Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xlij. Capittel.

1

⁺EN verhaelt die redene des ghehoors niet van die openbaringhe der verborghender redene, ende ghi sult warachtelijc wesen sonder bescaemtheyt, ende ghi sult gratie vinden voor daenschijn van allen menschen, dat ghy van alle dese dinghen niet bescaemt en wort, ende dat ghy gheenen persoon wt en neemt om te misdoen.

+ A

2

Van die wet, ende vant testament des alderhoochsten, ende van dat ordeel den ongoddelijcken rechtuerdich te maken.

3

Van dat woort der ghesellen ende wandelaren, ende van die ghifte der erffenisse van die vrinden,

4

van die ghelijcheyt der waghen ende der ghewichten, van tvercrijghen van veele ende luttele,

5

van die bedrieghelijcke verderffenisse der comenscap ende der coopluyden, ende van veel castijnge der kinderen, ende van eenen alderquaetsten knecht die sijde te bebloeden.

6

Op een quade vrouwe is een slot goet.

7

⁺Daer veel handen sijn, sluyt, ende al wat ghi leueren sult dat telt ende weecht, maer alle wtgheuen ende ontfanck bescrijft.

+ B

8

Van des onwijsen ende dwasen leeringhe, ende van die ouders die gheordeelt worden van den ionghers, ende ghy sult gheleert sijn in alle din ghen ende prijselijck in daensicht van allen mannen.

9

Des vaders dochter is een heymelijcke makinge, ende die sorghe van haer beneemt hen den slaep, dat sij by auontueren in haer ionghe iuecht gheen ouerspeeldersse en worde, ende met eenen man ghewoont hebbende niet hatelijck en worde,

10

dat sij tot eenighen tijt niet ontsuyuert en worde in haer maechdelijcheyt, ende dat sij in haers vaders huys niet beurucht gheuonden en worde dat sij by auontueren met eenen man woonende niet en ouertrede, oft dat sij emmer niet onuruchtbaer en worde.

11

Ouer een oncuysche dochter stelt een vaste hoede, op dat sij v tot eenigen tijt niet en doe comen tot scimp uwer vianden, vanden achterclap in die stadt, ende tverwijdt des volcs, ende dat si v niet en bescame in die menichte des volcs.

12

⁺En wilt niet achten op alder menschen schoonheyt, ende int midden der vrouwen en wilt niet woonen,

+ C

13

want vanden cleederen comen die motten, ende vander vrouwen die ongherechticheyt des mans.

14

Want beter is die ongherechticheyt des mans dan een weldoende vrouwe, ende een vrouwe bescamende ten verwijte.

15

Daerom sal ic ghedachtich wesen der wercken des Heeren, ende sijn wercken die ick ghesien hebbe sal ick vercondighen met die woorden des Heeren.

16

Die sonne verlichtende heeft ouer al ghesien, ende vol van die glorie des Heeren is sijn werck.

17

En heeft die Heere die heylighen niet doen vertellen alle sijn wonderlijcheden, die welcke die almachtighe Heere gheuesticht heeft om vast te staen in sijn glorie?

18

Den afgront ende therte der menschen heeft hy ondersocht, ⁺ende in hen scalcheyt heeft hij verdacht.

+ D

19

Want die Heere heeft ghekent alle wetenheyt, ende hy heeft aensien in dat teeken der eewicheyt, vercondigende die dinghen die voorleden sijn, ende die toecomende sijn, ontdeckende die spueren der verborghentheyt.

20

Hem en is gheen ghedachte ombekent, ende gheen redene en verbercht haer voor hem.

21

Die groote daden sijnder wijsheyt heeft hy verciert, die daer is voor die werelt ende tot in der eewicheyt, ende tot hem en is niet toeghedaen

22

noch afghedaen, ende hy en behoeft niemants raet.

23

Hoe lustich sijn alle sijn wercken, ende als een voncke die te aenmercken is?

24

Alle dese leuen, ende blijuen inder eewicheyt, ende tot alle nootelijcheyt soo sijn alle dinghen hem onderdanich.

25

Sij sijn alle tweeuoudich, een tseghen een, ende hy en heefter niet doen ghebreken.

26

Elcs goeden heeft hi vast ghemaect. Ende wie sal versaet worden siende sijn glorie.