Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxviij. Capittel.

1

⁺EErt den medecijn meester om den noodt, want die alderhoochste heeft dien gheschapen,

+ A

2

want van Gode is alle medecijne, ende van eenen coninck sal hy ghiften ontfanghen.

3

Die gheleertheyt des medecijns sal sijn hooft opheffen, ende int aenschijn vanden groote personagien sal hy ghepresen worden.

4

Die alderhoochste heeft vander eerden die medecijne ghescapen, ende een wijs man en sal hem daer aff niet veruaeren.

5

En is door een hout het bitter water niet suet gheworden?

6

Totter menschen kennisse is hen cracht, ende die alderhoochste heeft den menschen die kennisse ghegheuen, om gheeert te worden in sijn wonderlijcheden.

7

Door dese sal hy ghenesende die pijne versachten, ende die apoteker sal medecijnen der sueticheyt maken, ende sal oock maken saluinghen der ghesontheyt, ende sijn wercken en sullen niet volcomen worden,

8

want die vrede Godts is op daenschijn der eerden.

9

Sone in uwer siecten soo en versmaet v seluen niet, maer bidt den Heere, ende hy sal v ghenesen.

10

Keert v van die misdaet, ende bescict te rechte v handen, ende van alle misdaet maect v herte suyuer.

11

Offert die sueticheyt ende ghedenckenisse van bloeme des meels, ende maect die offerande vet, ende gheeft den medecijn meester plaetse,

12

want die Heere heeft hem gheschapen, ende en laet dien van v niet gaen, want sijn wercken sijn nootelijck,

13

want daer is eenen tijt dat ghy in hen handen vallen sult.

14

⁺Maer sij sullen den Heere bidden dat hy haer ruste ende ghesontheyt wil bescicken om haerlieden conuersatie.

+ B

15

Soo wie misdoet voor sijn aensicht die hem ghescapen heeft, die sal vallen in des medecijn meesters handen.

16

Sone ouer eenen dooden soo stort tranen, ende als een die groot lijden lijdt soo beghint te weenen, ende na dat recht is so bedect sijn lichaem, ende en versmaet sijn begrauinghe niet.

17

Maer om die opsprake soo draecht bitterlijck sijnen rouwe eenen dach, ende vertroost v om die droefheyt wille,

18

ende maect rouwe na sijn verdienste eenen dach oft twee, om die opsprake.

[p. *548]

19

Want van droefheyt coemt haestelijck die doot, ende sij ouerdect die cracht, ende die droefheyt des herten maect crom den necke.

20

In die afleydinghe blijft die droefheyt, ende dat goet des armen is nae sijn herte.

21

En geeft v herte niet tot droefheyt maer verdrijft die van v, ende weest ghedachtich der wtersten.

22

En wiltse niet vergheten, want van daer en is gheen wederkeeren, ende ghy en sult desen dooden niet baten, ende v seluen suldi verargeren.

23

Weest ghedachtich mijns oordeels, want alsulck sal het uwe oock wesen, my ghisteren, ende v heden.

24

In des dooden ruste soo doet rusten sijn ghedenckenisse, ende vertroost hem int wtgaen van sijnen gheest.

25

⁺Scrijft die wijsheyt ten tijde van ledicheyt, ende die vermindert wordt van wercken sal wijsheyt ontfanghen, want hy sal met wijsheyt veruult worden.

+ C

26

Wie den ploech houdt, ende die glorieert int gheschutte, die metten steecyser die ossen drijft, ende verkeert in die wercken van hen, ende sijn vertellinghe is vander stieren ionghen,

27

die sal sijn herte daer toe gheuen, om die ackeruoren om te worpen ende sijn wake is in die coeyen te mesten.

28

Alsoo oock elck smet ende timmerman die den nacht als den dach ouerbringt, die met teekenen ghesneden wercken wtgroeft ende door sijn neerstighe ghestadicheyt verandert die scilderie, sijn herte sal hy gheuen tot die ghelijckenisse der scilderien, ende door sijn wakinghe sal hy dat werck volmaken.

29

Alsoo oock een yser smidt sittende by dat aenbilt, ende aenmerckende het werc des ysers. Den domp des viers sal sijn vleesch branden, ende met die hitte vander smissen ouen soo strijt hy.

30

Dat gheluyt des hamers vernieuwt sijn oore, ende teghen die gelijckenisse vanden instrument is sijn ooge.

31

Sijn herte sal hi geuen tot dat volmaken des wercs ende ende door sijn wake sal hy die onuolmaectheyt vercieren.

32

Alsoo een potbacker sittende aen sijn werck, het radt met sijnen voeten ommedraeyende die altijt in sorchuuldicheyt ghestelt is om sijn werc, ende ontellijcken vele is alle sijn werck.

33

⁺Met sijnen arm sal hy die slijmachtighe eerde een ghedaente gheuen, ende voor sijn voeten sal hy haer macht booghen.

+ D

34

Sijn herte sal hy gheuen om die plaesteringhe te veruullen, ende met sijn wake sal hy den ouen suyueren.

35

Alle dese hebben in hen handen ghehoept, ende een ieghelijck is in sijn conste wijs.

36

Sonder alle dese dinghen en sal gheen stadt opgetimmert worden.

37

Noch sij en sullen daer in niet woonen, noch in wandelen, ende tot die vergaderinghe en sullen sij niet ouerspringhen.

38

Op des rechters stoel en sullen sij niet sitten, ende ghetuyghenis des ordeels en sullen sij niet verstaen, noch sij en sullen niet openbaer maken die gheleertheyt, ende dat ordeel, ende in die parabelen en sullen sij niet gheuonden worden,

39

maer dit maecsel der werelt sullen sij vast maken, ende hen ghebedt is in dat wercken van hen conste gheuende hen ziele daer toe, ende ondersoeckende in die wet des alderhoochsten.