Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxij. Capittel.

1

⁺HEbben sij v tot eenen regeerder ghestelt? en wilt v niet verheffen, weest onder hen ghelijck een van henlieden.

+ A

2

Hebt sorghe voor hen, ende alsoo aenmerct, ende als alle uwe sorghe voleynt is, soo sidt ter rusten,

3

op dat ghy v moecht verblijden om haren willen, ende dat ghy tot een cieraet der gratien een croone moecht ontfanghen, ende crijghen die gheweerdinge der vergaderinghen.

4

Spreect ghy ouder van gheboorten, want het betaemt v,

5

het ierste woort den ghenen die de wetenheyt bemint, ende en verbiet den sanc niet.

6

Daer gheen ghehoor en is daer en wilt gheen redene wt storten, ende en wilt v niet ontijdelijck verheffen in v wijsheyt.

7

Een carbunkel steenken int cieraet van goude, ende dat accoort des ghesancs in des wijns maeltijt.

8

⁺Ghelijck in een cierlijck maecsel des gouts dat teeken vanden smaragdus is, also is dat accoort der sanghers in blijden ende matighen wijn.

+ B

9

Hoort al swijghende, ende voor die eerbaerheyt sal v goede gratie toecomen.

10

Ionghelinc spreect in v sake nauwelijcs,

11

eest dat ghy tweemael gheuraecht wordt soo laet v antwoorde een beghin hebben.

12

In veel dinghen weest als onwetende, ende hoort al swijghende tsamen ende vraghende.

13

Int midden van grooten personagien en weest niet vermetelijck, ende daer ouders sijn en wilt niet veel spreken.

14

Voor den haghel sal den blixem gaen, ende voor die scamelheyt sal die gratie gaen, ende voor die eersaemheyt sal v goede gratie aencomen.

15

⁺Ende ter vren van op te stane soo en craut v niet, maer loopt voore ierst in v huys, ende weest daer becommert, ende speelt daer,

+ C

16

ende doet v voornemen ende niet in misdaden, noch in een hoouerdich woort.

17

Ende bouen alle dese dinghen ghebenedijt den Heere die v ghemaect heeft, ende die v versadende is van alle sijnen goeden.

18

Die den Heere vreest sal sijn leeringhe ontfanghen, ende die tot hem waken, sullen die benedictie vinden.

19

Die de wet soect sal van haer veruult worden, ende die verradelijc doet, sal daer aff verarghert worden.

20

Die den Heere vreesen sullen een rechtuerdich ordeel vinden, ende sullen die rechtuerdicheden als een licht ontsteken.

21

Een sondich mensch sal die berispinghe scouwen, ende nae sijnen wille sal hy een ghelijckenisse vinden.

22

⁺Een man des raets en sal die wetenheyt niet verworpen, een vreemde ende hoouerdighe en sal die vreese niet ontsien

+ D

23

ooc nae dat hy daer mede ghedaen heeft sonder raet ende met sijns selfs straffinghen sal hi ghestraft worden.

24

Kint en doet niet sonder raet, ende ten sal v na dat ghedaen is niet berouwen.

25

Inden wech des vals en gaet

[p. *545]

niet, ende ghi en sult v niet stooten teghen die steenen, noch en betrout v niet den arbeydelijcken wech, dat ghy uwer zielen gheen verarghernisse en stelt.

26

Ende van uwen kinderen wacht v, ende van uwen huysghenooten siet toe.

27

In alle v werck soo ghelooft, wten ghelooue uwer zielen, want dat is die bewaringhe van die gheboden.

28

Die Gode ghelooft neemt die gheboden waer, ende die in hem betrouwt en sal niet vermindert worden.