Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxiij. Capittel.

1

⁺DEn ghenen die den Heere vreest en sullen gheen quade dinghen ontmoeten, maer in die becoringhe sal hem Godt bewaren, ende verlossen vanden quaden.

+ A

2

Die wijse en haet die gheboden ende rechtuerdicheden niet, ende hy en sal niet omghestooten worden als een schip inden stormenden wint.

3

Een verstandich mensch gelooft der wet Gods ende die wet is hem ghetrouwe.

4

Die die vraghe openbaert sal dwoort bereyden, ende alsoo ghebeden hebbende sal hy verhoort worden, ende die onderwijsinge onderhouden, ende dan sal hy antwoorden.

5

Die binnenste van eens sots herte sijn als dat rat vander kerren, ende ghelijck een draeyende asse is sijn ghedachte.

6

Als een heet bespringhende peert is, onder elcken die op hem sidt salt briescht, alsoo is een bespottende vrient.

7

Waerom gaet den eenen dach den anderen te bouen ende wederom deen licht dat ander licht, ende deen iaer dat ander iaer vander sonnen?

8

Van des Heeren wetenheyt sijn sij ghescheyden als die sonne ghemaect ende tghebodt onderhoudende was.

9

⁺Ende hy heeft die tijden verandert, ende hen feestelijcke daghen ende in die hebben sij feestdaghen gheuiert by eenen corten tijt.

+ B

10

Van dien heeft God die sommighe verheuen ende groot ghemaect, ende van dien heeft hy die sommighe ghestelt int ghetal der daghen, ende alle menschen sijn vander eerden ende vander eerden daer Adam aff ghescapen is.

11

In die menichfuldicheyt van des Heeren wijsheyt heeft hijse ghesceyden, ende hen weghen verandert.

12

Van dien heeft hy die sommighe ghebenedijt ende verheuen, ende van dien heeft hy die sommighe gheheylicht ende tot hem ghenomen, ende van dien heeft hy die sommighe vermalendijt ende vernedert, ende die ommeghekeert van hen versceydinghe.

13

Ghelijck die potaerde des potbackers soo sijn die in sijn hant, dat te sceppen ende te bescicken.

14

Alle sijn weghen sijn nae sijn bescickinghe, alsoo is die mensche in die hant vanden ghenen die hem ghemaect heeft, ende hy sal hem loonen nae sijn ordeel.

15

Teghen tquaet is tgoet ende teghen die doot is dleuen, alsoo is oock teghen eenen rechtuerdighen man die sondaer, ende alsoo aenscout alle die wercken des alderhoochsten. ⁺Twee sijn teghen twee, ende dat een teghen een.

+ C

16

Ende ick heb die alderlaetste ontwaect, ende als een crapsnijder na die wijnsnijders.

17

In die benedictie Godts heb ick ghehoopt, ende als een die wijnsnijdt heb ick die persse veruult.

18

Aensiet dat ick voor my seluen alleene niet ghearbeyt en hebbe, maer alle den ghenen die leeringhe soecken.

19

Hoort my ghy groote personagien ende alle luyden, ende ghy regeerders der vergaderinghen vaet metten ooren.

20

Vwen kinde ende vrouwe, ende broeder, ende vrint en gheeft gheen macht ouer v in uwen leuen, ende en gheeft eenen anderen v erue niet, dat v by auontueren niet en berouwe, ende biddet daerom.

21

Die wijle dat ghy noch leeft ende adem trect, soo en sal v gheen vleesch veranderen,

22

want tis beter dat v kinderen v bidden, dan dat ghy siet op uwer kinderen handen.

23

In alle uwe wercken weest ouertreflijc.

24

En gheeft gheen smette in v glorie. Inden dach van tvoleynden der daghen ws leuens, ende een tijde van uwen versceyden soo bedeylt v erffelijcheyt.

25

⁺Voeder ende een roede ende last behoort den esel toe, broot ende castijnghe ende werck den knecht.

+ D

26

Hy werct in die castijnghe, ende soect te rusten. Ontbint hem sijn handen, ende hi soect vrijcheyt.

27

Een ioc ende eenen toom booghen eenen herden neck, ende den knecht booghen ghestadighe wercken.

28

Den quaetwillighen knecht dienen pijninghe ende veteren, sendt hem te wercke dat hy niet ledich en sij,

29

want veel quaets heeft die ledicheyt gheleert,

30

stelt hem te wercke, want also betamet hem. Maer eest dat hy niet onderdanich en is, so boocht hem met veteren, maer en weest niet te veel lastich op alle vleesch maer sonder besceydenheyt en doet niet swaers.

31

Eest dat ghy eenen knecht hebt soo laet v dien wesen als v ziele, als uwen broeder soo handelt hem, want in uwer zielen bloet hebdi dien ghecreghen.

32

Eest dat ghy hem tonrechte quetst, soo sal hy hem ter vlucht keeren,

33

ende eest dat hy hem verheffende wechgaet, soo en weeti niet wien ghy soecken sult, ende in wat wech dat ghy hem soecken moecht.