Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxv. Capittel.

1

⁺IN drij dinghen heeft mijnen gheest behaghen ghehadt, die ghepresen sijn voor Godt ende voor die menschen.

+ A

2

Die eendrachticheyt der broederen, ende die liefde der naesten, ende man ende vrouwe met malcanderen wel ouerdraghende.

3

Drij besonder dinghen heeft mijn ziele ghehaet, ende ick worde seer beswaert haerder ziele.

4

Eenen

[p. *541]

houerdighen armen, ende eenen loghenachtighen rijcken, ende eenen dwasen ende onuerstandighen ouden mensch.

5

Dat ghy in v ioncheyt niet verghadert en hebt, hoe suldi dat in v outheyt vinden?

6

Hoe schoon staet het ordeel den grijsen hayre, ende den ouderen te kennen den raet?

7

Hoe schoon staet den seer ouden die wijsheyt, ende hoe glorioes is dat verstant ende den raet?

8

Die croone der ouderen is veel wijsheyts, ende hen glorie is die vreese Gods.

9

Neghen onvermoedelijcke dinghen des herten heb ic groot gheacht, ende het thiende sal ic metter tongen den menschen wtspreken.

10

⁺Een mensche die hem verblijt in sijn kinderen leuende, ende siende die verderffenisse sijnder vianden.

+ B

11

Salich is hi die met een verstandighe vrouwe woont, ende die door sijn tonghe niet gheuallen en is, ende die niet ghedient en heeft den ghenen die sijns onweerdich sijn.

12

Salich is hy die eenen warachtighen vrient gheuonden heeft, ende die de rechtuerdicheyt vertelt der hooorender ooren.

13

Hoe groot is hy die wijsheyt ende wetenheyt vonden heeft, maer daer en is niemant bouen den godvreesende,

14

die vreese Gods heeft haer seluen bouen alle dinghen ghestelt.

15

Salich is die mensch den welcken ghegheuen is te hebben die vreese Godts, die dese heeft by wien sal hy gheleken worden?

16

Die vreese Godts is tbeghinsel van sijnder liefden. maer het beghinsel des gheloofs moet daer aen ghecleeft worden.

17

Des herten droefheyt is alle plaghe, ende der vrouwen archeyt is alle quaetheyt.

18

⁺Ende hy sal alle plaghe voor niet aensien tseghen die plaghe des herten,

+ C

19

ende alle archeyt voor niet, tseghen die archeyt der vrouwen,

20

ende alle verdruckinghen voor niet, teghen die verdruckinghe der hatender,

21

ende alle wrake voor niet, tseghen die wrake der vianden.

22

Daer en is gheen argher hooft dan thooft vander slanghen,

23

ende daer en is gheen gramscap bouen die gramscap der vrouwen. Te woonen met eenen leew oft eenen draeck sal meer belieuen, dan te woonen met een arghe vrouwe.

24

Die archeyt der vrouwen verandert haer aensicht, ende hy sal haer aensicht verblinden als eenen beyr, ende ghelijc eenen sack sal sij dat toonen int midden van haren naesten

25

Haer man heeft swaerlijc versucht, ende si dat hoorende heeft een weynich versucht.

26

Alle quaetheyt is cleyn tegen der vrouwen quaetheyt, dat lot der sondaren moet op haer vallen.

27

⁺Ghelijck eenen sandighen opganck den voeten van eenen ouden man, soo is een clapachtighe vrouwe eenen gherusten man.

+ D

28

En siet niet aen der vrouwen schoonheyt, noch en begheert gheen vrouwe om haer schoonheyt.

29

Eender vrouwen gramscap ende oneerlijcheyt ende bescaemtheyt is groot.

30

Een vrouwe eest dat sij heerscappie heeft, is haren man teghen.

31

Een ootmoedich herte, ende een droef aensicht ende een plaghe der doot is een arghe vrouwe.

32

Crancke handen ende slappe knyen is een vrouwe die haren man niet en prijst.

33

Van die vrouwe is tbeghinsel der sonden ghecomen, ende door die steruen wi allegader.

34

En gheeft uwen water gheenen wtganck, ooc niet weynich, nocht eender argher vrouwen oorlof int openbaer te comen.

35

Eest dat sij nae v hant niet en wandelt, soo sal sij v bescamen voor daenschijn uwer vianden.

36

Snijdtse af van uwen vleessche, dat sij v altijts niet en misbruycke.