Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺EN weest niet ialours ouer die vrouwe ws schoodts, op dat sij op v niet en toone die quaetheyt van een boose leeringhe.

+ A

2

En gheeft der vrouwen die macht uwer zielen niet, opdat sij in v macht niet en gae, ende dat ghy bescaemt wort.

3

En aensiet niet een vrouwe die van veel wils is, dat ghy bijauontueren niet valt in haer stricken.

4

Met een dansersse en wilt niet veel ghemeynscap houden, noch en hoort die niet, dat ghy bijauontueren niet verdoruen en wort doer haer crachtighe bedrieghelijcheyt.

5

Een maghet en wilt niet aensien, op dat ghy bijauontueren niet verarghert en wort doer haer schoonheyt.

6

En gheeft den oneerbaeren vrouwen v ziele niet in eenich dinck, ⁺op dat ghy v seluen niet en verderft, ende v erffenisse.

+ B

7

En wilt niet alomme sien in die straten der stadt, noch en gaet niet dolende in haer wijcken.

8

Keert v aensicht aff van een ghecierde vrouwe, ende en siet niet al omme nae die schoonheyt van een vreemde vrouwe,

9

om die schoonheyt der vrouwen esser veel verdoruen, ende daer aff onsteect die begheerlijcheyt als een vier.

10

Alle vrouwe die oncuysch is, sal ghelijck dreck in den wech vertreden worden.

11

Veel menschen verwondert sijnde van die ghedaente eender vreemder vrouwen zijn verworpen gheworden, want haer aen-

[p. *532]

sprake ontsteect ghelijc een vier.

12

Met eens anders wijf en sidt gheenssins, noch en ligt met haer niet op den ellenboghe,

13

noch en strijdt met haer niet inden wijn, op dat bijauontueren v herte niet en neyghe tot haer, ende dat ghy met uwen bloede niet en valt in die verderffenisse.

14

⁺En verlaet den ouden vrient niet, want den nieuwen en sal dies ghelijck niet sijn.

+ C

15

Nieuwen wijn es een nieuwen vrient, hy sal oudt worden, ende ghy sult dien met soeticheyt drincken.

16

En benijdt niet die glorie, ende die rijcdommen des sondaers, want ghy en weet niet welck dat zijn verderffenisse wesen sal.

17

En laet v niet behaghen dat onrecht der onrechtuerdigher, wetende dat die ongoddelijcke totter hellen niet behaghen en sal.

18

Weest verre vanden mensch die macht heeft te dooden, ende ghy en sult gheen vermoeden hebben van die vreese der doot,

19

ende eest dat ghy by hem coemt, soo en wilt niet misdoen, dat hy bijauontueren v leuen niet en neme.

20

⁺Weet die ghemeynscap der doot, want int midden der stricken suldi gaen, ende op die wapenen der rouwigher suldi wandelen.

+ D

21

Nae v macht wacht v van uwen naesten, ende handelt met den wijsen ende voersienighen.

22

Rechtuerdighe mannen laet v tafel gasten wesen, ende inder vreesen Godts laet v gloriatie wesen,

23

ende in uwen sin laet wesen Godts ghedachtenis, ende allen v vertellinghe in die gheboden des alderhoochsten.

24

In der constigher wercluyden hant sullen die wercken ghepresen worden, ende die Prince des volcs in die wijsheyt sijnder woerden, maer int verstant der ouderen is dwoert.

25

Veruaerlijck is in zijn stadt een mensch die lanck van tonghen is, ende die vermetelijck is sal in zijn woerden hatelijck wesen.