Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺DIe wijsheyt vanden verootmoedicheden sal sijn hooft opheffen, ende int midden der grooter van state sal sij hem doen sitten.

+ A

2

En prijst gheenen man om zijn schoonheyt, noch en versmaet gheenen mensch om sijn ghedaente.

3

Een bie is cleyn onder die vlieghende dieren, ende haer vrucht heeft het beghinsel der soeticheyt.

4

In die cleedinghe en glorieert nemmermeer, noch in den dach van uwer eeren en verheft v niet, want wonderlijck sijn die wercken des alderhoochsten alleen, ende glorioes ende verborghen ende onghesien sijn zijn wercken.

5

Veel tyrannen hebben in den throon gheseten, ende een daer gheen vermoeden aff en was heeft die croone ghedraghen.

6

Veel machtighe sijn gheweldelijck verdruct, ende die gloriose sijn gheleuert inder vreemder handen.

7

Eer ghy vraecht soe en misprijst niemant, ende als ghijt ghevraecht hebt soe straft recht-

[p. *533]

uerdelijck.

8

Eer ghy hoort soe en antwoert gheen woert, ende int midden der ouderen soe en stelt v niet te spreken.

9

Van een dinck dwelck v niet aen en gaet, en wilt niet strijden, ende int ordeel der sondaren en staet niet mede.

10

Sone en laet v wercken niet in vele dinghen wesen, ⁺ende eest dat ghy rijck sijt, soe en suldi niet vrij zijn van misdaet, want eest dat ghijt veruolcht soo en suldijs niet begrijpen, ende ghy en sulles niet ontvlieden al eest dat ghy voer loopt.

+ B

11

Daer is een mensch arbeydende ende haestende, ende een ongoddelijcke smerte lijdende, ende soe veel te meer en sal hy niet ouervloeden.

12

Daer is een dorre mensch behoeuende vermakinghe, meer ghebrekende van cracht, ende ouervloedich van armoede,

13

ende die ooghe Godts heeft hem aensien int goede, ende hy heeft hem opgherecht van sijn ootmoedicheyt, ende sijn hooft verheuen, ende vele hebben in hem verwondert, ende sij hebben Godt gheeert.

14

Goede dinghen ende quade dinghen, dleuen ende die doot, die armoede ende die eerlijcheyt sijn van Godt.

15

Die wijsheyt ende onderwijsende castijnghe, ende die wetenheyt der wet, sijn by Gode. Die liefde ende die weghen der goeder sijn by hem.

16

Die dolinghe ende die duysternissen sijn met die sondaren ghescapen, maer die hem verhueghen in quade dinghen die verouderen int quaet.

17

Die gaue Gods blijft den rechtuerdighen by, ende haer profijt sal voertganghen hebben inder eewicheyt.

18

Daer is een die rijck wordt spaerlijck leuende, ⁺ende dit is het deel sijns loons

+ C

19

in dien dat hy seyt, Ick heb ruste voer my vonden, ende nu sal ick van mijnen goede alleen eten,

20

ende hy en weet niet dat den tijt voerby gaet, ende dat die doot naket, ende dat hijt al den anderen laet, ende hy sal steruen.

21

Staet in v testament, ende spreect mede daer in, ende int werck van uwen gheboden soo wort out.

22

En blijft niet in die werken der sondaren, maer hebt betrouwen in Gode, ende blijft in v plaetse,

23

want tes licht om doen in des Heeren ooghen haestelijck eenen armen eerlijck te maken.

24

Die benedictie Gods haest haer tot den loon vanden rechtuerdighen, ende in snelle eere maect sij sijn voertganghen vruchtbarich.

25

En segt niet, wat eest my van noode? ende wat goeden sullen my hier nae sijn?

26

En segt niet ick heb ghenoech voer my, ende wat sal ick hier nae quaets lijden?

27

In den dach der goeder dinghen, en sijt niet onghedachtich der quader, ende inden dach der quader en sijt niet onghedachtich der goeder dinghen,

28

want tes licht doenlijck voer Godt in den sterffdach eenen ieghelijcken te loonen nae sijn weghen.

29

⁺Die quaetheyt van eender vren, maect verghetenheyt van groote ouerdadighe wellusten, ende int eynde vanden mensche is die openbaringhe van sijnen wercken.

+ D

30

Voer die doot en prijst gheenen mensch, want in zijn kinderen wort een man bekent.

31

En leyt allen mensch in v huys niet, want veel sijn die laghen vanden bedrieghelijcken.

32

Want ghelijck die maghen der stinckender menschen op worpen, ende ghelijck een velthoen gheleyt wort in die keuie, ende ghelijck een capret inden strick, alsoo is therte vanden hoouerdighen, ende ghelijck een voersiender, siende den val zijns naesten.

33

Want hy goede dinghen in quade verkeerende legt laghen, ende in die wtuercorene sal hy een smette stellen.

34

Want van een gheynster wort een vier vermeerdert, ende van eenen bedriegher wort het bloet vermeerdert, maer een sondich mensch leyt laghen den bloede.

35

Wacht v vanden quaet doender, want hy smeedt quade dinghen, op dat hy bijauontueren op v niet en brenghe versmaetheyt inder eewicheyt.

36

Laet eenen vreemdelinck tot v comen, ende hy sal v omworpen doer eenen stormende wint, ende hy sal v vervreemden van v eyghen weghen.