Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capittel.

1

⁺OM der armoeden wille hebben veel menschen misdaen, ende soo wie soect rijck te worden die keert sijn ooghe aff,

+ A

2

ghelijck int midden van een tsamen voeghinghe der steenen eenen stijl vast ghemaect wort, alsoo sal die int midden van coopen ende vercoopen met sonden benaut worden.

3

Die misdaet sal te samen metten misdadighen vernielt worden.

4

Eest dat ghy v inder vreesen des Heeren niet neerstelijc en houdt, soo sal v huys haestelijc omgheworpen worden.

5

Ghelijck int schudden van eenen teemst het stof sal blijuen, alsoo blijft ooc die onsuyverheyt des menschen in sijn ghedachte.

6

Het forneys proeft die vaten des potbackers, ende die becoringhe

[p. *542]

der tribulatien proeft die rechtuerdighe menschen.

7

Ghelijck die oeffeninghe van eenen boom sijn vrucht toont, alsoo doet een woort wt dat ghepeys van eens menschen herte.

8

Voor die sprake soo en prijst gheenen man, want dat is des menschen proeuinghe.

9

⁺Eest dat ghy die rechtuerdicheyt soect soo suldy die aengrijpen, ende ghy sultse aendoen als een lanc cleedt der eeren, ende ghy sult met haer inwoonen, ende sij sal v beschermen inder eewicheyt, ende inden dach der kennissen suldy vasticheyt vinden.

+ B

10

Die voghelen verghaderen tot haers ghelijcke, ende die waerheyt sal wederkeeren tot die ghene diese wercken.

11

Eenen leew leydt altijt laghen ter iacht, alsoo doen ooc die sonden den ghenen die boosheyt doen.

12

Een heylich mensch blijft in die wijsheyt als die sonne, want een sot woort verandert ghelijck die mane.

13

Int midden der onuerstandigher bewaert het woort tot sijnder tijt, maer int midden der verstandigher wilt daghelijcs sijn.

14

Die vertellinghe der sondaren is hatelijck, ende hen lachen is in die misdaden der sonden.

15

Een veel sweerende sprake, sal oprichtinghen des hairs vanden hoofde maken, ende die ongheureestheyt van die, is een stoppinghe der ooren.

16

⁺Int ghekijf der hoouerdigher is bloetstortinghe, ende hen veruloecken is swaer om hooren.

+ C

17

Die des vrints verholentheden ontdect verliest sijn ghelooue, ende hy en sal gheenen vrint vinden nae sijnen sin.

18

Bemint uwen naesten, ende vereenicht v door ghetrouwicheyt met hem,

19

want eest dat ghy sijn secrete saken ontdect, soo en volght niet meer naer hem.

20

Want ghelijck een mensch die sijnen vrint verliest, alsoo is hy oock die sijns naesten vrintscap verliest.

21

Ende ghelijck die eenen voghel wt sijn hant latet vlieghen, alsoo hebdy uwen naesten verlaten, ende ghi en sult hem niet vanghen,

22

en volcht hem niet want hy is verre wech, want hy is v ontuloden als een capret wten stricke, want sijn ziele is ghewont,

23

voorts en suldy hem niet connen tsamen binden, ende van een quaet woort machmen peys maken,

24

maer te ontdecken des vrints verborghentheden dats een mishopen der onsaligher zielen.

25

Wie metter oogen winct, die bedenct quade dinghen ende niemant en sal hem verworpen,

26

voor daenschijn uwer ooghen sal hy sijnen mont soet maken, ende van uwen redenen sal hy hem verwonderen. ⁺Maer ten lesten sal hy sijnen mont verkeeren, ende in v woorden sal hy een verarghernisse gheuen.

+ D

27

Veel dinghen heb ick ghehoort, ende ick en heb die sijns ghelijck niet gherekent, ende die Heere sal dien haten.

28

Die eenen steen om hooghe worpt, die sal op sijn hooft vallen, ende eenen bedrieghelijcken slach eens bedrieghers, sal die wonden scheyden.

29

Ende wie die eenen cuyl graeft, die sal daer inne vallen, ende wie sijnen naesten eenen steen stelt die sal hem daer teghen stooten, ende wie eenen anderen eenen strick leyt die sal daer door vergaen.

30

Soo wie eenen seer quaden taet doet, op dien sal dien wederkeeren, ende hy en sal niet weten van waer hem dat comen sal.

31

Bespottinghe ende verwijt behoort den hoouerdighen toe, ende die wrake sal hem als eenen leew laghen legghen.

32

Met den stricke sullen sij vergaen, die ghenoechte hebben inden val der rechtuerdigher, ende die smerte salse verteren eer sij steruen sullen.

33

Gramschap ende rasende verbolghentheyt sijn beyde grouwelijck, ende een sondich man salse aen hem hebben.