Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvij. Capittel.

1

⁺ALle vrint sal segghen. Ende ic heb die vrintscap versaemt, maer daer is een vrint die alleen metten naem vrint is. En is daer in niet droefheyt totter doot?

+ A

2

Maer een gheselle ende een vrint sullen tot viantscap ghekeert worden.

3

O alder archste vermetelijcheyt waer aff sijt ghy ghescapen om die eerde te bedecken met die quaetheyt, ende duer bedrieghelijcheyt van dien?

4

Een gheselle sal hem mede verblijden met sijnen vrint in ghenuechten, ende inden tijt der tribulatien sal hi v teghen sijn.

5

Een gheselle sal medelijden hebben met eenen vrint ter saken van sijnen buyc, ende teghen den viant sal hy eenen schult nemen.

6

En vergheet ws vrints niet in uwer zielen, ende en weest sijns niet ondachtich in uwe wercken.

7

En wilt gheenen raet houden met uwen sweer, ende voor die ghene die v benijden soo verberght uwen raet.

8

Alle raetsman brengt den raet wt, maer daer is een raetsman in sij seluen.

9

⁺Vanden raetsman bewaert v ziele, ende weet ierstmael wat hem nootelijck is, want hy sal oock in sijn herte dencken,

+ B

10

op dat hi by auontueren niet en steke eenen staec in die eerde, ende segghe tot v.

11

Vwen wech is goet, ende stae teghen ouer om te besien wat v ghescieden sal.

12

Met eenen ongheestelijcken man tracteert van heylicheyt, ende met eenen onrechtuerdighen man van rechtuerdicheyt, ende met een vrouwe van die dinghen die sij veruolcht, met eenen veruaerden van oorloghen, met eenen vercooper vander ouersettinghen, met eenen cooper van vercoopen, met eenen nijdighen van te dancken,

13

metten onghenadighen van ghenadicheyt, metten oneerbaren vander eerbaerheyt, met eenen acker wercman van alderande werc

14

met eenen iaerlijcken werckman van die voleyndinghe des iaers, met eenen traghen knecht van veel werckens. ⁺En aenmerct dese niet in allen raede,

+ C

15

maer met eenen heylighen man weest ghestadich, soo wien ghy kent houdende die vreese Godts,

16

wiens ziele sij ghelijck uwer zielen, ende soo wie in die duysternissen struyckelt, die en sal met v gheen medelijden hebben.

17

Ende stelt vaste met v seluen een herte van goeden rade, want ghy en hebt niet dat meer weert is dan datte.

18

Die ziele van eenen heylighen man vercondicht somtijt meer warachtighe dinghen dan seuen wachters sittende int hooghe om te aenscouwen.

19

Ende in alle dese dinghen soo biddet den alderhoochsten dat hy uwen wech inder waerheyt bescicke.

20

Voor alle wercken soo laet een warachtich woort voor v gaen, ende voor alle werck eenen vasten raet.

21

Een arch woort sal het herte veranderen, waer wt vier deelen opstaen, goet, ende quaet leuen ende die doot, ende die heerscappersse van desen is een ghestadighe tonghe.

22

Een gheleert man heefter veel gheleert, ende sijnder zielen is hy soete.

23

⁺Die bedrieghelijck spreect is hatelijck, in alle dinck sal hi bedroghen worden,

+ D

24

want vanden Heere en is hem gheen gratie ghegheuen, want van alle wijsheyt is hy bedroeft.

25

Daer is een wijs man die sijnder zielen wijs is, ende die vrucht sijns verstants is loffelijck.

26

Een wijs man onderwijst sijn volc, ende die vruchten sijns verstants sijn ghetrouwe.

27

Een wijs man sal met benedictien veruult worden, ende die hem sien, sullen hem prijsen.

28

Dleuen van eenen man is in tghetal der daghen, maer die daghen van Israhel sijn ontellijck.

29

Een wijs man int volck sal eere beeruen, ende sijnen naem sal leuende blijuen inder eewicheyt.

30

Sone in v leuen ondersoect v ziele, ende eest dat sij arch is, soo en gheeft haer gheen macht,

31

want alle dinghen en sijn alle menschen niet orbaerlijck, ende allen zielen en behaghen alle manieren niet.

32

En wilt niet begeerich sijn in alle maeltijden, noch en stort v niet wte ouer alle spijse,

33

want in veel spijsen sal siecte gheleghen sijn, ende die begheerlijcheyt sal voorts comen tot die gheel siecte.

34

Door die gulsicheyt sijnder veele ghestoruen, maer die sober is sal sijn leuen verlinghen.