Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlviij. Capittel.

1

ENde Elias die Propheet is opghestaen ghelijck een vier, ⁺ende sijn woert bernde ghelijc een fackele.

+ A

2

Die ouer hen ghebracht heeft den hongher, ende die hem veruolchden met haer nydicheyt sijn luttel gheworden. Want sij en mochten niet verdraghen die gheboden des Heeren.

3

Doer des Heeren woert heeft hy den hemel toeghehouden, ende hy heeft van hem vier nedergheworpen ter eerden.

4

Alsoo is Elias groot gheworden in sijn wonderlijcke wercken. Ende wie mach alsoo glorieeren als ghy?

5

Die eenen dooden wechghenomen hebt vander hellen, van dat deel der dooden doer dwoert des Heeren des Godts.

6

Die coninghen nedergheworpen hebt ter verderffenissen, ende hebt lichtelijck hen macht ghebroken, ende die heerlijcke van haren bedde.

7

Die in Sina hoort dat ordeel, ende in Horeb die vonnissen der bescerminghen.

8

Ghy die de coninghen salft ter penitencien, ende maect propheten v naecomers nae v.

9

Die op ghenomen sijt in den storme des viers, in den waghen der vierighe peerden.

10

Die inghescreuen sijt in die seker tekenen der tijden, om te versachten die gramscap des Heeren, om te versoenen des vaders herte totten sone, ende om weder op te richten die gheslachten van Iacob.

11

⁺Salich sijnse die v ghesien hebben, ende met uwer vrientscappen verciert sijn gheweest,

+ B

12

want wy leuen alleen dit leuen, maer nae ons doot en sal onsen naem alsulck niet sijn.

13

Elias die inden storm bedect is gheweest, ende in Eliseo is sijnen gheest veruult gheeweest, in sijnen daghen en heeft by gheenen prince ontsien, ende met machte en heeft hem niemant verwonnen.

14

Noch gheen woert en heeft hem verwonnen, ende sijn doot lichaem heeft ghepropheteert.

15

In sijnen leuen heeft hy mirakelen ghedaen, ende in sijn doot heeft hy wonderlijcke dinghen ghewracht.

16

In alle dese en heeft het volck gheen penitencie ghedaen, ende sij en sijn niet ghescheyden van haren sonden, tot dat sij wtghedreuen worden van haren lande, ende verstroyt in allen landen,

17

ende daer is seer luttel volcs ghelaten, ende een prince int huys van Dauid.

18

Die sommighe van haer lieden hebben ghedaen dat den Heere behaechde, maer die andere hebben veel sonden ghedaen.

19

Ezechias heeft sijn stadt sterck ghemaect, ende hy heeft int midden van haer dwater ghebracht, ende die steenrootse met yser doergrauen, ende hy heeft by dwater eenen put ghegrauen.

20

In sijnen daghen is Sennacherib opghecomen, ende heeft Rabsacen ghesonden, ende heeft sijn hant opghehauen teghen hen, ⁺ende heeft sijn hant wtghesteken teghen Sion, ende is hoouerdich gheworden in zijn macht.

+ C

21

Doen hebben hen herten ende handen verbaest gheweest, ende sij hebben pijne gheleden als

[p. *554]

barende vrouwen.

22

⁺Ende sij hebben den bermhertighen Heere aenroepen, ende wtstreckende hen handen hebben sij die opghehauen ten hemel, ende die heylighe Heere Godt heeft haestelijck hen stemme ghehoort.

+ D

23

Hy en heeft niet ghedachtich gheweest haerder sonden, noch hy en heeftse haren vianden niet gheleuert, maer hy heeftse ghesuyuert doer die hant van den heylighen propheet Isaias.

24

Hy heeft der Assyrien heyrlegheren nedergheworpen, ende die enghel des Heeren heeftse vernielt,

25

want Ezechias heeft ghedaen dat Gode behaecht heeft, ende hy heeft sterckelijck ghegaen in Dauid zijns vaders wech, den welcken hem beuolen heeft Isaias die groote prophete ende ghetrouwe int aenschijn Gods

26

in sijn daghen is die sonne achterwaerts wederom ghegaen, ende hy heeft des conincs leuen verlinghet,

27

doer eenen grooten gheest heeft hy die wterste dinghen voersien, ende heeft die truerende in Sion vertroost tot inder eewicheyt.

28

Hy heeft toecomende dinghen ghetoont, ende verborghen dinghen eer die quamen.