Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvij. Capittel.

1

NAe desen is opghestaen Nathan die Propheet in Dauids daghen,

2

⁺ende ghelijck dat vet des inghewants affghesceyden vanden

+ A

[p. *553]

vleesche, alsoo heeft Dauid gheweest van die kinderen van Israel.

3

Metten leuwen heeft hy ghespeelt als met lammeren, ende metten beiren heeft hy ooc desghelijcs ghedaen als metten lammeren der scapen in zijn ioncheyt.

4

En heeft hy niet den ruese doot gheslaghen, ende wechghenomen dat verwijt vanden volcke?

5

Int opheffen van sijnder hant metten steen der slingheren heeft hy omgheworpen die opghehauenheyt van Golias.

6

Daer heeft hy aengheroepen den almachtighen Heere, ende hy heeft hem in zijn rechte hant ghegheuen te verdoen den stercken man in den strijt, ende te verheffen den horn sijns volcs.

7

Alsoo heeft hy hem in thien duysenden gheglorificeert, ende hy heeft hem gheloeft in die benedictien des Heeren, in hem te offeren die croone der glorien,

8

⁺want hy heeft die vianden vernielt van allen sijden, ende hy heeft wtghewortelt die Philistijnen, die wederpartijders tot opden dach van heden toe, ende hy heeft haren horn vernielt tot inder eewicheyt.

+ B

9

In alle zijn werck heeft hy die belijdinghe ghegheuen den heylighen, ende den hooghen inden woerde der glorien.

10

Wt alle sijn herte heeft hy den Heere gheloeft, ende hy heeft Godt ghemint die hem ghemaect heeft, ende die heeft hem teghen die vianden macht ghegheuen,

11

ende hy heeft sanghers doen staen teghen ouer den outaer, ende in hen gheluyt heeft hy suete toonen ghemaect.

12

Ende hy heeft eere ghegheuen tot die vierte der feestachen ende hy heeft die tijden verciert, tot dat voleynden sijns leuens, op dat sij louen souden den heyleghen naem des Heeren, ende dat sij smorghens souden grotelijck louen die heylicheyt Godts.

13

Christus heeft sijn sonden ghesuyuert, ende hy heeft inder eewicheyt verhauen sijnen horn, en hy heeft hem ghegheuen dat testament der coninghen, ende den stoel der glorien in Israel.

14

⁺Nae hem is opghestaen een wijs sone, ende om dien heeft hy ter neder gheworpen alle die machticheyt der vianden,

+ C

15

Salomon heeft gheregneert in die daghen des vreedts, den welcken Godt heeft onderworpen alle die vianden, om dat hy een huys maken soude in sijnen name, ende dat hy bereyden soude die heylicheyt inder eewicheyt, ghelijck hy gheleert is in sijn ioncheyt.

16

Ende hy is veruult als een vloet met wijsheden, ende sijn ziele heeft dat aertrijck ontdeckt.

17

Ende ghy hebt met ghelijckenissen die gheraetsels veruult. Tot die eylanden verre is uwen naem vermaert gheworden, ende ghy sijt bemint gheweest in uwen vrede,

18

in v liedekens, ende bijspraken ende ghelijckenissen, ende verclaringhen hebben haer die landen verwondert,

19

ende in den naem des Heeren des Gods, wiens toenaem is Godt van Israel.

20

Ghy hebt het gout vergadert als latoen, ende ghelijck loot hebdi tsiluer vermenichfuldicht,

21

ende ghy hebt v dgyen den vrouwen gheneycht. Ghy hebt macht ghehadt in v lichaem.

22

Ghy hebt een smette in v glorie ghestelt, ende v saet hebdi ontheylicht om die gramscap te brenghen op v kinderen, ⁺ende in die andere v dwaesheyt,

+ D

23

dat ghy het rijck tweesceydich soudt maecken, ende wt Ephraim te regneeren een hart rijck.

24

Maer Godt en sal sijn bermherticheyt niet verlaten, noch hy en sal niet verderuen, noch te niet doen sijn wercken, noch hy en sal vanden struyck niet vernielen die kints kinderen sijns wtuercorens, ende tsaet van den ghenen die den Heere lief heeft en sal hy niet verderuen.

25

Maer hy heeft Iacob ende Dauid vanden seluen stam een ouerblijfsel ghegheven.

26

Ende Salomon heeft een eynde ghehadt met sijnen vaderen.

27

Ende hy heeft nae hem achterghelaten van sijnen sade, des volcs dwaesheyt,

28

den verminderden van wijsheyt Roboam, die tvolc affghekeert heeft by sijnen raet,

29

ende Ieroboam den sone vat Nabat, die Israel heeft doen sondighen, ende heeft Ephraim den wech om te sondighen ghegheuen. Ende hen sonden sijn seer ouervloedich gheweest.

30

Sij hebben die seer van haren lande ghekeert.

31

Ende hy heeft ghesocht alle archeyt, tot dat die bescermenisse tot hen quam, ende die heeftse van allen sonden verlost.