Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺HEere vader ende heerscapper mijn leuens en wilt my niet verlaten in haren raet, noch en laet my niet vallen in dat verwijt.

+ A

2

Wie mocht die gheeselen in mijn ghedachten oplegghen ende in mijn herte die leeringhe der wijsheyt, dat sij my niet en sparen in haer onwetentheden, ende dat hen misdaden niet openbaer en worden,

3

ende dat mijn onwetentheden niet vermeerdert en worden, ende mijn misdaden vermenichfuldicht, ende mijn sonden ouervloedich, ende dat ick valle in daenschouwen mijnder vianden, ende dat hem mijn viant verblijden?

4

Heere Vader ende Godt mijns leuens, ende verlaet my in hen ghedachte niet.

5

En gheeft my niet die opghehauenheyt mijnder ooghen ende alle begheerlijcheyt keert van my.

6

Neemt my aff die begheerlijcheyt des buycs, ende en laet die begheerlijcheyt des bijslapens my niet beuanghen, ende en leuert my niet eender ombevreesder, ende onscamelder zielen.

7

Kinderen hoort die leeringhe des monts, ende soo wie die bewaert en sal niet vergaen doer sijn lippen, noch hy en sal niet verarghert worden in die alderquaetste wercken.

8

In zijn ydelheyt wort een sondaer beuanghen, ende een houerdighe, ende een quaetspreker sullen daer doer verarghert worden.

9

En ghewent uwen mont niet tot sweren, want daer sijn veel vallen in gheleghen.

10

Maer dat noemen Godts en sij niet ghestadelijck veel in uwen mont, ⁺ende en mengt v niet met die namen der heylighen, want ghy en sult daer aff niet onsculdich wesen.

+ B

11

Want ghelijck een knecht die daghelijcs met slaghen gheexamineert wort, niet vermindert en wort van stramen, alsoo en sal gheen sweerder, ende noemende gheheelijck van sonden ghesuyuert worden.

12

Een man die veel sweert sal veruult worden met boosheden, ende die plaghe en sal van sijnen huyse niet wech gaen.

13

Ende eest dat hy misdoet, soo sal sijn misdaet op hem zijn, ende eest dat hy dat niet aenmercken en wilt, soo misdoet hy tweeuoudelijck,

14

ende eest dat hy ydelijck sweert, soo en sal hy niet gherechtuerdicht worden, want sijn huys sal veruult worden met vergheldinge.

15

Daer es noch een ander sprake contrarie der doot, en laet die niet gheuonden worden in die erffenisse van Iacob.

16

Want van den bermhertighen sullen alle dese affghenomen worden, ende in die misdaden en sullen sij niet ghewentelt worden.

17

Tot onghemanierde sprake soo en ghewenne hem uwen mont niet, want daer in es een woert der sonden.

18

Ghedenct ws vaders ende moeders, want ghy staet int midden der grooter van state

19

dat by auontueren Godt ws niet en verghete in hen aensicht, ende dat ghy doer een ghewoonte verdwaest zijnde verwijt lijdt, ende lieuer haddet niet gheboren te zijne, ende vermalendijdet den dach uwer gheboerten.

20

⁺Een mensch die ghewent es tot smadelijcke woerden, die en sal in alle zijn daghen niet onderwesen worden.

+ C

21

Twee aerden sijn ouervloedich van sonden, ende den derden brengt gramscap aen, ende verdoemenisse.

22

Een heete ziele ghelijck een berrende vier en sal niet wtghebluscht worden voer datse wat verslint heeft,

23

ende een arch mensche en sal niet op houden metten mont zijns vleeschs tot dat hy tvier ontsteken heeft.

24

Eenen oncuysschen mensche es alle broot soete, hy en sal niet vermoeyt worden ouertredende totten eynde toe.

25

Alle man, die sijn bedde ouertreedt versmadende teghen zijn ziele, ende segghende. Wie siet my?

26

die duysternissen omuanghen my, ende die wanden bedecken my, ende niemant van rontomme en besiet my, wien ontsie ick? mijnder misdaden en sal die alderhoochste niet ghedachtich wesen.

27

Ende hy en verstaet niet dat sijn ooghe alle dinghen siet, want sulcke vreese des menschen verdrijft van hem die vreese Godts, ende die ooghen der menschen hem vreesende,

28

ende hy en heeft niet bekent, hoe dat die ooghen des Heeren claerder zijn dan die sonne, alomme siende alle der menschen weghen ende die diepte des affgronts, ende der menschen herten doersiende in die verborghen deelen.

29

Want den Heere Godt sijn alle dinghen (eer sij ghescapen waren) bekent gheweest, alsoo oock nae dat die volmaect sijn, soo siet hy alle dinghen,

30

⁺dese sal in die straten der stadt ghewroken worden, ende als eens

+ D

[p. *540]

peerts vuelen sal hy gheiaecht worden, ende daer hy niet vermoeyt en hadde, daer sal hi gheuanghen worden.

31

Ende hy sal voor allen menschen ter scanden wesen, om dat hy niet verstaen en heeft die vreese des Heeren.

32

Alsoo is ooc alle vrouwe haren man verlatende, ende stellende eenen erfghenaem wt eenen vreemden houwelijck,

33

want ten iersten soo heeft sij ongheloouich gbeweest in die wet des alderhoochsten, ende ten tweeden heeftse haren man verlaten, ten derden heeft sij in ouerspel oncuyscheyt bedreuen, ende van eenen anderen man heeft sij tot haren behoef kinderen voortghebracht.

34

Dese sal in die vergaderinghe ghebracht worden, ende in haer kinderen sal ondersoeck ghedaen worden.

35

Haer kinderen en sullen gheen wortelen schieten, ende haer tacken en sullen gheen vrucht gheuen,

36

sij sal tot een vermaledijdinghe haer ghedenckenisse achterlaten, ende haer scande en sal niet vergaen.

37

Ende die daer ouer ghebleuen sijn, sullen bekennen datter niet beter en is dan die vreese Godts, ende niet sueter van te sien in die gheboden des Heeren.

38

Tis een groote glorie den Heere volghen, want die lancheyt der daghen sal van hem aenghenomen worden.