Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxix. Capittel.

1

⁺DIe wijsheyt van allen die ouderen sal een wijs man ondersoecken, ende metter prophetien sal hy hem becommeren.

+ A

2

Der vermaerder mannen vertellinghe sal hy onthouden, ende in die listicheden der ghelijckenissen sal hi tsamen ingaen.

3

Die verborghentheden der byspraken sal hy ondersoecken, ende in die bedectheden der ghelijckenissen sal hy verkeeren.

4

Int midden der grooter personagien sal hy dienen, ende voor daenschijn des presidents sal hy ghesien worden.

5

Tot in die landen der vreemder volcken sal hy ouertrecken, want goet ende quaet sal hy in alle dinghen ondersoecken.

6

Sijn herte sal hy gheuen om inden dagheraet te waken tot den Heere die hem ghemaect heeft, ende voor daensicht des alderhoochsten sal hy bidden.

7

Hy sal sijnen mont open doen int ghebedt, ende voor sijn misdaden sal hy bidden.

8

Want eest dat die groote Heere wilt, soo sal hy hem metten gheest des verstants veruullen

9

ende ghelijck slachreghenen sal hy die wtspraken sijnder wijsheyt wtstorten, ende in sijn ghebedt sal hi den Heere belijden.

10

Ende die Heere sal sijnen raet ende sijn leeringhe wel bescicken, ende in sijn verborghentheden sal hy hem beraden.

11

Hy sal openbaer maken die onderwijsinghe van sijnder leeringhen, ende in die wet van des Heeren verbont sal hy glorieeren.

12

⁺Veel menschen sullen te samen prijsen sijn wijsheyt, ende tot inder eewicheyt en sal die niet te niete ghedaen worden.

+ B

13

Sijn ghedenckenisse en sal niet vergaen, ende sijnen naem sal versocht worden van gheslachte tot geslachte.

14

Sijn wijsheyt sullen die Heydenen vertellen, ende sijnen loff sal vercondighen die vergaderinghe der gheloouigen.

15

Eest dat sijnen naem blijft soo sal hy daer meer dan duysent achterlaten, ende eest dat hy rustet, soo salt hem baten.

16

Noch sal ick raet nemen om te vertellen, want als met een rasernie ben ic veruult.

17

Inder stemmen seyt hy. Gheeft my ghehoor ghy goddelijcke vruchten, ende als een roose gheplant aen die riuieren der wateren soo brenght vruchten voorts.

18

Als Libanus soo hebt eenen rueck der sueticheyt.

19

Bloeyet bloemen ghelijck lelien, ende gheeft rueck, ende crijcht looueren ter gratien, ende singt ten loue te samen den lofsanck, ende ghebenedijt den Hee in sijn wercken.

20

Gheeft sijnen naem die grootdadicheyt, ende belijdt hem met die stemme uwer lippen, ende met lofsanghen der lippen, ende met herpen, ende aldus suldi segghen in die belijdinge.

21

⁺Alle die wercken des Heeren sijn seer goet.

+ C

22

Door sijn woort heuet water ghestaen als eenen hoop, ende door die sprake sijns monts ghelijck ontfanghers der wateren,

23

want door sijn ghebodt wort stillicheyt, ende daer en is gheen verminderen in sijn salicheyt.

24

Die wercken van alle vleesch sijn voor hem, ende daer en is niet verborghen voor sijn ooghen.

25

Van die een eewe tot die ander eewe siet hy, ende daer en is niet wonderlijck voor sijn aensicht.

26

Daer en is niet te seggen. Wat is dit, oft wat is dat? want alle dinghen sullen te sijnen tijde verclaert worden.

27

Sijn ghebenedijdinghe sal oueruloeden als een vloet,

28

ende ghelijck den gheheelen oueruloet die drooghe eerde heel droncken ghemaect heeft, alsoo sal sijn gramscap die Heydenen die hem niet ghesocht en hebben tot een erue besitten.

29

Ghelijck hy die wateren in droochte verkeert heeft, ende die eerde is drooghe gheworden, ende sijn weghen sijn haren weghen toeghescict, alsoo sijn den sondaren struycselen in sijn gramscap.

30

Die goede dinghen sijn den goeden ghescapen van tbeghinsel, alsoo ooc den alder archsten goede ende quade dinghen.

31

⁺Tbeghinsel des dincs dat der menschen leuen nootelijc is, dats water, vier, ende yser, sout, melc, ende wittebroot, ende honich, ende die crappe des wijndruyfs, ende olie, ende cleederen.

+ D

32

Alle dese sullen den heylighen int goet, alsoo oock den ongoddelijcken ende sondaren wt quaet verkeert worden.

33

Daer sijn gheesten die ter wraken gheschapen sijn, ende in hen radende gramscap hebben sij hen tormenten sterck ghemaect.

34

Inden tijt des voleyndinghe sullen sij hen macht wt-

[p. *549]

storten, ende die rasende gramscap des gheens die se gemaect heeft sullen sij tsamen wtstorten.

35

Vier, haghel, hongher, ende doot, alle dese sijn ter wraken ghescapen,

36

der beesten tanden, ende scorpioenen, ende serpenten, ende tsweent wraeck doende ter verderffenisse ouer die ongoddelijcke.

37

Sij sullen in sijn gheboden blijdelijc eten, ende op die eerde sullen sij (alst noot is) bereydt worden, ende in haren tijden en sullen sij dwoort niet voorby gaen.

38

Daerom ben ick versterct gheweest vant beghinsel, ende ick heb my beraden, ende ick hebt ghedacht, ende ghescreuen achterghelaten.

39

Alle des Heeren wercken sijn goet, ende alle werck sal te sijnder vren dienen.

40

Daer en is niet te segghen, dits argher dan datte, want alle dinghen sullen te sijnen tijde ghepresen worden.

41

Ende nv in alle herten ende monden loeft te samen, ende ghebenedijt den naem des Heeren.