Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxvi. Capittel.

1

⁺ONtfermt onser Godt van allen dinghen, ende siet op ons ende toont ons dlicht van uwe bermherticheden,

+ A

2

ende sendt u vreese wte op die Heydenen die v niet ghesocht en hebben, dat sij bekennen moghen datter gheen Godt en is dan ghi op dat sij moghen vertellen v groote daden.

3

Heft op v hant op die vreemde luyden, op dat sij v machticheyt sien moghen.

4

Want ghelijck ghy voor hen aensicht gheheylicht zijt in ons, alsoo suldi voor ons aensicht oock grootelijck ghepresen worden in hen,

5

op dat si v kennen moghen, ghelijc wi ooc ghekent hebben datter anders gheen Godt en is sonder v Heere.

6

Vernieuwt die teekenen, ende verandert die wonderlijcke daden.

7

Maect glorioos v hant, ende uwen rechten arm.

8

Verwect die hittighe gramscap, ende stort wt den torn.

9

⁺Vuert wech den wederpartijder, ende verdruct den viant.

+ B

10

Brengt haestelijc aen den tijt, ende ghedenct opt eynde, op dat si moghen vertellen wonderlijcke daden,

11

ende met die gramscap der vlammen laet verslint worden die behouden blijft, ende die v volck qualijc verdrucken, moeten die verderffenisse vinden.

12

Vernielt het hooft der princen, der vianden die segghen. Daer en is gheen ander sonder ons.

13

Vergadert alle die geslachten van Iacob, ende laetse kennen datter gheen God en is dan ghy, op dat si moghen vertellen v groote daden, ende ghy sultse beeruen alst was vanden beghinne.

14

Ontfermt ws volcs, waer ouer uwen naem aengheroepen is, ende Israel den welcken ghy gheleken hebt by uwen iersten gheboren sone.

15

Ontfermt der stadt uwer heylichmakinghen Ierusalem der stadt uwer rusten.

16

⁺Veruult Sion met uwen onsprekelijcken woorden, ende v volck met uwer glorien.

+ C

17

Gheeft ghetuyghenis want sij van tbeghinsel uwer creatueren sijn, ende verwect die ghebeden, die welcke in uwen naem ghesproken hebben die ierste propheten.

18

Gheeft loon den ghenen die v verwachten, op dat v propheten moghen ghetrouwe beuonden worden,

19

ende verhoort die ghebeden van uwen dienaren. Gheeft uwen volcke nae die ghebenedijdinghen van Aaron, ende beschict ons te rechte inden wech der rechtuerdicheyt, ende laetse weten alle die op eertrijck woonen dat ghy zijt Godt die aensiender der tijden.

20

Alle spijsen sal den buyc eten, ende deen spijse is beter dan dander spijse.

21

Die kele raect die spijse des wilts, ende een onuerstandich herte die loghenachtighe woor-

[p. *547]

den.

22

Een quaet herte sal droefheyt gheuen, ende een gheleert mensch sal die wederstaen.

23

⁺Een vrouwe sal alle man ontfangen, ende deen dochter is beter dan dander dochter.

+ D

24

Die schoonheyt der vrouwen verhuecht haers mans aensicht, ende bouen alle wellusticheyt des menschs brengt sij begeerte aen.

25

Isser een tonghe der ghenesinghen, so isser oock een der versachtinghen ende der bermherticheyt haer man en is niet ghelijck den kinderen der menschen.

26

Die een goede vrouwe besidt die beghint een besittinghe, hy heeft een helpe sijns ghelijcke, ende een columne ghelijc een ruste.

27

Waer gheenen tuyn en is, daer sal die besittinghe berooft worden, ende daer gheen vrouwe en is, daer versucht die behoeuende.

28

Wien betrout hy die gheenen nest en heeft, ende ter rusten gaende daert doncker wort, als een omghegort moordenaer verspringhende van deen stadt in dandere.