Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺EN wilt gheen viant voer vriendt worden uwen naesten, want verwijt ende versmaetheyt sal die quade beeruen, ende alle sondaer is nijdich ende dobbel van tonghe.

+ A

2

Ende verheft v niet in dat ghedachte ws herten als eenen stier, dat by auontueren v macht niet omghestooten en worde doer dwaesheyt

3

ende dat die v bladeren ete, ende v vruchten verderue, ende dat ghy verlaten wort ghelijck eenen dorre boom in die woestijne,

4

want een boose ziele sal hem verderuen diese heeft, ende sij leuert hem tot een blijscap sijnder vianden, ende sij sal hem leyden int deel der ongoddelijcker.

5

Een suet woort maect veel vrienden, ende vermorwet die vianden, ende een gratieuse tonghe es in eenen goeden mensch oueruloedich.

6

Hebt veel vreedtsamighe vrienden, ende hebt van duysent eenen raetsman.

7

Eest dat ghy eenen vrient hebt, soo hebt dien in die becoringhe, ende en ghelooft hem niet lichtelijck.

8

Want daer is een vrient nae sijnen tijt, ende hy en sal niet gheduerich blijuen in den dach des lijdens.

9

Ende daer es een vrient die hem keert tot viantscap ende daer is een vriendt die haet ende ghekijf ende lachter ontdecken sal.

10

⁺Ende daer is een vrient een tafel gheselle, ende die en sal niet blijuen in den dach des noodts.

+ B

11

Een vrient eest dat hy vast blijft soo sal hy v wesen als ws ghelijck, ende in v hysghenooten sal hy ghetrouwelijck doen,

12

eest dat hy hem verootmoedicht teghen v, ende dat hy hem van v aensicht verbercht, soo suldi een drachtighe goede vrientscap hebben.

13

Van uwen vianden sceyt v, ende van uwen vrienden wacht v.

14

Een ghetrou vrient is een stercke bescermenisse, ende die dien vindt, die vindt eenen scadt.

15

By eenen ghetrouwen vrient en is niet te ghelijcken, ende gheen ghewicht van gout en siluer en is te werderen teghen die goetheyt sijnder trouwen.

16

Een ghetrouwe vrient is een medecijne des leuens, ende der onsterffelijcheyt, ende die den Heere vreesen sullen dien vinden.

17

Die Godt vreest, sal desghelijcs oock goede vrientscap hebben, want ghelijck hy is soo sal zijn vriendt wesen.

18

Kint van uwer ioncheyt ontfanckt leeringhe, ende tot dat grijs hayr suldi wijsheyt vinden.

19

Ghelijck een die ackert en die saeyet, ⁺alsoo gaet tot haer, ende verwacht haer goede vruchten,

+ C

20

want in haer werck suldi een weynich arbeyden, ende vroech suldi van haren vruchten eten.

21

Hoe veel te seer scarp es die wijsheyt den ongheleerden menschen, ende die onuerstandighe en sal in haer niet blijuen.

22

Ghelijck die cracht van eenen steen sal dat ondersoeck in die wesen, ende sij en sullen niet vertoeuen die te verworpen.

23

Want die wijsheyt der gheleertheyt is nae haren naem, ende sij en is niet veel menschen openbaer, maer den welcken sij bekent is dien blijft sij by tot Gods aenschouwen.

24

Hoort sone ende ontfanct den raet des verstants, ende en verworpt mijnen raet niet,

25

worpt uwen voet in haer veteren, ende in haer halsbanden uwen hals,

26

buycht v scoudere daer onder ende draechtse, ende en hebt gheen verdriet in haer banden.

27

Met allen v herte gaet tot haer ende met allen uwe macht bewaert haer weghen.

28

Ondersoect die ende hy sal v gheopenbaert worden, ende als ghijse vercreghen hebt, soo en verlaet haer niet,

29

want ten laetsten suldi ruste in haer vinden, ende sij sal v verkeert worden tot ghenoechte.

30

Ende haer veteren sullen v sijn tot een stercke bescherminghe, ende crachtighe stoensels, ende haer halsbanden tot een cierlijck cleedt der glorien.

31

⁺Want dat cieraet des leuens is in haer, ende haer banden sijn een salich verbintsel.

+ D

32

Tot eenen cierlijck cleedt der glorien suldi haer aendoen, ende tot een croone des mede verblijdens suldise op v stellen.

33

Kint eest dat ghy nae my hoort, soo suldi leeren, ende eest dat ghi v herte daer aen legghet, soo suldi wijs sijn.

34

Eest dat ghy v oore nederbuycht soe suldi leeringhe ontfanghen, ende eest dat ghy geerne hoort, soo suldi wijs zijn.

35

Staet in die menichte der wijser ouders, ende voecht v wter herten met haerlieder wijsheyt, dat ghy alle Godts vertellinghe moecht hooren, ende dat die bijspraken des loefs v niet en ontgaen.

36

Ende eest dat ghy eenen verstandighen siet, soo ontwaect tot hem, ende uwen voet verslijte die trappen zijnder dooren.

37

V ghedachte hebt in die gheboden Godts, ende in zijn beuelen weest aldermeest becommert, ende hy sal v een herte gheuen, ende die begheerte der wijsheyt sal v ghegheuen worden.