijsen Zorobabel? Want hy is oock als een teeken in Israels rechte hant.

14

Ende Iesum den sone van Iosedec? die in hen daghen het huys hebben opghetimmert, ende sij hebben opghehauen den heylighen tempel des Heeren, bereyt tot eewigher glorien.

15

⁺Ende Nehemias in die ghedenckenisse van veel tijts, die ons opgherecht heeft die omgheworpen mueren, ende heeft doen staen die poorten ende sloten, die ons huysen op ghericht heeft.

+ D

16

Niemant en is gheboren op eertrijck ghelijck Henoch, want hy is oock opghenomen vander eerden.

17

Ende Ioseph die een mensche gheboren is een prince sijnder broederen, een vasticheyt des volcs, een regeerder der broederen, een vastmakinghe des volcs,

18

wiens beenderen besocht zijn, ende nae sijn doot hebben die ghepropheteert.

19

Seth ende Sem hebben by die menschen glorie vercreghen, ende Adam is bouen alle zielen in den oorspronck.