Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xl. Capittel.

1

⁺EEn groote becommeringhe is allen menschen ghescapen, ende een swaer iock op die kinderen van Adam, vanden dach des wtgancks van haers moeders lichaem, tot opden dach des begrauens in die moeder van allegader.

+ A

2

Hen ghedachten, ende die vreesen des herten, ende die versieringe des verwachtens, ende den dach des steruens,

3

sittende opden eerlijcken stoel, totten ghenen die vernedert is op deerde, ende in die asschen,

4

vanden ghenen die hemelblau sijde ghebruyct, ende een croone draghet, totten ghenen die met rouwen lijnwaet ghecleet is, rasende gramscap, nijdicheyt, oproeringhe, wanckelbaerheyt, ende die vreese der doot, by blijuende gramscap ende kijuagie,

5

ende ten tijde der rusten int bedde den slaep des nachts, verandert sijn wetenheyt.

6

Een luttel als niet is hi in rusten, ende daer aff coemt een ghesicht inden slaep als inden dach.

7

Hy is verbaest door dat ghesichte sijns herten, als die ontgaen is in den dach des strijdts. ⁺Ten tijde van sijn salicheyt is hy opghestaen, ende verwonderende tot gheen vreese.

+ B

8

Dit is met allen vleesche, vanden mensche aen tot die beesten, ende op die sondaers seuenuoudich.

9

Tot desen is die doot, tbloet, kijuagie, ende tsweert, verdruckinghen, hongher, ende vernielinghe, ende gheesselen,

10

op die boose sijn alle dese dinghen ghesacapen, ende om die is die diluuie gheschiet.

11

Want alle dinghen die vander eerden sijn, sullen wederomme in die eerde keeren, ende alle wateren sullen in die zee weder keeren.

12

Alle ghiften ende ongherechticheden sullen te niet ghedaen worden, ende dat ghelooue sal inder eewicheyt staen.

13

Die rijckdommen der onrechtuerdigher sullen als eenen vloet verdroocht worden, ende sij sullen een gheluyt gheuen ghelijck eenen grooten donder inden reghen.

14

Int open doen van sijnen handen sal hy blijde sijn, alsoo sullen die ouertreders in die voleyndinge verdwijnen

15

⁺Die neuen der ongoddelijcker en sullen gheen tacken vermenichfuldighen, ende die onsuyuer wortelen gheuen gheluyt opden tsop vander steenrootsen.

+ C

16

Op alle wateren is groenheyt ende aenden cant des vloets salt voor alle gras wtghetrocken wesen.

17

Die gratie is ghelijck een paradijs in die benedictien, ende die bermherticheyt blijft inder eewicheyt.

18

Het leuen eens wercmans die sij seluen ghenoech heeft sal versoet worden, ende daer in suldi eenen schadt vinden.

19

Kinderen ende die optimmeringhe van eender stadt sal eenen naem beuestighen, ende daer bouen sal een ombesmette vrouwe gheacht worden.

20

Den wijn ende sanck verblijden therte, ende bouen beyde die liefde der wijsheyt.

21

Die fluyten ende dat psalter spel maken een suete melodie, ende bouen beyde is een suete tonghe.

22

Gracieusheyt ende schoonheyt sal v ooghe begheren, ende daer bouen sijn groene ghesaeyde vruchten.

23

⁺Een vrint ende een gheselle die ondertijden versaemt sijn, maer bouen die beyde is een vrouwe met eenen man.

+ D

24

Broeders sijn tot eender helpen inden tijt der tribulatien, maer bouen die sal die bermherticheyt verlossen.

25

Gout ende siluer is een vaste settinghe der voeten, ende bouen beyde is eenen welbehaghenden raet.

26

Rijckdommen ende crachten verheffen therte, ende bouen dese is die vreese des Heeren.

27

Inder vreesen des Heeren en is gheen minderinghe, ende in haer en is gheen helpe te soecken.

28

Die vreese des Heeren is ghelijck een paradijs der ghebenedijnghen, ende bouen alle glorie hebben sij hem ouerdect.

29

Sone ten tijde ws leuens soo en lijdt gheen ghebreck, want tis beter steruen, dan ghebrec te lijden.

30

Een man siende op eens anders tafele, diens leuen en is niet in tgepeyns des leuens, want hy voet sijn ziele met ander luyden spijsen.

31

Maer een welghemaniert ende gheleert man sal hem seluen bewaren,

32

Inden mont van den onwijsen sal die armoede versoet worden, ende in sijnen buyck sal een vier bernen.