Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

[p. *535]

1

⁺DIe Godt vreest sal goede dinghen doen, ende die de gherechticheyt onderhoudt sal die vercrijghen,

+ A

2

ende sij sal hem ontmoeten als een eerlijck moeder, ende als een vrouwe van haren maechdom sal sij hem ontfanghen.

3

Sy sal hem spijsen metten broode des leuens ende des verstants, ende metten water der saligher wijsheyt sal sij hem drencken, ende sij sal in hem gheuesticht worden, ende niet gheboocht worden,

4

ende sij sal hem onthouden, ende hy en sal niet beschaemt worden, ende sij sal hem verheffen bij sijn naesten,

5

ende int middel der vergaderinghen sal sij sijnen mont open doen, ende sij sal hem veruullen metten gheest der wijsheyt, ende des verstants ende metten cleede der glorien sal sij hem cleeden.

6

⁺Vrolijcheyt, ende verhueghen sal sij hem tot eenen scadt vergaderen, ende met eenen eewighen naem sal sij hem beeruen.

+ B

7

Die dwase menschen en sullen die niet begrijpen, ende verstandighe menschen sullen haer ontmoeten, sotte menschen en sullen haer niet sien. Want sij es verre ghesceyden van houerdie ende bedroch,

8

loghenachtighe mannen en sullen haers niet ghedachtich wesen, ende warachtighe mannen sullen in haer ghevonden worden, ende sij sullen voerspoet hebben tot Gods aenscouwen.

9

Den loff en is niet schoon inden mont des sondaers,

10

want van Gode is die wijsheyt comen, want Godts loff salder wijsheyt bijstaen, ende in den gheloouighen mont sal sij oueruloeden, ⁺ende die heerscapper sal hem die gheuen.

+ C

11

En segt niet, Doer Godt comet dat sij hier niet en is, maer dat hij haet dat en doet niet.

12

En segt niet, hy heeft my in dolinghe ghebracht. Want die ongoddelijcke menschen en sijn hem niet nootelijck.

13

Alle versmaetheyt der dolinghen haet die Heere, ende die en sal niet lieflijck sijn den ghenen die hem vreesen.

14

Godt heeft vanden beghinne den mensch ghestelt, ende hem ghelaten in die hant sijns raets.

15

Hy heeft daertoe ghedaen sijn beuelinghen ende gheboden,

16

eest dat ghy die beuelinghen wilt bewaren, ende inder eewicheit behaghelijc ghelooue houden, soo sullen sij v behouden.

17

Hy heeft voer v ghestelt water ende vier, waer toe dat ghy wilt steect v hant wt.

18

⁺Voer den mensch is dleuen ende, die doot, goet ende quaet, wat hem behaecht dat sal hem ghegheuen worden,

+ D

19

want die wijsheyt Gods es groot ende sterck van machticheyt, siende alle menschen sonder ophouden.

20

Die ooghen des Heeren sijn tot den ghenen die hem vreesen, ende hy kent alle des menschen neersticheyt.

21

Hy en heeft niemanden beuolen ongoddelijck te doen, ende niemanden en heeft hy tijt ghegheuen om te sondighen,

22

want hy en begheert niet die menichte der onghelouigher ende onnutter kinderen.