Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺SOne hebdi ghesondicht? soe en doet der niet weder toe, maer bidt ooc voer die voerleden sonden datse v vergeuen moghen worden.

+ A

2

Als van daensicht van eender slanghen soe vliet die sonden, ende eest dat ghy tot die coemt, soe sullen sij v ontfanghen.

3

Der leuwen tanden sijn haer tanden, doodende die zielen der menschen.

4

Als een sweert op beyde sijden scerp is alle boosheyt, haer quetsuere en heeft gheen ghesontheyt.

5

Die bekijuinghe ende onrechten sullen tgoet te niet brenghen, ende een huys dat veel te rijck is, sal te niet comen doer houerdie, alsoo salt goet vanden hoouerdighen wtghewortelt worden.

6

Dat bidden vanden armen sal van den mont te sijnen ooren comen, ende het ordeel sal hem haestelijck aencomen.

7

Die de berispinghe haet die is eenen voetstap des sondaers, ende die Gode vreest sal bekeert worden tot sijn herte.

8

Een die machtich is, die is van verre bekent doer een stoute tonghe, ende een verstandich mensch weet dat hy valt van sij seluen.

9

⁺Die sijn huys timmert met ander lieden costen, die is ghelijck een die sijn steenen vergadert inden winter.

+ B

10

Groff vlas vergadert is die vergaderinghe der sondaren, ende hen voleynden is een vlamme viers.

11

Den wech der sondaren is al besedt, met steenen, ende ten eynde van die sijn die helle, ende duysternissen, ende pijnen.

12

Wie die rechtuerdicheyt bewaert die sal haren sin behouden.

13

Die volcomenheyt der vreesen Godts es wijsheyt ende verstant.

14

Hy en sal niet onderwesen worden die niet wijs en is int goede.

15

Maer daer es een onwijsheyt die ouervloedt int quaet, ende daer en is gheenen sin daer bitterheyt is.

16

Die wetenheyt vanden wijsen sal als eenen ouervloet ouervloeden, ende sijnen raet blijft als een fonteyne des leuens.

17

Het herte van eenen sot is als een ghebroken vat, ende ten sal gheen wijsheyt behouden.

18

Een verstandich mensch sal prijsen soe wat woort hy van den wijsen hoort, ⁺ende hy salt vermeerderen. Een ouerdadich wellustich mensch heuet ghehoort, ende tsal hem mishaghen, ende hy sal dat worpen achter sijnen rugghe.

+ C

19

Dat vertellen eens sots is ghelijck een pack ouer den wech, maer in die lippen vanden verstandighen sal gratie gheuonden worden.

20

Den mont van eenen voersienighen wort in die vergaderinghe ghesocht, ende sijn woerden sullen sij dencken in hen herten.

21

Ghelijck een verdoruen huys, alsoo is den dwasen die wijsheyt, ende die wetenheyt van eenen onuerstandighen sijn onsegghelijcke woerden.

22

Die leeringhe is den sotten als veteren aen die voeten, ende ghelijck banden der handen aen die rechte handt.

23

Een sot sal int lachen sijn stemme verheffen, maer een wijs man sal nauwelijcs al stillijck lachen.

24

Een gulden cieraet is den voersienighen die leeringhe, ende als een cieraet der armen in den rechten arm.

25

⁺Des sots voet is licht in sijns naesten huys, ende een gheleert man sal bescaempt worden van eens machtichs persoon.

+ D

26

Een sot sal sien doer die vinster int huys, maer een gheleert man sal buyten staen.

27

Tes een dwaesheyt des menschen, luysteren doer die doore, ende die voersienighe sal beswaert worden met lasteringhe.

28

Die lippen der onwijser sullen sotte dinghen vertellen, maer die woerden der voersichtigher sullen met een waghe gheweghen worden.

29

Inden mont der dwasen is hen herte, ende int herte der wijsen is haren mont.

30

Als die ongoddelijcke den duyuelen vermalendijt, soo vermaledijt hy sijn ziele.

31

Een oorblaser sal sijn ziele besmetten ende in alle dinghen sal hy ghehaet worden, ende diet blijft sal ghehaet worden, een swijghende ende verstandichmensch sal gheeert worden.