Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺DIe wijsheyt sal haer ziele louen, ende in Gode sal sij gheeert worden, ende int midden haers volcs sal sij glorieeren.

+ A

2

In die vergaderinghen des alderhoochsten sal sij haren mont open doen, ende int aenschouwen van sijnder macht sal sij glorieeren

3

ende int midden haers volcs sal sij verheuen worden, ende in die heylighe volheyt sal sij verwondert worden,

4

ende in die menichte der wtuercorenen sal sij lof hebben, ende onder die ghebenedijde sal sij ghebenedijt worden, seggende.

5

Ick ben wt den mont des alderhoochsten voorts comen, dierste gheborene voor alle creatueren.

6

Ick heb ghemaect in die hemelen datter soude opgaen een onuerganckelijc licht, ende ghelijck eenen neuele heb ick alle die eerde bedect.

7

Ick heb in die alderhoochste ghewoont ende mijnen throon is in die columne der wolcken.

8

Den omganc des hemels heb ick alleen omghegaen, ende die diepte des afgronts heb ick doorgaen, ende in die baren der zee heb ick ghewandelt,

9

ende op alle het eertrijc ghestaen. Ende in allen volcke

10

ende in alle luyden heb ick heerscappie ghehadt,

11

ende alle der hoogher ende leegher herten heb ick metter macht vertreden, ende in alle dese heb ick ruste ghesocht, ende in die erffenisse des Heeren sal ic woonen.

12

⁺Doen heeft my beuolen ende gheseyt die scepper van allen dinghen, ende die my gheschapen heeft, die heeft gherust in mijn tabernakele

+ B

13

ende heeft my gheseyt. Woont in Iacob, ende in Israel neemt v erffenisse, ende in mijn wtuercorenen schiet wortelen.

14

Van den beghinne ende voor die tijden ben ick ghescapen, ende tot die toecomende werelt en sal ick niet ophouden, ende in die heylighe wooninghe heb ic voor hem ghedient.

15

Ende alsoo ben ick in Sion gheuesticht, ende in die gheheylichde stadt heb desghelijcs gherust, ende in Ierusalem is mijn macht.

16

Ende ick ben ghewortelt in dat eerlijck volck, ende in die deelen mijns Gods is die erffenisse van dien, ende in die volheyt der heylighen is mijn onthoudinghe.

17

Als eenen cederboom ben ic opghehauen in Libano, ende als een cipressenboom opden berch Sion,

18

ghelijck eenen palmboom ben ic verhauen in Cades, ende als een plantinghe der roosen in Iericho.

19

Ghelijck eenen schoonen olijfboom in die velden, ende ghelijck eenen ahorenboom ben ick verhauen by dwater in die straten.

20

Ghelijck caneel ende balseme welriekende heb ick ruec ghegheuen, ghelijck wtghecoren myrrhe heb ick sueticheyt des ruecs ghegheuen,

21

ende als storax, ende galbanus, ende vngula, ende gutta, ende ghelijck den onghesneden Libanus heb ick mijn wooninge bewasemt, ende ghelijc ongemengde balseme is mijnen rueck.

22

Ick heb als eenen therebitijn boom mijn tacken wtghestrect, ende mijn tacken sijn der eeren ende der gratien.

23

⁺Ick heb als eenen wijnstruyck vrucht voortbracht, soeticheyt des ruecs, ende mijn bloemen sijn vruchten der eeren ende der eerlijcheyt.

+ C

24

Ick ben een moeder der schoonder liefden, ende der vreesen, ende der kennissen, ende der heyligher hopen.

25

In my is alle gratie des leuens ende der waerheyt, in my is alle hope des leuens ende der duecht.

26

Coemt door tot my alle die my begheert, ende wort veruult van mijnen gheslachten,

27

want mijnen gheest is bouen honich suete, ende mijn erffenisse is bouen honich ende honichraten.

28

Mijn ghedenckenisse is int gheslachte der eewigher tijden.

29

Die my eten, sullen noch hongher hebben, ende die my drincken sullen noch dorstich sijn.

30

Die mi hoort en sal niet bescaemt worden, ende die in my wercken en sullen niet sondighen.

31

Die my verclaren, sullen dat eewich leuen hebben.

32

Alle dese woorden sijn den boec des leuens, ende dat testament des alderhoochsten, ende die kennisse der waerheyt.

33

Die wet heeft Moyses beuolen in die gheboden der rechtuerdicheden, ende die erffenisse den huyse van Iacob, ende die beloften Israels.

34

Hy heeft Dauid sijnen knecht ghesedt te verwecken wt hem eenen alderstercsten coninck, ende inden throon der eeren sittende inder eewicheyt.

35

Die veruult als Phison die wijsheyt, ende ghelijck tygris in die daghen der nieuwer vruchten.

36

Die tverstant veruult ghelijc Euphrates, die vermenichfuldicht wordt als die Iordane ten tijde vanden oochst.

37

⁺Die donderwijsinghe wtsendt als een licht, ende by staende als Gehon inden dach der wijnsnijdinghen.

+ D

38

Die dierste volbrenght haer te kennen, ende een crancker en salse niet ondersoecken.

39

Want vander zee sal sijn ghepeys oueruloeden, ende sijnen raet inden grooten afgront.

40

Ick wijsheyt heb vloeden wtghestort,

41

ende ghelijck een wtgheleydde voore des onmetelijcken waters vanden vloet, ick ben als den vloet dorix, ende ghelijck eenen waterloop ben ick ghegaen wt dat paradijs.

42

Ick heb gheseyt, ick sal veruersschen mijnen hof der plantinghen, ende ick sal droncken maken die vrucht mijnder gheboorten.

43

Ende siet die wateruore is my oueruloedich gheworden, ende mijn riuiere ghenaecte totter zee toe,

44

want ic maeck elcken mijn leeringhen claer ghelijck den dagheraet, ende ick sal die vertellen tot verre toe.

45

Ick sal doorghaen alle die onderste deelen der eerden, ende ick sal aensien alle die slapende, ende ick sal verlichten alle die inden Heere hopen.

46

Noch sal ick die leeringhe ghelijck een prophetie wtstorten, ende ick sal die laten den ghenen die wijsheyt soecken, ende ick en sal niet ophouden in hen gheslachten tot in die heylighe eewicheyt.

47

Siet dat ick voor my alleen niet ghearbeyt en hebbe, maer allen den ghenen die de waerheyt soecken.