Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺DIe ghewroken wilt sijn, sal wrake vinden vanden Heere, ende die sonden van dien sal hy houdende houden.

+ A

2

Vergheeft uwen naesten die v hinder doet, ende dan sullen v (als ghy bidt) die sonden ooc vergheuen worden.

3

Een mensch hout teghen den anderen gramschap, ende soect hy vanden Heere remedie?

4

Op eenen mensch sijns ghelijck en heeft hy gheen bermherticheyt, ende bidt hy voor sijn sonden?

5

Hy die vleesch is houdt gramscap, ende begheert hy verghiffenisse van God? wie sal voor sijn misdaden bidden?

6

Ghedenct der wtersten, ende laet af van viantschap te draghen,

7

want verdwijninghe ende die doot sijn aenstaende in sijn gheboden.

8

Ghedenct der vreesen Godts, ende en weest niet gram op uwen naesten.

9

⁺Ghedenct des verbonts vanden alderhoochsten, ende en acht die onwetenheyt ws naesten niet.

+ B

10

Wacht v van kijuagien, ende soo suldi die sonden minderen,

11

want een grammoedich mensch verwect kijuagie, ende een sondich mensch sal vrinden verstooren ende int midden der gheender die vrede hebben sal hy viantscap inbrenghen,

12

want nae die houten des boschs alsoo ontsteket vier, ende na eens menschen cracht, soo sal sijn gramscap wesen, ende nae sijnen rijckdom sal hi sijnen torn verheffen.

13

Eenen haestighen strijdt ontsteect dat vier, ende een haestich ghekijf stort dat bloet ende een ghetuyghende tonghe sal die doot aenbrenghen.

14

Eest dat ghy blaest, soo sal die als een vier bernen, ende eest dat ghi daer op spouwet, soo salse wtghebluscht worden, beyde dese comen wten mont.

15

Een oorblaser ende wie dobbel van tongen is die si vermalendijt, want hy heefter veel verstoort die vrede hadden,

16

die derde tonghe heefter veel beroert, ⁺ende heeftse verstroyt van volcke te volcke,

+ C

17

si heeft bemuerde steden der rijcker bedoruen, ende huysen van groote machtighe lieden heeft sij ondergrauen.

18

Sij heeft der volcken crachten in stucken ghebroken, ende stercke natien van lieden heeft sij verstroeyt.

19

Die derde tonghe heeft manlijcke vrouwen veriaecht, ende heeftse berooft van haren arbeyden,

20

soo wie haer aensiet die en sal gheen ruste hebben, noch hy en sal gheenen vrint hebben daer hy in ruste.

21

Den slach der gheesselen maect een strame, maer den slach der tonghen sal die beenderen in stucken breken.

22

Veel isser gheuallen metten scerpen des sweerts, maer soo veel niet als die gheuallen sijn door hen tonghe.

23

Salich is hi die bescermt is van een quade tonghe, die in haer gramscap niet ouer ghegaen en is, ende die aen haer iock niet ghetrocken en heeft, ende met haren banden niet en heeft ghebonden gheweest

24

want haer iock is een yseren iock, ende haren bant is eenen metalen bant.

25

⁺Haer doodt is dalder archste doot, ende beter is die helle dan si.

+ D

26

Haer volherdicheyt en sal niet blijuen, maer sij sal vercrijghen die weghen der onrechtuerdigher, ende met haerder vlammen en sal sij die rechtuerdige niet verbranden.

27

So wie Godt verlaten die sullen in haer vallen, ende si sal daer in seer bernen, ende niet wtghebluscht worden, ende si sal in die ghesonden worden als eenen leew, ende ghelijc eenen lupaert salse hen quetsen.

28

Beheymt v ooren met dornen, ende en wilt niet hooren een arghe tonghe, ende maect uwen monde doeren, ende sloten uwen ooren.

29

D gout ende silver smilt, ende maect uwen woorde een waghe, ende rechte toomen uwen monde,

30

ende wacht dat ghy by auontueren niet en valt door v tonge, ende dat ghi niet en valt voor daenscijn der vianden die v lagen legghen, ende uwen val ongheneselijck sij totter doot.