Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺EEn wijs richter sal zijnen volcke recht doen, ende die heerlijcheyt van eenen verstandighen sal ghestadich wesen.

+ A

2

Nae den richter des volcs soe zijn oock zijn dienaers, ende hoedanich dat die regeerder der stadt is, soedanich sijn sij ook die daer in woonen.

3

Een onwijs coninck sal zijn volck verderuen, ende die steden sullen bewoont worden doer tverstant der voersieniegher.

4

In Godts hant is die macht der eerden, ende affrijselijck is alle boosheyt der Heydenen. Ende eenen orberlijcken regeerder sal hy op haer ten tijde verwecken.

5

In Godts hant is des menschs macht, ende op des scrijuers aensicht sal hy sijn eere stellen.

6

En wilt niet ghedachtich wesen eenich onrechts ws naesten, ende doet in v wercken niet onrechtelijck.

7

Die hoouerdie is hatelijck voor Godt ende voer die menschen, ende alle boosheyt der Heydenen is affgrijselijck.

8

Een rijck wort vanden eenen volcke totten anderen volcke ouerghestelt om die onrechtuerdicheden, ende onrechten, ende versmaetheden, ende om versceyden bedroch.

9

Maer niet en is argher dan een ghierich mensch. Wat verhouaerdicht hem die eerde ende asschen?

10

Niet en is booser dan ghelt lief te hebben, want dese heeft oock sijn ziele te coope, want hy heeft in zijn leuen sijn binnenste wechgheworpen.

11

Alle ouerheyt is cort van leuen. ⁺Een seer langhe siecte beswaect den medecijn.

+ B

12

Een corte siecte snydt die medecijn aff, alsoo is een coninck heden ende morghen sal hy steruen.

13

Want als een mensch sal steruen, soo sal hy serpenten ende wormen ende beesten beeruen.

14

Tbeghinsel van des menschens houerdie is affsceyden van Godt,

15

want vanden ghenen die hem ghemaect heeft es zijn herte wech ghegaen, want tbeghinsel van alle sonde is die houerdicheyt, soo wie die houdt die sal veruult worden met maledictien, ende sij sal hem omworpen ten eynde.

16

Daerom heeft die Heere onteert die vergaderinghen der quader, ende hy heeftse verdoruen totten eynde toe.

17

Die stoelen der houerdigher vorsten heeft Godt verdoruen, ende hy heeft die saechtmoedighe voer hen doen sitten.

18

Die wortelen der houerdigher Heydenen heeft Godt verdroocht, ende hy heeft die ootmoedighe gheplant wt die Heydenen.

19

⁺Die landen der Heydenen heeft die Heere omgheworpen, ende hy heeftse verdoruen totten gronde toe,

+ C

20

hy heefter sommighe van die dorre ghemaect, ende die heel vernielt, ende hy heeft hen ghedenckenisse doen vergaen vander eerden.

21

Die ghedenckenisse der hoouerdicher heeft Godt te niet ghebracht, ende hy heeft ghelaten die ghedenckenisse der ootmoedigher van sinne.

22

Die hoouerdie en is den menschen niet in ghescapen, noch die gramscap den gheslachte der vrouwen.

23

Dit saet der menschen sal gheeert worden dat Godt vreest, maer dat saet sal onteert worden, dat die gheboden de Heeren ouertredet.

24

Int midden der broederen is haren regeerder in eeren, ende die den Heere vreesen sullen in sijn ooghen sijn.

25

Die glorie der rijcker, der eerlijcker, ende der armer menschen is die vreese Gods,

26

niet te versmaden eenen rechtuerdighen armen mensch, ende niet groot te maken eenen sondighen rijcken man.

27

Groot is een richter, ende machtich is hy in eeren, maer daer en is niemant grooter dan die ghene die Godt vreest.

28

⁺Eenen verstandighen knecht sullen vrij menschen dienen, ende een voersienich ende wel onderwesen man en sal niet murmureeren als hy ghestraft wort, ende die onwetende en sal niet gheeert worden.

+ D

29

En wilt v niet verheffen in v werck te doen, ende en wilt niet toeuen in den tijt der benautheyt.

30

Beter is hy die werct, ende is oueruloedich in alles, dan die glorieert ende broots ghebreck heeft.

31

Sone in saechtmoedicheyt bewaert v ziele, ende gheeft haer eere nae haer verdienste.

32

Wie sal hem rechtuerdich maken die teghen zijn ziele sondicht? ende wie sal hem eeren, die zijns selfs ziele onteert?

33

Een arm mensch glorieert doer zijn castijnghe ende vreese, ende daer is een mensch die gheeert wort om sijn goet.

34

Maer die glorieert in armoede, hoe veel te meer soude hy glorieren in rijcdom? ende die glorieert in rijcdom, die ontsie die armoede.