Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺EEst dat ghy wel doet, soo weet wien ghy dat doet, ende soe sal daer veel gratien sijn in v goeden.

+ A

2

Doet wel den rechtuerdighen ende ghy sult eenen grooten wederloon vinden, ende al en eest niet van hem, emmer vanden Heere.

3

Want hem en is niet wel die ghestadich blijft in quaetheden, ende die gheen almissen en gheeft, want die alderhoochste haet die sondaers, ende hy heeft bermhertich gheweest den ghenen die penitentie doen.

4

Gheeft den bermhertighen, ende en ontfanct den sondaer niet, ende den ongoddelijcken ende den sondaren sal hy die wrake verghelden, bewarende die totten dach der wraken.

5

Gheeft den goeden, ⁺ende en ontfanct den sondaer niet.

+ B

6

Doet wel den ootmoedighen, ende en gheeft den ongoddelijcken niet. Verbiet datmen hem gheen brooden en gheue, dat hy daer doer niet machtigher en sij dan ghy,

7

want ghy sult dobbel quaden vinden in alle die goeden die ghy hem doen sult. Want die alderhoochste haet die sondaren oock, ende den ongoddelijcken sal hy die wrake verghelden.

8

Een vrient en sal niet bekent worden in voerspoeden, noch een viant en sal niet verborghen blijuen in teghenspoeden.

9

In eens mans voerspoeden sijn sijn vianden in droefheyt, ende in sijn teghenspoet es die vrient bekent gheworden.

10

En betrout uwen viant niet inder eewicheyt, ⁺want ghelijck coper soe verroest sijn archeyt,

+ C

11

ende eest dat hy verootmoedicht crom gaet stelt v herte daer toe, ende wacht v van hem.

12

En stelt hem niet by v, noch en laet hem niet sitten aen v rechte sijde, dat hy omghekeert sijnde niet en stae in v plaetse, dat hy bijauontueren omghekeert sijnde in v plaetse niet en soecke uwen stoel, ende dat ghy ten wtersten mijn woerden bekent, ende met mijnen woerden ghesteken wort.

13

Wie sal des tooueraers ontfermen die van een serpent gheslaghen is, ende alle den ghenen die den beesten ghenaken? Alsoo oock die hem verselscapt met eenen boosen man, ende beuanghen is in sijn sonden.

14

Een vre sal hy met v blijuen, maer eest dat ghy affwijct soo en sal hijt niet verdraghen.

15

⁺In sijn lippen versoet een viant, ende in sijn herte legt hy listighe laghen, dat hy v soude omworpen in die gracht.

+ D

16

Met sijnen ooghen weent een viant, ende eest dat hy tijt vindt soo en sal hy niet versaedt worden van bloede,

17

ende eest dat v quade auontueren ouerloopen, soo suldi hem daer ten iersten vinden.

18

Met sijnen ooghen sal een viant weenen, ende als helpende sal hy v planten ondergrauen.

19

Sijn hooft sal hy roeren, ende metter hant gheslach der blijscap maken, ende veel heymelijck sprekende, sal hy sijn aensicht veranderen.