Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxv. Capittel.

1

⁺SOo wie die we tonderhoudt die vermenichfuldicht tghebedt.

+ A

2

Tis een salich sacrificie die gheboden waernemen ende scheyden van alle boosheyt,

3

ende versoeninghe doen met sacrificien ouer die onrechtuerdicheden, ende tverbidden voor die sonden is sceyden van ongerechticheden.

4

Hy sal gratie wedergheuen, die bloeme van mele offert, ende die bermherticheyt doet die offert sacrificie,

5

het is den Heere wel behaechlijcke te sceyden vander boosheyt, ende vander onrechtuerdicheyt te scheyden is bidden voor de sonden.

6

Ghy en sult voor daenschijn des Heeren niet ydel ghesien worden,

7

want alle dinghen worden om Godts ghebodt ghedaen.

8

Die offerande vanden rechtuerdighen maect den outaer vet, ende sij is eenen rueck der soeticheyt voor daenschijn des alderhoochsten.

9

⁺Dat sacrificie vanden rechtuerdighen is aenghenaem, ende sijn ghedenckenisse en sal die Heere niet vergheten.

+ B

10

Met eenen goeden moet gheeft Gode glorie, ende en vermindert die ierste gauen van uwen handen niet.

11

Maect v aensicht blijde, ende met verhueghen soo maect v thienden heylich.

12

Gheeft den alderhoochsten nae sijn ghifte, ende met een goede ooghe soo doet die vindinghe uwer handen,

13

want die Heere is vergeldende, ende seuenmael soo vele sal hy v wedergheuen.

14

En wilt gheen quade gauen offeren, want hy en sal die niet ontfanghen.

15

Ende en wilt niet aensien een onrechtuerdich sacrificie, want die Heere is die richter, ende by hem en is gheen glorie van persoon.

16

⁺Die Heere en sal gheenen persoon wt nemen teghen den armen, ende tghebedt vanden ghequetsten sal hy verhooren.

+ C

17

Hy en sal niet versmaden der weesen bidden, noch die weduwe, eest dat sij wtstort een sprake des suchtens.

18

En vallen die tranen vander weduwen niet tot op die wanghe, ende en is haer wtroepen niet teghen den ghenen diese verwect?

19

Want vander wanghen climmen sij op totten hemel, ende die Heere die verhoorder sal daer genoechte in hebben.

20

Die Godt aenbidt die sal met ghenoechten ontfanghen worden, ende sijn verbidden sal tot die wolcken ghenaken.

21

Tghebedt des gheens die hem verootmoedicht sal door die wolcken gaen, ende tot dat by coemt soo en salt niet vertroost worden, ende ten sal niet wech gaen, tot dat die alderhoochste aensiet.

22

⁺Ende die Heere en sal hem niet verre vertrecken, maer hy sal die rechtuerdighe ordeelen, ende hy sal recht doen, ende die alderstercste en sal in hen gheen patiencie hebben, op dat hy haren rugghe in stucken breke,

+ D

23

ende den Heydenen sal hy die wrake wedergheuen, tot dat hy wech neme die volheyt der houerdigher, ende den sceptre der booser in stucken breke,

24

tot dat hy den menschen loon gheue nae hen wercken, ende nae die wercken van Adam, ende nae zijn vermetelijcheyt,

25

tot dat hy ordeele het vonnisse sijns volcs, ende hi sal die rechtuerdige met sijn bermherticheit verhueghen.

26

Die bermherticheit Gods is schoone inden dach der tribulatien als een reghen wolcke inden tijt der droochten.