Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xliij. Capittel.

1

⁺DAt firmament der hoocheyt is sijn schoonheyt, die ghedaente des hemels int ghesichte der glorien.

+ A

2

Die sonne int aensien vercondighende inden wtganc een wonderlijc vat, een werck des alderhoochsten.

3

Inden middach verbrant sij die eerde, ende wie soude connen verdraghen in daensien van haerder hitten. Tforneys bewarende die wercken der hitten,

4

verbrant die sonne die berghen, vierighe stralen wtblasende ende weder scijnende, soo verblint sij met haren stralen die ooghen.

5

Groot is die Heere diese ghemaect heeft, ende in sijn woorden heeft sij haestelijck haer reyse ghedaen.

6

Ende die mane is in allen te haren tijde een vertooninghe des tijts, ende een teeken vander werelt dueringhe.

7

Van die mane is het teeken vanden feestelijcken dach, een licht dat ghemindert wort in die voleyndinge.

8

Die maent is nae haren naem wassende wonderlijck tot die voleyndinge toe.

9

Een instrument des heyrs in die hoochde int firmament des hemels gloriooselijck blinckende

10

die ghedaente des hemels is die glorie der sterren die werelt verlichtende in die hoochde is die Heere.

11

In die heylighe woorden sullen sij ten ordeel staen, ende sij en sullen niet ontbreken in hen wakinghen.

12

⁺Aensiet den reghenboghe ende ghebenedijt hem die dien ghemaect heeft, seer schoon is hy in sijn schijnsel.

+ B

13

Hy heeft den hemel omringhet met den omganck sijnder glorien, die handen vanden hooghen hebben dien ontploken.

14

Met sijnen ghebode heeft hy den sneeu haestelijck doen comen, ende hy haest hem wt te senden die blixemen sijn oordeels.

15

Daerom sijn die schatten open ghedaen, ende die neuelen sijn wt gheuloghen als voghelen.

16

In sijn grootheyt heeft hy die wolcken ghesteldt, ende die steenen des haghels sijn ghebroken.

17

Voor sijn aensicht sullen die berghen beroert worden, ende door sijnen wille heeft den suyden wint ghewaeyt.

18

Die stemme sijns donders heeft die eerde gheslaghen, den tempeest vanden noorden, ende die vergaderinghe des wints,

19

ende ghelijck eenen voghel nederdalende om te sitten, soo verstroyt hy den sneeu, ende ghelijck die nederdalende sprinchanen, is het nederdalen van dien.

20

Die ooghe

[p. *551]

sal die schoonheyt van sijnder blinckender witticheyt verwonderen, ende van sijnen slachreghen soo verscrict hem het herte.

21

Den vorst stort hy wt als sout op die eerde, ende alst ghevrosen is, soo salt worden als die tsoppen der distelen.

22

Den couden noorden wint heeft ghewaeyt, ende daer is cristal gheurosen van dwater, op alle die vergaderinghe der wateren sal hy rusten, ende als een pansier sal hy hem met die wateren cleeden.

23

⁺Ende hy sal die berghen verslinden ende verbrande die woestijne, ende verbluysteren dat groen gras ghelijck dat vier.

+ C

24

Die medecijne van al is int haesten des neuels, ende den dauwe ontmoetende van die comende hitten sal dien vernederen.

25

Door sijn woort heeft den wint ghesweghen, ende met sijn ghedachte heeft hy den affgront stille ghemaect, ende die Heere Ihesus heeft dien gheplant.

26

Die ter zee scepen, die vertellen haer perijkelen ende dit hoorende met onsen ooren sullen wij ons verwonderen.

27

Daer sijn seer vernaemde wercken, ende wonderlijcke versceyden manieren van beesten, ende van allen cleyn vee, ende scepsel van groote dieren.

28

Door hem soo is gheuesticht dat eynde der reysen, ende door sijn woort sijn alle dinghen ghemaect.

29

Wij sullen veel segghen, ende ons sullen woorden ghebreken, maer het sluyten van die woorden is hi in alle dinghen.

30

Tot waer toe sullen wij glorieerende vermoghen? want hy is die almachtighe bouen alle sijn wercken.

31

Veruaerlijck is die Heere ende crachtelijcken groot, ⁺ende wonderlijck is sijn macht.

+ D

32

Glorificeert den Heere soo veel als ghy vermoecht, soo sal hy daer noch bouen vermoghen, ende wonderlijc is sijn grootdadicheyt.

33

Ende ghi den Heere ghebenedijdende verheft hem soo seere als ghy vermoecht, want hy is meerder dan alle loff.

34

Hem verheffende wort met crachte veruult, en wilt niet arbeyden, want ghy en sult hem niet begrijpen.

35

Wie sal hem sien, ende vertellen? ende wie sal hem grootmaken ghelijc hi is vanden beghinne.

36

Daer sijn veel meerder verborghentheden dan dese, want wij hebben luttel van sijnen wercken ghesien.

37

Ende die Heere heeftse alle ghemaect, ende den ghenen die goetvruchtelijc leuen heeft hy wijsheyt ghegheuen.