Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xx. Capittel.

1

⁺HOe veel beter eest te straffen, dan gram te sijn? ende den belijdende int ghebedt niet te beletten.

+ A

2

Die begheerlijckeyt van eenen ghesnedenen man sal een ionck meysken den maechdom benemen,

3

alsoo ooc die doer ghewelt een onrecht ordeel doet.

4

Hoe goet eest den ghenen die ghestraeft is dat hy berou toone? want alsoe suldi ontvlieden die ghewillighe sonde.

5

Daer is een swijghende die wijs gheuonden wort, ende daer is een hatelijck mensch die te stout is om te spreken.

6

Maer daer is oock een swijghende die tverstant van spreken niet en heeft, ende daer is een swijghende, wetende den tijt des bequamen tijts.

7

Een wijs mensch sal swijghen tot eenen tijt, maer een onghebonden ende een onwijs en sullen gheenen tijt houden.

8

Die veel woerden ghebruyct sal sijn ziele quetsen, ⁺ende die de macht voer sij seluen onrechtuerdelijck aenneemt sal ghehaet worden.

+ B

9

Daer is eenen voertganck in quaetheden den ongheleerden man, ende daer is een vindinghe ter scaden.

10

Daer is een gaue die niet orberlijck en is, ende daer is een gaue welcs wederloon tweeuout is.

11

Daer is een verminderinghe om die glorie, ende wederom esser een die van der ootmoedicheyt thooft opheffen sal.

12

Daer is een die veel verlost om eenen cleynen prijs, ende die wederom gheuende tot seuen dobbel toe.

13

Die wijs is in woerden maect sij seluen lieffelijck, maer die gratien der sotten sullen wtghestort worden.

14

Die ghifte van eenen onwijsen en sal v niet nut sijn, ⁺want sijn ooghen zijn seuen voudich,

+ C

15

cleyn dinghen sal hy gheuen, ende veel verwijten, ende dat openen sijns monts is een aensteken der vlammen.

16

Heden sal iemant leenen, ende morghen sal hijt eysschen, ende sulck mensch es hatelijck.

17

Een sot en sal gheenen vrient hebben, ende sijn goet en sal gheen gratie hebben,

18

want die zijn broot eten, dat sijn valsche tonghen. Hoe dicmael ende hoe vele sullen sij hem bespotten?

19

Want het tghene dat te hebben was en heeft hy met gheenen welghescicten sin bedeylt, ende desghelijcs oock datmen niet en behoefde te hebben.

20

Den val van een valsche tonghe es ghelijck een die opt pauiment valt, alsoo sal den val der quader oock haestelijck comen.

21

Een ongracelijc mensch is ghelijck een ydel fabele,

[p. *538]

ende inder onghemanierder mont sal die altoos sijn.

22

Wt den mont vanden dwaes sal die parabele mispresen worden, want hy en seyt die niet te sijnen tijde.

23

Daer es een die beledt wort te sondighen van armoeden, ende in zijn ruste sal hy ghequelt worden.

24

Daer es een die zijn ziele verliesen sal midts scaempte, ende van eenen onwijsen persoon sal hy die verliesen, maer doer dat verkiesen des persoons sal hy sij seluen verderuen.

25

Daer es een die van scaempten beloeft zijnen vrient, ende hy heeft hem ghewonnen tot eenen viant om niet.

26

Die loghene is een arch verwijt in eenen mensche, ende inden mondt vanden ongheleerden sal die altijs wesen.

27

⁺Beter is een dief, dan een man die veel van lieghenis, maer sij sullen beyde die bederffenisse beeruen.

+ D

28

Die seden der loghenachtigher menschen sijn sonder eere, ende hen bescaemtheyt is met hen sonder ophouden.

29

Die wijse sal met woerden sij seluen vorderen, ende een voersienich man sal den grooten van state behaghen.

30

Die sijn lant werct die sal den hoop der vruchten, verhooghen, ende die rechtuerdicheyt werct, sal verheuen worden, maer die den grooten van state behaecht, sal die onrechtuerdicheyt ontulieden.

31

Hantghiften ende gauen verblinden die ooghen der rechters, ende ghelijck een die stom is inden mont keert hy hen straffinghe aff.

32

Verborghen wijsheyt, ende eenen scade die niet ghesien en wort, wat profijt is in beyden?

33

Beter is hy die sijn onwijsheyt bedect, dan een mensch die sijn wijsheyt verbercht.