Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlv. Capittel.

1

⁺MOyses Gode ende den menschen lief ghetal wiens ghedenckenisse is in die ghebenedijnge.

+ A

2

Hy heeft hem ghelijc ghemaect in glorien der heylighen, ende hy heeft hem groot gemaect door die vreese der vianden, ende door sijn woorden heeft hy versaecht die wonderlijcke teekenen.

3

Hy heeft hem glorioos ghemaect int aenschijn der coninghen, ende hy heeft hem gheboden voor sijn volck, ende heeft hem sijn glorie ghetoont.

4

In sijn ghelooue ende saechtmoedicheyt heeft hy hem heylich ghemaect, ende hy heeft hem vercoren wt allen vleesche.

5

Want hy heeft hem ghehoort ende sijn stemme, ende hy heeft hem gheleydt inder wolcken.

6

Ende hy heeft hem therte ghegheuen tot die gheboden ende tot die wet des leuens ende der onderwijsinghe, om Iacob te leeren sijn testament, ende sijn ordeelen Israel.

7

Aaron sijnen broeder heeft hy hooghe ghemaect, ende sijns ghelijck van tgheslachte van Leui.

8

Hy heeft hem ghestelt een eewich testament, ende heeft hem ghegheuen dat priesterscap des volcs, ende hi heeft hem salich ghemaect in glorien,

9

⁺ende heeft hem om gort met den gordel der glorien, ende hy heeft hem aenghedaen dat ouercleedt der glorien, ende hem ghecroont met die ghereetscappen der cracht,

+ B

10

cieraeden om sijn voeten, ende neder cleederen, ende een ouerscouder cleedt heeft hy hem ghesteldt, ende hy heeft hem int ronde al om behanghen met veel bellekens,

11

om gheluyt te gheuen in sijnen ganc, om te doen hooren tgheluyt inden tempel, ter ghedenckenissen van die kinderen sijns volcs.

12

Met dat heylich cleedt van gout, ende blau, ende

[p. *552]

purpur zijde een gheweuen werck van eenen man die met rechte kennisse ende waerheyt begaeft was.

13

Met ghedraeydde roode sijde een werck eens constenaers, met costelijcke ghefigureerde steenen int beslach van goude, ende met eens steengraueerders werck ghegraueert, ter ghedenckenissen nae tghetal der kinderen van Israel.

14

Een gouden croone op sijnen mijter wtghedruct met een teeken der heylicheyt, ende glorie der eeren, ende een werck van crachten verciert nae den lust der ooghen.

15

Soe schoone en sijnder voer hem niet gheweest tot den beghinsel.

16

Gheen vreemdelinck en is daer mede ghecleedt gheweest, maer alleen sijn sonen, ende sijn neuen tot allen tijden.

17

⁺Sijn sacrificien worden daghelijcs metten viere verbrant.

+ C

18

Moyses heeft sijn handen ghewijt, ende hem ghesalft met die heylighe olie.

19

Het is hem gheworden tot een eewich testament, ende sijnen sade als die daghen des hemels, om te bedienen het priesterscap, ende den loff te hebben, ende om te glorificeren sijn volck in sijnen naem.

20

Hy heeft hem vercoren wt alle die leuende om Gode sacrificie te offeren. Den rueck offer ende den goeden rueck ter ghedenckenissen om te versoenen voer sijn volck,

21

ende hy heeft dien in sijn gheboden macht ghegheuen, in die testamenten der ordeelen om Iacob die ghetuyghenissen te leeren, ende doer sijn wet Israel licht te gheuen.

22

Want teghen hem hebben die vreemde ghestaen, ende wt nydicheyt hebben hem die menschen omringhelt in die woestijne, die met Dathan ende Abiron waren, ende die vergaderinghe van Chore inder grammoedicheyt.

23

Dit heeft ghesien die Heere Godt, ende ten heeft hem niet behaecht, ende sij sijn vernielt in tghewelt der gramscappen.

24

Hy heeft hen wonderlijcke dinghen ghedaen, ende hy heeftse verteert metter vlammen des viers.

25

Ende hy heeft Aaron noch meer glorien daer toe ghegheuen, ende hy heeft hem een erffelijcheyt ghegheuen, ende die ierste vruchten, van die vruchten der eerden heeft hy hem ghedeylt.

26

⁺Ende hy heeft ten iersten broot bereydt ter versadinghen. Want die sacrificien des Heeren sullen sij eten, die welcke hy hen ghegheuen heeft ende sijnen sade.

+ D

27

Maer op die eerde en sal hy onder tvock niet beeruen, ende hy en heeft gheen deel onder tvolck. Want die Heere es hen deel, ende erffenisse.

28

Phinees die sone van Eleazarus is die derde in glorien, hem volghende in die vreese des Heeren,

29

ende om te staen in die eerweerdicheyt des volcs, doer die goetheyt ende vrolijcheyt sijnder zielen heeft hy behaecht Gode van Israel.

30

Daer om heeft hy hem ghestelt een testament des vreedts, eenen prince der heylighen ende sijns volcs, dat hem ende sijnen sade soude toebehooren die weerdicheyt des priesterscaps inder eewicheyt.

31

Ende een testament voer Dauid den coninck, den sone van Iesse van Iudas gheslachte, een erffenisse voer hem ende voer zijn saet, om dat hy wijsheyt gheuen soude in ons herte, om sijn volck te ordeelen met rechtuerdicheden, op dat hen goede dinghen niet en souden vergaen, ende hen glorie heeft hy eeuich ghemaect in hen volck.