Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliiij. Capittel.

1

⁺LAet ons louen die glorioose mannen, ende onse ouders in haren gheslachten.

+ A

2

Veel glorien heeft die Heere ghemaect, met grootdadicheyt van tbeghin der werelt.

3

Menschen heerschappie hebbende in haer machticheden groot van crachte, ende begaeft met hen voorsienicheyt, vercondighende in die propheten die weerdicheyt der propheten,

4

ende tghebodt hebbende ouer dat teghenwoordich volck, ende hebben door die cracht der voorsienicheyt den volcken die alderheylichste woorden vercondicht.

5

In hen consticheyt soeckende die maten der musiken, ende vertellende ghemeten ghedichten in die scriften.

6

⁺Rijcke menschen van machte hebbende neerstich ondersoec der schoonheyt, vrede makende in hen huysen.

+ B

7

Alle dese hebben in die gheslachten haers volcs glorie ghecreghen, ende in haren daghen sijn si ghepresen gheweest.

8

Die van hen gheboren sijn hebben den naem achterghelaten om te vertellen haren lof,

9

ende daer isser waer af dat gheen ghedenckenisse en is, sij sijn vergaen als oft sij niet gheweest en hadden, ende sij sijn gheboren als oft sij niet gheboren en waren, ende hen kinderen met hen.

10

Maer die sijn mannen der bermherticheden der welcker goedertierenheden niet ghefaelgeert en hebben,

11

met haren sade blijuen die goede dingen,

12

een heylige erffelijcheyt sijn haers kindts kinderen, ⁺ende in die testamenten heeft hen saet ghestaen,

+ C

13

ende hen kinderen om haren willen blijuen in der eewicheyt, hen saet ende hen glorie en sal niet verlaten worden.

14

Hen lichamen sijn in vrede begrauen ende haren naem leeft van gheslachte tot gheslachte.

15

Hen wijsheyt laet die volcken vertellen, ende haren loff laet die vergaderinghe der gheloouigher vercondighen.

16

Henoch heeft Gode behaecht, ende hy is ouergheuoert int paradijs, dat hy den volcken soude penitencie gheuen.

17

Noe is volmaect gheuonden, rechtuerdich, ende ten tijde der gramscappen is hy die versoeninghe gheworden.

18

Daerom isser een ouerblijfsel der eerden ghelaten als den oueruloet ghesciedt.

19

Die testamenten der eewicheyt sijn by hem ghestelt, dat alle vleesch niet en soude moghen vernielt worden door den ouervloet.

20

Abraham was een groot vader van die menichte der volcken, ⁺ende daer en is niemant geuonden sijns ghelijck in glorien, die bewaert heeft die wet vanden hooghen ende heeft int testament met hem geweest.

+ D

21

In sijn vleesch heeft hi een testament doen staen, ende in die becoringhe is hi getrouwe beuonden,

22

daerom heeft hi hem met eede glorie ghegeuen in sijn volc, dat hi soude wassen als eenen hoop van eerden,

23

ende dat hi sijn saet verheffen soude als die sterren, ende dat hy die soude beeruen vander zee totter zee, van den vloet tot die eynden der eerden.

24

Ende in Isaac heeft hy desghelijcs ghedaen om Abraham sijnen vader.

25

Die benedictie van allen volcken heeft hem die Heere ghegheuen, ende dat testament heeft hy gheuesticht op Iacobs hooft.

26

Hy heeft hem bekent in sijn benedictien, ende hy heeft hem een erffelijcheyt ghegheuen ende hem een deel ghedeylt inden twelf gheslachten,

27

ende hy heeft hem bewaert menschen der bermherticheyt, vindende gratie in die ooghen van allen vleesche.