Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺DIe inder eewicheyt leeft heeft alle dinghen tsamen ghescapen, Godt sal alleen gherechtuerdicht worden, ende hy blijft een onuerwonnen coninck inder eewicheyt.

+ A

2

Wie sal machtich ghenoech sijn om sijn wercken te vertellen?

3

Oft wie sal sijn grootdadicheden ondersoecken?

4

Ende wie sal die cracht van zijnder grootheyt wtspreken? Oft wie sal daer toe doen om te verclaren sijn bermherticheyt?

5

Daer en is gheen minderen, oft meerderen aen, noch die grootdadicheden des Heeren en sijn niet te vinden.

6

Als die mensch voldaen sal hebben dan sal hy beghinnen, ende als hy gherust sal hebben, dan sal hy wercken.

7

Wat is een mensch, ende wat is sijn gratie? ende wat is zijn goet, oft zijn quaet?

8

Tghetal vander menschen daghen zijn ten meesten hondert iaren als druppelen van dat water der zee zijn sij gheacht, ende ghelijck een steenken des sants, alsoo zijn die luttel iaren in den dach der eewicheyt.

9

⁺Daerom is Godt lijdtsamich ouer hen, ende hy stort op hen zijn bermherticheytwt.

+ B

10

Hy heeft die vermetelijcheyt haers herten ghesien, datse quaet is, ende hy heeft ghekent hen verkeeringhen datse arch is,

11

daer om heeft hy zijn versoenlijcheyt op hen veruult, ende heeft hen ghetoont den wech der rechtuerdicheyt.

12

Die bermherticheyt des menschen es tot sijnen naesten, maer die bermherticheyt Godts es op alle vleesch.

13

Wie bermherticheyt heeft die leert ende onderwijst als een herder zijn cudde.

14

Hy ontferme ontfanghende die leeringhe der ontfermherticheyt, ende die hem haest in zijn ordeelen.

15

Kint in die goede dinghen en maect gheen clachte, ende in alle ghiften soe en gheeft gheen droefheyt van een quaet woert.

16

En sal den dauwe die hitte niet vercoelen? Alsoo es een woert beter dan die ghifte.

17

Siet en es een woert niet bouen een goede gaue? ⁺maer dese zijn beyde met eenen mensche die gherechtuerdicheyt is.

+ C

18

Een dwaes sal spijtelijck verwijten, ende die ghifte van eenen onghemanierden doet die ooghen verdwijnen.

19

Voert ordeel soo bereyt v seluen rechtuerdicheyt, ende eer ghy sprect soo leert,

20

voer die quale doeter medecijne toe, ende voer dat oordeel vraecht v seluen, ende in dat aenscouwen Godts suldi versoeninghe vinden.

21

Voer die siecte soo verotmoedicht v, ende in den tijt der siecten soo toont v wandelinghe.

22

En wort niet beledt eewelijck te bidden, ende en wort niet belet om rechtuerdich te worden totter doot toe, want Godts loon blijft inder eewicheyt.

23

Voer tghebedt soo bereyt v ziele, ende en wilt niet zijn als een mensch die Godt tempteert.

24

Ghedenct der gramscappen die in den dach des voleyndens wesen, sal ende den tijdt des vergheldens int omkeeren des aensichts.

25

Ghelijck der armoeden in den dach der ouervloedicheyt, ende den noot der armoeden in den dach der rijcdommen.

26

⁺Van smorghens totten auont sal den tijt verandert worden, ende dese dinghen zijn al haestich wech gaende voer Gods

+ D

[p. *537]

ooghen.

27

Een wijs man vreest in alle dinghen ende in die daghen der misdaden sal hy hem wachten van ledicheyt.

28

Alle die cloeck is bekent die wijsheyt, ende den ghenen die haer vint sal hy loff gheuen.

29

Die verstandich zijn in woerden die hebben selue ooc wijselijc ghedaen, ende sij hebben verstaen die waerheyt ende rechtuerdicheyt, ende hebben aengheroepen die bijspraken ende ordeelen.

30

Nae uwe begheerlijcheden en gaet niet, ende keert v af van uwen wille.

31

Eest dat ghi uwer zielen haer begeerlijcheden gheeft, soe sal sij v maken tot een blijscap uwen vianden.

32

En hebt gheen ghenoechte in die gheselscappen, ende in die onmatelijcke wellusten,

33

dat ghy niet arm en wort van veel ontleenens op woecker, ende dat ghy niet en houdt in die borse, want soo soudi een benijder ws leuens sijn.