Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xli. Capittel.

1

⁺O doot hoe bitter is v ghedenckenisse den mensche die vrede heeft in sijn goeden,

+ A

2

den gherusten man, ende diens weghen wel gheluckich sijn in alle dinghen, ende die noch wel mach spijse nemen?

3

O doot goet is v oordeel den mensch die ghebreck lijdet, die van cracht vermindert wort,

4

die van ouderdom is vergaende, ende die van allen dingen sorge heeft, ende den ongheloouigen die de wijsheyt verliest.

5

En wilt niet vreesen dat vonnis der doot. Ghedenct der dinghen die voor v gheweest hebben, ende die v noch nae ouercomen sullen. Dit vonnis is vanden Heere alle vleesche,

6

ende wat sal v ouercomen in dat welbehaghen des alderhoochsten. Tsij oft thien oft hondert oft duysent iaren sijn,

7

want in die helle en is gheen besculdinghe des leuens.

8

Kinderen der afgrijselijcheden worden sondaren kinderen, ende die verkeeren omtrent die huysen der ongoddelijcker.

9

⁺Die erffenisse vander sondaren kinderen sal vergaen, ende die lasteringhe sal altijt met hen afcoemste sijn.

+ B

10

Vanden ongoddelijcken vader claghen die kinderen, want om sijnen wille sijn sij int verwijdt.

11

Wee v ghy ongoddelijcke mannen, die verlaten hebt die wet vanden alderhoochsten Heere.

12

Ende eest dat ghy gheboren wordt, soo suldi in die maledictie gheboren worden, eest dat ghy sterft, soo sal v deel in die maledictie wesen.

13

Alle dinghen die vander eerden sijn sullen wederom in die eerde verkeert worden, alsoo ooc die ongoddelijcke vander maledictien ter verderffenissen.

14

Den rouwe der menschen is in haren lichaem, maer den naem der ongoddelijcker sal vergaen.

15

Draecht sorghe voor eenen goeden naem, want dat sal v meer by blijuen, dan duysent costelijcke ende groote scatten.

16

⁺Des goeden leuens is een thetal der daghen, maer eenen goeden naem blijft inder eewicheyt.

+ C

17

Kinderen onderhoudt die onderwijsinghe inden vrede, want verborghen wijsheyt ende eenen schadt die niet ghesien en wort wat profijt is in beyde gheleghen?

18

Beter is die mensch die sijn sotheyt verbercht, dan die mensch die sijn wijsheyt verbercht.

19

Maer nochtans keert wederom tot die dinghen die

[p. *550]

wt mijnen mont ghaen,

20

want ten is niet goet in alle dinghen sonder eerbiedinghe te sijn, ende alle dinghen en behaghen den menschen niet wel int ghelooue.

21

Scaemt v voor uwen vader ende moeder van oncuyscheyt, ende voor eenen ouerheere ende machtighen persoon van een loghene.

22

Voor eenen prince ende richter van die misdaet. Voor een vergaderinghe ende voor wolck vander boosheyt.

23

⁺Voor eenen gheselle ende vrint van onrechtuerdicheyt, ende voor die plaetse daer ghi in woont

+ D

24

van dieften, voor Gods waerheyt, ende voor het testament, dan dat sitten ter tafelen om broot teten, ende van die verdonckeringhe des wtgheuens ende ontfanghens,

25

ende voor die ghene die v groeten van stilswijghen, ende van te aensien een oneerbaer vrouwe, ende van dat affkeeren des aensichts van uwen naesten

26

En keert v aensicht van uwen naesten niet, ende van een deel aff te nemen, ende niet weder te gheuen.

27

En aensiet gheens anders mans huysvrouwe, noch en aensoect sijn dienstvrouwe niet, noch en staet aen haer bedde niet.

28

Voor vrinden van verwijtelijcke woorden ende als ghy iet ghegheuen hebt, en verwijdt dat niet.