Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

[p. *536]

1

⁺GOdt heeft den mensch van der eerden ghescapen, ende nae sijn beelt heeft hy dien ghemaect.

+ A

2

Ende hy sal dien wederom keeren in die selue, ende nae hem seluen heeft hy dien met cracht becleedt.

3

Een ghetal der daghen ende tijt heeft hy hem ghegheuen, ende hy heeft hem ghegheuen die macht der dinghen die op deerde sijn.

4

Hy heeft die vreese van hem ghestelt op alle vleesch, ende hy heeft heerscappie ghehadt ouer die beesten, ende vlieghende dieren.

5

Hy heeft wt hem ghescapen een helpe sijns ghelijcke, raet, ende tonghe, ende ooghen, ende ooren, ende een herte heeft hy hen ghegheuen om te verdencken, ende met die leeringhe des verstants heeft hijse veruult.

6

Hy heeft hen ghescapen die wetenheyt des gheests, met verstant heeft hy hen herte veruult, ende goede dinghen ende quade heeft hy hen ghetoont.

7

Hy heeft hen ooge ghestelt op den herten, om hen te toonen die grootheden sijnder wercken,

8

op dat sij den naem der heylichmakinghen souden tsamen louen, ⁺ende glorieeren in sijn wonderlijcheden, om dat sij die grootheden van sijnen wercken souden vertellen.

+ B

9

Hy heeft hen daer toe ghegheuen die onderwijsinghe, ende met die wet des leuens heeft hy die gheerft.

10

Een eewich testament heeft hy met hen ghemaect, ende sijn rechtuerdicheyt ende ordeelen heeft hy hen ghetoont.

11

Ende die heerlijcheden sijnder eeren heeft hen ooghe ghesien, ende die heerlijcheden van sijnder stemmen hebben hen ooren gehoort. Ende hy heeft hen gheseyt. Wacht v van allen boosen.

12

Ende hy heeft hen beuolen eenen ieghelijcken van sijnen naesten.

13

Hen weghen sijn voer hem altoos, sij en sijn niet verborghen van sijnen ooghen.

14

In elck volck besonder heeft hy eenen regeerder ghestelt,

15

ende Israel Godts deel is openbaer gheworden.

16

En alle hen wercken sijn ghelijck die sonne int aenschijn Godts, ende sijn ooghen sijn sonder ophouden siende op hen weghen.

17

⁺Die testamenten en sijn niet verborghen doer hen boosheden, ende alle hen boosheden sijn in daenschijn Godts.

+ C

18

Die almisse des mans es als en borse met hem, ende die gratie des menschs sal hy als den appel der ooghen bewaren,

19

ende naemaels sal hy opstaen, ende sal hen den loon betalen eenen ieghelijcken op sijn hooft, ende hy salse tsamen keeren in die binnenste deelen der eerden.

20

Maer den ghenen die penitentie doen, heeft hy ghegheuen den wech der rechtuerdicheyt, ende hy heeft die ontbrekende versterct om te verdraghen, ende hy heeft hen toeghescict dat deel der waerheyt.

21

Bekeert v totten Heere ende verlaet v sonden,

22

bidt voer des Heeren aenschijn, ende mindert die verarghenissen.

23

Keert wederom totten Heere, ende keert v aff van v onrechtuerdicheyt, ende haet bouen maten seere die affgrijselijcheyt,

24

ende kent die rechtuerdicheden ende ordeelen Gods, ende staet int lot der voersettinghen ende des ghebedts vanden alderhoochsten Godts.

25

⁺Gaet in die deelen der heylegher werelt metten leuenden, ende die Gode belijdinghen gheuen.

+ D

26

En toeft niet in die dolinghe der booser, voer die doot belijdt van eenen dooden vergaet die belijdinghe als niet.

27

Ghy sult belijden leuende, leuende ende ghesont suldi belijden ende louen Godt, ende ghy sult glorieeren in sijn bermherticheden.

28

Hoe groot is die bermherticheyt des Heeren, ende sijn versoenlijcheyt den ghenen die hen tot hem bekeeren?

29

Want alle dinghen en moghen in die menschen niet sijn, want een kint des menschen en is niet onsterffelijck, ende in die ydelheyt der quaetheyt hebben sij behaghen ghehadt.

30

Wat is claerder dan die sonne? ende dese sal vergaen. Oft wat heeft dat vleesch ende bloet argher verdacht? ende dat sal ghestraft worden.

31

Die cracht van die hoocheyt des hemels aensiet hy, ende alle menschen sijn eerde ende asschen.