Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺SAlich is die man die niet gheuallen en is doer dwoert wt sijnen monde, ende die niet ghesteken en is met die droefheyt des misdaets.

+ A

2

Salich is hy die sijns moets droefheyt niet ghehadt en heeft, ende van sijn hope niet gheuallen en is.

3

Een ghierich ende vast houdende man heuet tgoet sonder redene, ende waer toe dient het gout eenen nydighen mensch?

4

Die wt sijnen moet vergadert onrechtuerdelijck die vergadert den anderen, ende in sijn goet sal een ander ouerdadighe wellusticheyt hebben.

5

Die sij seluen arch is, wien anderen sal hy goet sijn? ende hy en sal hem niet verblijden in sijn goeden.

6

Die sij seluen benijdt gheen dinck en is argher dan hy, ende dits den loon van sijnder quaetheyt,

7

ende eest dat hy wel doet, dat doet hy onwetende, ende niet willens, ⁺ende ten laetsten toont hy sijn quaetheyt.

+ B

8

Die ooghe vanden nydighen is arch, ende sijn aensicht affkeerende, ende sijn ziele versmadende.

9

Die ooghe vanden ghierighen is onuersadelijck int deel der ongherechticheyt, hy en sal niet versaet worden tot dat hy verdorrende sijn ziele verteere.

10

Een quader ooghe is tot quade dinghen, ende hy en sal niet versaet worden broots ghebreck lijdende, ende met droeffheyt sal hy ouer zijn tafel sijn.

11

Sone eest dat ghijt hebt, soo doet wel met v seluen, ende offert Gode weerdighe offeranden.

12

Weest ghedachtich hoe dat die doot niet en vertoeft, ende dat testament der hellen want v dat ghetoont is, want het testament van dese werelt sal die doot steruen.

13

Voer v doot doet wel uwen vrient, ende nae v macht wtreyckende gheeft den armen.

14

En laet v niet bedroghen worden vanden goeden daghe, ende het deelken van een goede gaue en laet v niet voerby gaen?

15

⁺En suldi den anderen niet achterlaten v arbeyden, ende pijnen tot een deylinghe des lots?

+ C

16

Gheeft ende ontfanct, ende maect v ziele rechtuerdich.

17

Voer v doot soe werct rechtuerdicheyt, want in die helle en is gheen spijse te vinden.

18

Alle vleesch sal ghelijc hoy verouderen, ende ghelijck een blat vrucht voerts brenghende in eenen groenen boom.

19

Die ander worden voerts ghebrocht, ende die ander affgheworpen, alsoe is oock die generatie van tvleesch ende bloet, dat ander wort voleyndt, ende dander wort gheboren.

20

Alle bederffelijck werck sal ten eynde vergaen, ende die dat werct sal daer mede gaen.

21

Ende alle wtuercoren werck sal rechtuerdich ghemaect worden, ende die dat werct sal daer doer gheeert worden.

22

⁺Salich is die man die in wijsheyt blijuen sal, ende die in zijn rechtuerdicheyt ouerdencken sal, ende met verstant sal peynsen Gods voersienicheyt.

+ D

23

Die zijn weghen verdenct in zijn herte, ende in zijn verholentheden verstandich is, gaende nae haer als een ondersoecker, ende in haer weghen stil staende,

24

die siet doer haer vinsteren, ende hoorende in haer doeren,

25

die neffens haer huys rust, ende in haer mueren eenen staeck vastmakende sijn huttekens stellen sal tot haer handen, ende in zijn hutteken sullen goede dinghen rusten inder eewicheyt,

26

hy sal sijn kinderen stellen onder haer dack, ende onder haer tacken sal hy woonen,

27

hy sal bescermpt worden onder haer decsel van die hitte, ende in haer glorie sal hy rusten.