Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺SOe wie tpeck raect, die sal daer aff besmet worden, ende die ghemeynscap houde met eenen hoouerdighen sal hoouerdicheyt aen doen.

+ A

2

Eenen last sal hy op hem nemen die ghemeynscap houdt met eenen die eerlijcker van state is dan hy. Ende en weest gheen gheselle van eenen die rijcker is dan ghy.

3

Wat ghemeynscap sal den ketel metten pot hebben? want als sij teghen malcanderen stooten soo sal desen ghebroken worden.

4

Die rijcke

[p. *534]

heeft onrechtuerdelijck ghedaen, ende hy sal grimmen, maer die arme ghequetst sijnde sal swijgen.

5

Eest dat ghy gheeft soe sal hy v aennemen, ende eeest dat ghy niet en hebt, soo sal hy v verlaten.

6

Eest dat ghy iet hebt soe sal hy met v leuen, ende sal v wt teren, ende hy en sal gheen medelijden met v hebben.

7

Eest dat ghy hem nootelijck sijt, soo sal hy v vertreden ende een luttel lachende sal hy hope gheuen vertellende v goede dinghe, ende segghen. Wat is v van noode?

8

Ende hy sal v bescamen in sijn spijsen to dat hy v ydel make tweemael ende drijmael, ende ten laetsten sal hy v bespotten, ende naemaels siende sal hy v verlaten, ende zijn hooft tot v scudden.

9

Verootmoedicht v Gode, ende verbeyt zijn handen.

10

Siet toe dat ghy doer dwaesheyt verleyt zijnde, niet vernedert en wort.

11

⁺En wilt niet ootmoedich sijn in v wijsheyt opdat ghy verootmoedicht sijnde in dwaesheyt niet verleyt en wort.

+ B

12

Als ghy gheroepen sijt van eenen die machtigher is soo gaet wech, want daer doer sal hy v te meer tot hem roepen.

13

Noch en wilt niet onscamel sijn op dat ghy niet verstooten en wort, ende een weest oock niet verre van hem, dat ghy niet vergheten en wort.

14

En houdt v niet om ghelijckelijck met hem te spreken, noch en ghelooft niet veel zijnder woerden. Want doer veel sprekens sal hy v proeuen, ende een luttel lachende sal hy v vraghen van uwe verborghentheden.

15

Sijnen wreeden moet sal v woerden onthouden, ende hy en sal van quaetheyt ende banden niet sparen.

16

Wacht v, ende siet neerstelijck toe voer v ghehoor, want ghy wandelt met v verderffenisse.

17

⁺Maer die dinghen hoorende, soo sietse als in droomen, ende ghy sult waken.

+ C

18

Alle v leuen lanck soo bemint Godt, ende aenroept dien in uwer salicheyt.

19

Alle ghedierte heeft sijns ghelijcke lief, alsoo oock alle mensch sijnen naesten.

20

Alle vleesch sal by syns ghelijck versaemt worden, ende alle mensch sal hem met sijns ghelijck verselscappen.

21

Eest dat eenen wolf emmermeer sal ghemeyscap hebben met een lam, soo sal die sondaer metten rechtuerdighen gemeynscap hebben.

22

Wat ghemeynscap heeft een heylich mensch met eenen hont? oft wat deel heeft die arme metten rijcke.

23

Die iacht vanden leuwe is den wilden ezel in die woestijne, alsoe ooc die weyde der rijcken, zijn die armen.

24

Ende ghelijck die ootmoedicheyt den hoouerdighen versmadelijck is, alsoe is die arme een vervloeckinghe vanden rijcken.

25

Als die rijcke beroert is soo wort hy van sijnen vrienden geuesticht, maer als die ootmoedeghe valt, soo sal hy wech ghestooten worden oock van sijnen bekenden.

26

⁺Als die rijcke bedroghen is, soo sijnder vele die de scade verhalen, hy heeft hoouerdighe dinghen ghesproken, en sij hebben hem recht ghegheuen,

+ D

27

die ootmoedighe is bedroghen, ende daer toe wort hy oock ghestraeft, hy heeft verstandelijck ghesproken, ende hem en is gheen plaetse ghegheuen.

28

Die rijcke heeft ghesproken, ende sij hebben alle ghesweghen, ende sijn woert sullen sij tot aen die wolcken verheffen,

29

die arme heeft ghesproken, ende sij segghen. Wie is dese? ende eest dat hy struyckelt soo sullen sij hem omworpen.

30

Die rijcdom es goet den ghenen die gheen sonde in sijn conscientie en heeft, ende die armoede is dalder archste in den mont vanden ongoddelijcken.

31

Therte vanden mensche verandert zijn aensicht, oft tot goede dinghen oft tot quade.

32

Dat spueren van een goet herte, ende van een goet aensicht suldi niet lichtelijck vinden, ende met arbeyt.