Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺DEr goeder vrouwen man is salich, want tghetal haerder iaren is dobbel.

+ A

2

Een stercke vrouwe verlusticht haren man, ende die iaren sijns leuens sal sij met vrede veruullen.

3

Een goet deel is een goede vrouwe, in een goet deel der gheender die Godt vreesen sal sij eenen man ghegheuen worden voor goede wercken.

4

Maer die rijcke ende die arme hebben een goet herte, tot allen tijden is hen aensicht vrolijck.

5

Van drij dinghen heeft mijn herte gheureest, ende in tvierde vergrouwelt hem mijn aensicht.

6

Die verraderie van eender stadt, ende den oploop des volcs,

7

ende valsche besculdinghe, dese sijn al swaerder dan die doodt.

8

⁺Een ialoursse vrouwe is wee des herten ende bedroeftheyt.

+ B

9

In een ialoursse vrouwe is een gheessel der tonghen, met allen menschen ghemeynscap houdende.

10

Ghelijc een iock der ossen dat gheruert wort, alsoo is een arghe vrouwe, wie haer houdt, die is ghelijc die een scorpioen aengrijpt.

11

Een vrouwe die een dronckersse is, is een groote gramscap ende versmaetheyt, ende haer leelijcheyt en sal niet bedect worden.

12

Der vrouwen oncuyscheyt sal in dat opheffen haerder ooghen ende in haer wijmbrauwen ghekent worden.

13

Op een dochter die haer niet af en keert stelt vaste bewaringhe, op dat sij oorsaeck vindende haer seluen niet en misbruycke.

14

Van alle onscamelheyt der ooghen wacht v, ende en verwondert v niet eest dat sij v niet en achtet,

15

want ghelijc een dorstich wandelaer sal sij totter fonteynen haren mont open doen, ⁺ende van alle naeste wateren drincken, ende teghen alle staken sitten, ende teghen alle pijlen sal sij haren pijlkoker open doen tot dat sij ontbreke.

+ C

16

Die gratie van een neerstige vrouwe sal haren man verlustighen, ende haer gheleertheyt sal sijn ghebeente vet maken.

17

Een gaue Gods

18

is verstandige ende swijgende vrouwe, ende daer en is gheen wisselinghe teghen een gheleerde ziele.

19

Een gratie bouen gratie is een heylighe ende schamel vrouwe.

20

Ende gheen ghewichte en is te weerderen teghen een cuyssche ziele.

21

Ghelijck die sonne der werelt opgaende in Godts alderhoochste, alsoo is eender goeder vrouwen schoonheyt tot een cieraet haers huys.

22

Een lichtende lampe opden heylighen candelaer, ⁺ende die schoonheyt des aensichts op eenen stantachtighen ouderdom.

+ D

23

Gulden columnen op silveren basementen, ende vaste voeten op die planten van een stantaftighe vrouwe.

24

Eewighe fundamenten op eenen vaste steen, ende die gheboden Godts int herte van een heylighe vrouwe.

25

In twee dinghen is mijn herte bedroeft, ende int derde is mi groote gramscap ouercomen.

26

Een orloochs man vergaende van armoede ende een verstandich man die versmaet wort,

27

ende die ouertreet van die rechtuerdicheyt totter sonden, Godt heeft dien bereydt totten sweerde.

28

Twee manieren hebben my swaer ende sorghelijck ghescenen. Een die comenscap doet wert nauwelijcs vrij van versuemenisse, ende een tauernier en sal niet gherechtuerdicht worden van die sonden der lippen.