Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺EN verblijt v niet in ongoddelijcke kinderen, eest dat sij vermenichfuldicht worden, noch en hebt op die gheen ghenoechte, eest dat die vreese Godts in hen niet en is.

+ A

2

En hebt gheen betrouwen op hen leuen, ende en aensiet hen arbeyden niet.

3

Want beter is een godtvreesende, dan duysent ongoddelecke kinderen.

4

Ende tes nutter te steruen sonder kinderen, dan boose kinderen achter te laeten.

5

Van eenen verstandighen sal dlant bewoont worden, ende van drij ongoddelijcke salt verwoest worden.

6

Veel sulcker dinghen heeft mijn ooghe ghesien, ende noch stercker dan deze heeft mijn oore ghehoort.

7

In die vergaderinghe der sondaren sal tvier ontsteken, ende in een ongheloouich volck sal die gramscap ontsteken.

8

Die oude ruesen en hebben voer hen sonden niet ghebeden, die verdoruen sijn betrouwende haerder macht,

9

ende hy en heeft haerder pelgrimagien niet ghespaert, ende hy heeftse vervloect om die houerdicheyt haers woerts.

10

⁺Hy en heeft haerder niet ontfermt, dat heel volck vernielende, ende dat hem verhief in sijn sonden.

+ B

11

Ende ghelijck ses hondert duysent voetvolcs die vergadert waren in de hertheyt haerder herten, ende hadder een hartneckich gheweest, soo hadt wonder gheweest, hadde hy onghepijnt gheweest.

12

Want die bermherticheyt ende die gramscap is met hem. Machtich is dat verbidden, ende die gramscap wtstortende

13

in sijn bermherticheyt, alsoo ordeelt sijn straffinghe den mensch nae sijn wercken.

14

Die sondaer en sal nae den roof niet ontulieden, ende tverbeyden des gheens die bermherticheyt doet en sal niet vertoeuen.

15

Alle bermherticheyt sal plaetse maken eenen ieghelijcken nae die verdiente sijnder wercken, ende naet tverstant van sijnder pelgrimmagien.

16

En segt niet, ick sal voer Godt verborghen worden, ende wie sal mijns van den hoochsten ghedachtich wesen?

17

in een groot volck en sal ick niet bekent worden. want wat is mijn ziele in soo onghemeten creature?

18

Siet den hemele, ende die hemelen der hemelen, den affgront, ende dat gheheel eertrijck, ⁺ende die dinghen die daer in sijn sullen voer sijn aensicht beroert worden,

+ C

19

die berghen tsamen ende die hueuelen, ende die fundamenten der eerden, ende als godt die aensiet soe sullen sij met beuinghe tsamen ghescudt worden.

20

Ende in alle dese dinghen is dat herte onuerstandich ende elck herte wort van hem verstaen,

21

ende wie verstaet sijn weghen, ende den stormenden wint, den welcken des menschen ooghe oock niet en sien en sal?

22

Want seer veel van sijnen wercken sijn in verborghentheden, maer wie sal die wercken sijnder rechtuerdicheyt wtspreken? of wie salse verdraghen? Want het testament is verre van die sommighe, ende dat vraghen der menschen is ten eynde comen.

23

Die vermindert wort van herten denct ydel dinghen, ende een onuersienich ende dolende man denct sotte dinghen.

24

Hoort my sone, ende leert die onderwijsinghe des verstants, ende merct toe op mijn woerden in v herte,

25

⁺ende ic sal in gherechticheyt die onderwijsinghe segghen, ende ick sal ondersoecken om te vertellen die wijsheyt, ende merct toe op mijn woerden in v herte, ende ick segghe in die gherechticheyt des gheests die crachten die welcke Godt ghestelt heeft in sijn wercken van tbeghinsel, ende inder waerheyt vercondighe ick sijn wetenheyt.

+ D

26

Int ordeel Godts zijn sijn wercken vanden beghinne, ende van hen insettinghe heeft hy hen deelen ondersceyden, ende hen beghinselen in hen volcken.

27

Hy heeft inder eewicheyt verciert hen wercken, ende sij en hebben noch hongher ghehadt, noch ghearbeyt, ende sij en hebben niet opghehouden van haren wercken.

28

Een ieghelijck en sal sijnen naesten niet benauwen tot inder eewicheyt.

29

En sijt niet ongheloouich sijnen woerden.

30

Hier nae heeft Godt op die eerde ghesien, ende hy heeft die veruult met sijnen goeden.

31

Die ziele van alle dat leuende es salt vercondighen voer haer aensicht, ende in haer is wederom dat wederkeeren van dien.