Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlvi. Capittel.

1

⁺STerck in die orloghe was Iesus naue Moyses naecomer, in die propheten, die groot was nae sijnen naem,

+ A

2

dalder grootste ter salicheyt van die wtuercorene Godts, om te bestrijden die oprijsende vianden, op dat hy Israels erffenisse soude vercrijghen.

3

Welcke glorie heeft hy vercreghen int opheffen van sijnen handen, ende in sweerden te worpen teghen die steden.

4

Wie heefter voer hem alsoo wederstaen? Want die vianden heeft die Heere selue verslaghen.

5

En is doer sijn gramscap die sonne niet beledt gheweest, ende en is eenen dach niet gheworden als twee?

6

Hy heeft den machtighen alderhoochsten aengheroepen, int bestrijden der vianden van allen sijden? ende die groote heylighe Godt heeft hem ghehoort in die haghelsteenen van seer stercker cracht.

7

Hy heeft eenen oploop ghedaen teghen dat viandelijck volck, ende int nederdalen heeft hy die wederpartijders vernielt,

8

op dat die Heydenen kennen souden sijn machticheyt, ⁺want ten is niet licht tseghen den Heere te strijden, ende hy heeft achter rugghe die machtighe gheuolcht.

+ B

9

Ende in die daghen van Moyses heeft hy bermherticheyt ghedaen, hy ende Caleb Iephones sone, int staen teghen den viant, ende het volck te beletten van sonden, ende te doerbreken die murmuratie der quaetheyt.

10

Ende sij twee ghestelt wesende sijn verlost wt dat perikel van tghetal van ses hondert duysent voet volcs, dat sij hen in leyden souden in die erfbesittinghe, int lant dwelck vloeyt honich ende melck.

11

Ende die Heere heeft den seluen Caleb stercheyt verleent, ende tot in den ouderdom bleef hem by die cracht dat hy opclimmen soude op die hooghe plaetse des lants, ende sijn saet heeft beseten die erffbesittinghe,

12

op dat alle die kinderen van Israel sien souden dat goet es onderdanich te sijn den heyleghen Godt.

13

⁺Ende die rechters elck by haren name der welcker herte niet verarghert en is gheweest, die niet en hebben affghekeert gheweest vanden Heere

+ C

14

op dat hen ghedenckenisse in die benedijdinghe sij, ende hen beenderen groeyen van haerder plaetse

15

ende haren naem blijue inder eewicheyt, die glorie dier heyligher mannen altijt blijuende tot die kinderen.

16

Samuel die propheet van den Heere sijnen Godt bemint heeft dat conincrijck vernieuwet, ende heeft ghesalft die princen in sijn volck.

17

In die wet des Heeren heeft hi der vergaderinghen recht ghedaen, ende hy heeft ghesien Iacobs Godt, ende doer sijn ghelooue is hy ghetoont te wesen een Propheet.

18

Ende hy is bekent in zijn woerden ghetrouwe, want hy heeft ghesien den Godt des lichts,

19

ende hy heeft den almachtighen Heere aengheroepen, int bestrijden der vianden die van alle sijden omstaende waren, tot die offerande des ombesmette mans.

20

⁺Ende die Heere heeft vanden hemele ghedondert, ende in een groot gheluyt heeft hy zijn stemme doen hooren,

+ D

21

ende hy heeft vernielt die princen der Tyriers, ende alle die vorsten der Philistijnen.

22

Ende voer den tijt van dat eynde sijns leuens ende der werelt gaff hy ghetuyghenisse voer daenschijn des Heeren, ende des ghesalfden. Ghelt ende totten schoenen toe en heeft hy niet van eenighen vleesch ghenomen, ende gheen mensch en heeft hem besculdicht.

23

Ende daer nae es hy ontslapen, ende hy heeft den coninck te kennen ghegheven, ende hem ghetoont het eynde sijns leuens. Ende hy heeft sijn stemme opghehauen wter eerden doer een prophetie, om te vernielen die ongoddelijcheyt des volcs.