Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiiij. Capittel.

1

⁺IDel hope ende loghene sijn den onuerstandighen, ende die droomen verheffen der onwijse.

+ A

2

Ghelijck een die een scaduwe aengrijpt, ende den wint veruolcht, alsoo is hy die waerneemt die ghedroomde loghenen.

3

Het visioen der droomen is dit ghelijc dat voor smenschen aensicht is die ghelijckenisse van eenen anderen mensche.

4

Wat sal ghesuyuert worden van eenen onsuyueren? ende wat sal warachtich gheseyt worden van eenen loghenaer.

5

Die waerseggherie der dolinghen, ende die loghenachtighe prophetie wt der voghelen sanc, ende die droomen der quaetdoenders sijn al ydelheyt.

6

Ende ghelijc eender barender vrouwen, alsoo lijdt v herte phantasien, ten sij dat vanden alderhoochsten een besoeckinghe ghesonden worde. En gheeft v herte daer toe niet,

7

want die droomen hebbender vele doen dolen, ende sijn bedroghen gheweest die daer in hoopten.

8

Sonder loghene sal dwoort des wets volbrocht worden, dwoort ende die wijsheyt sal inden mont van eenen ghetrouwen effen ghemaect worden.

9

⁺Die niet gheproeft en is, wat weet hy? Een man die in veel dinghen ondersocht is sal veel dinghen peynsen, ende die veel gheleert heeft sal tuerstant wtlegghen.

+ B

10

Die niet ondersocht en is die kent luttel dinghen, maer die in veel dinghen gheoeffent is sal die quaetheyt vermenichfuldighen.

11

Die niet gheproeft en is hoedanighe dinghen weet hy? die bedroghen is sal veel scalcheyts hebben.

12

Ick heb veel ghesien vertellende, ende veel ghewoonten van woorden.

13

Somtijt heb ick totter doot toe in perikel gheweest ter saken van desen, ende ick ben verlost gheweest door die gratie Godts.

14

Den gheest der gheender die Godt vreesen wort ghesocht, ende int aensien van dien sal hy ghebenedijt worden,

15

want die hope van die is hen ter salicheyt, ende Godts ooghen sijn op die ghene die hem beminnen.

16

Die den Heere vreest en sal niet beuen, ende en sal niet veruaert sijn, want hy is sijn hope.

17

Salich is die ziele des gheens die Godt vreest.

18

⁺Tot wien siet hy, ende wie is sijn sterckheyt?

+ C

19

Die ooghen des Heeren sijn op den ghenen die hem vreesen, der moghenticheyts beschermer, ende een vasticheyt der cracht, een decsel teghen die hitte, ende een lommer

[p. *546]

hutte inden middach,

20

een verbidden des misdaets, ende een helpe teghen den val, verheffende die ziele, ende verlichtende die ooghen, gheuende ghesontheyt ende dleuen ende die benedijdinghe.

21

⁺Die ofterande des gheens die van onrechtuerdich goet offert is besmedt, ende die bespottinge der onrechtuerdigher en sijn niet aenghenaem.

+ D

22

Die Heere is alleen by den ghenen die hem verwachten inden wech der waerheyt, ende der rechtuerdicheyt.

23

Die ghiften der ongherechtigher en prijst die alderhoochste niet noch hy en siet op die offerande der booser niet, noch in die menichfuldicheyt haerder sacrificien en sal hy die sonden niet vergheuen.

24

Die sacrificie offert van tgoet der armen, die is ghelijck een die tkint doodt voor sijns vaders aenschouwen.

25

Tbroot der behoeuigher is dleuen der armen, diet hem met bedroch ontneemt is een bloetstortende mensch.

26

Wie tbroot wech neemt int sweet, die is ghelijck een die sijnen naesten doodt.

27

Die bloet wtstort, ende die eenen ghehuerden arbeyder bedriecht, sijn ghebroeders.

28

Een timmerende, ende een brekende, wat winnen sij meer dan arbeydt?

29

Een biddende ende een veruloeckende, wiens stemme sal Godt hooren?

30

Die ghewasschen wort om dat hy eenen dooden gheraect heeft, ende wederom dien gheraect, wat baet hem zijn wasschen?

31

Alsoo oock een mensch die vast om zijn sonden, ende die selue wederdoet, wat batet sijn verootmoedighen? wie sal sijn ghebedt verhooren?