Den gheheelen Bybel, Inhoudende het oude ende nieuwe Testament (Leuvense bijbel 1548)

1

Dat ghebedt Iesu des soens Sirach.

Dat .li. Capittel.

⁺ICk sal v belijden Heere coninc, ende ick sal v mijnen salichmakere tsamen louen.

+ A

2

Ick sal uwen naem belijden, want ghy sijt my een helper ende een bescermer gheworden.

3

Ende ghy hebt mijn lichaem verlost van die verderffenisse, vanden strick der quader tonghen, ende vanden lippen der gheender die loghenen wercken, ende voer daenschijn der gheender die daer by stonden sijt ghy my een helper gheworden.

4

Ende ghy hebt my verlost nae die menichte van die bermherticheyt ws naems, van die briesschende die bereydt waren om te eten,

5

van die handen der gheender die mijn ziele sochten, ende van die poorten der tribulacien die my omringhet hebben,

6

ende van dat verdrucken der vlammen die my omuanghen heeft, ende int midden des viers en ben ick niet verbrant gheweest.

7

Wt die diepte van den buyck der hellen, ende van die besmette tonghe, ende van die loghentale, vanden boosen coninck, ende van die onrechtuerdighe tonghe.

8

Mijn ziele sal totter doot toe den Heere louen,

9

ende mijn leuen was nakende ter hellen nederwaerts.

10

Sy hebben my van allen sijden omringhelt, ende daer en was niemant die my mocht helpen. ⁺Ich sach na die helpe der menschen, ende daer en was gheen.

+ B

11

Ick heb ghedachtich gheweest uwer bermherticheyt Heere, ende uwer medewerkinghe die van tbeghinsel der werelt sijn,

12

want ghy Heere verlost die ghene die v verdraghen ende ghy verlostse van die handen der Heydenen.

13

Ghy hebt op die eerde mijn wooninghe verheuen, ende voer die affvloedende doot heb ic ghebeden.

14

Ick heb aengheroepen mijnen Heere mijns Heeren vader, dat hy my niet verlaten en soude inden dach mijnder tribulacien, ende inden tijt der hoouerdigher sonder helpe.

15

Ick sal uwen naem altijt louen ende dien tsamen prijsen in die belijdinghe, ende mijn ghebedt is verhoort.

16

Ende ghi hebt my verlost van die verderffenisse, ende hebt my wtghetrocken wt den quaden tijt.

17

Daer om sal ick v belijden ende loffsegghen, ende ick sal ghebenedijden den naem des Heeren.

18

Als ick noch iongher was, eer ick verdoelde soe heb ick die wijsheyt ghesocht openbaerlijck in mijn ghebedt.

19

Voer den tijt badt ick om die, ende totten laetsten sal ick haer soecken, ⁺ende sij sal bloeyen als eenen vroech rijpenden druyff.

+ C

20

Mijn herte heeft hem verblijt in haer, mijnen voet heeft ghewandelt den rechten wech. Van mijnder ioncheyt heb ic haer ondersocht.

21

Ic heb een luttel mijn oore ghneycht, ende hebbe die ontfanghen.

22

Veel wijsheyts heb ick in my seluen gheuonden, ende ick heb daer in veel toeghenomen.

23

Die my wijsheyt gheeft, dien sal ic glorie gheuen.

24

Want ic heb my beraden dat ick die doen soude, ick heb dat goet vierichlijck bemint, ende ick en sal niet bescaemt worden.

25

Mijn ziele heeft tsamen met haer gheworstelt, ende in haer te doen ben ick ghevesticht.

26

Mijn handen heb ick om hooghe opghehauen, ende doer haer wijsheyt heeft mijn ziele licht ghegheuen, ende sij heeft mijn onwetentheden verlicht.

27

Mijn ziele heb ick tot haer ghescict, ende in die kennisse heb icse gheuonden.

28

⁺Ic heb met haer therte beseten vanden iersten, daer om en sal ick niet verlaten worden.

+ D

29

Mijnen buyck is ontstelt haer sueckende, daer om sal ick een goede besittinghe besitten.

30

Want die Heere heeft my die tonghe ghegheuen tot mijnen loon, ende daer mede sal ick den Heere louen.

31

Coemt by my ghy ongheleerde ende vergadert v int huys der leeringhen.

32

Waer om verbeyt ghy noch? ende wat segdi hier toe? V zielen dorstighen seer crachtelijck.

33

Ick heb mijnen mont open ghedaen, ende heb ghesproken. Coopt voer v sonder ghelt,

34

ende worpt uwen hals onder dat iock, ende laet v ziele onderwijsinghe ontfanghen, want sij is na by om te vinden.

35

Siet met uwen ooghen dat ick luttel ghearbeyt hebbe, ende heb veel rusten voer my gheuonden.

36

Neemt aen die onderwijsinghe met een groot ghetal siluers, ende ouervloedich gout besidt in haer.

37

Laet v ziele blijde wesen in haer bermherticheyt, ende ghy en sult niet bescaemt worden in haren lof.

38

Werct v werck voer den tijt, ende sij sal uwen loon gheuen te sijnen tijde.

Hier eyndet dat boeck Ecclesiasticus.