Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺EEn wercman die een dronckaert is en sal niet rijck worden, ende die cleyn dinghen versmaet sal allinxkens veruallen.

+ A

2

Den wijn ende die vrouwen doen die wijse van Godt affkeeren, ende sij sullen die verstandighe strauen,

3

ende die sij seluen voecht met oneerbaer vrouwen, sal een archboeue wesen. Etter ende wormen sullen hem beeruen, ende hy sal verhauen worden tot een meerder exempel, ende sijn ziele sal vanden ghetale wech ghenomen worden.

4

Wie haest ghelooft die is licht van herten, ende hy sal vermindert worden, ende die teghen sijn ziele misdoet sal daer bouen ghehouden worden.

5

Die hem verblijt in boosheden sal ghemerct worden, ende wie berispinghe haet sal vermindert worden van dleuen, ende wie clappernie haet, die bluscht die quaetheyt.

6

⁺Die tseghen sijn ziele misdoet, sal berou hebben, ende die hem verblijt in quaetheyt sal ghemerct worden.

+ B

7

En wilt gheen quaet ende hart woert verhalen, ende ghy en sult niet vermindert worden.

8

Den vrient ende den viant en wilt uwen sin niet vertellen, ende hebdi eenighe misdaet en wilt dat niet ontdecken,

9

want hy sal v hooren, ende v gadeslaen, ende als die sonde bescermende sal hy v haten, ende alsoe sal hy v altijt bij sijn.

10

Hebdi een woert teghen uwen naesten ghehoort? laet dat in v steruen, betrouwende dat v niet schoeren en sal.

11

Van daenschijn eens woerts lijdt een sot des barens pijne, ghelijck het suchten van eens kints baringhe.

12

Eenen pijl ghescoten in die dgye des vleeschs alsoe is dwoert in therte van eenen sot.

13

Straeft uwen vriendt op dat hijt bij auontueren niet verstaen en hebbe, ende segghe ic en hebs niet ghedaen, oft heeft hijt ghedaen, dat hijt niet weder om en doe.

14

⁺Straeft uwen naesten op dat hijt bijauontueren niet gheseyt en hebbe, ende heeft gheseyt, dat hijt bijouontuere niet wederom en doe.

+ C

15

Berispt den vrient, want die misdoeninghe ghesciet dicmael.

16

Ende en ghelooft allen woerden niet, daer is een die metter tonghen valt, maer niet wter meyninghen.

17

Want wie esser die niet misdaen en heeft met sijnder tonghen? Straeft den naesten eer ghy dreycht.

18

Ende gheeft plaetse der vreesen des alderhoochsten, want alle wijsheyt is die vreese Godts, ende daer in Godt te vreesen, ende in alle wijsheyt is die bescickinge der wet.

19

Ende die leeringhe der archeyt en is gheen wijsheyt, ende dat ghepeyns der sondaren en is gheen versienicheit.

20

Tes een archeyt, ende daer in is een vervloeckinghe, ende tes een onwijse die vermindert wort van wijsheyt.

21

Beter is een mensch die vermindert wort in wijsheyt, ende ghebreckelijck wort van verstande in die vreese, ⁺dan die veel verstants heeft, ende ouertreedt die wet des alderhoochsten.

+ D

22

Daer is een seker scalcheit, ende die is onrechtuerdich.

23

Ende daer is een die een seker woert wt laet vertellende die waerheyt. Daer is een die hem scalckelijck verootmoedicht, ende sijn binnenste sijn vol bedrochs.

24

Ende daer is een rechtuerdighe die hem te seer vernedert van veel ootmoedicheyts, ende daer is een rechtuerdighe die sijn aensicht neycht, ende veynst hem niet te sien tghene dat ombekent is,

25

ende eest dat hy doer die crancheyt sijnder macht ghehindert wort te sondighen, eest dat hy tijt vint om quaet te doen, soo sal hy quaet doen.

26

Wten ghesichte wort een man ghekent, ende wt dat ontmoeten des aensichts die verstandighe.

27

Dat habijt des lichaems, ende dat lachen der tanden, ende den ganck des menschs vercondighen van hem.

28

Daer es een valsche berispinghe in die gramscap van eenen spijteghen, ende daer is een ordeel dwelck ghetoont wort niet goet te sijne, ende daer is een swijghende, ende dit is voersichtich.