Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺EN wilt niet staen naer die ongherechtighe besittinghen, ende en segghet niet. Ick heb leuens ghenoech om te leuen, want dit en sal niet baten inden tijt der wraken ende des oploops.

+ A

2

En volcht in uwer macht niet die begheerlijcheden ws herten,

3

ende en segt niet. Hoe machtich heb ick gheweest? oft wie sal my tonder brenghen om mijn wercken? Want Godt salt wrekende wreken.

4

En segt niet, ic heb ghesondicht, ende wat onghenoechte is my ghesciet? ⁺Want die alderhoochste is een lijdtsamich betaelder.

+ B

5

Van die vergheuen sonde en wilt niet sijn sonder vreese, noch en doet die een sonde op dander niet.

6

Ende en segt niet die ghenadicheyt des Heeren is groot, der menichfuldicheyt mijnder sonden sal hy bermhertich wesen.

7

Want die bermherticheyt ende gramscap naken haestelijck van hem, ende op die sondaers aensiet sijn gramscappe.

8

En vertrect niet v tot den Heere te bekeeren, ende en stelt dat niet wt van daghe te daghe,

9

⁺want onuersiens sal zijn gramscap comen, ende in den tijt der wraken sal hy v vernielen.

+ C

10

En wilt niet banghe zijn in onrechtuerdighe rijcdommen, want die en sullen v niet baten inden dach des oploops ender der wraken.

11

En waeyt niet met allen winden, ende en gaet in allen weghen niet, want alsoo wort elck sondaer gheproeft in een dobbel tonghe.

12

Weest vast inden wech des Heeren, ende in die waerheyt ws verstants ende wetenheyts, ende v volght het woert des vreedes

[p. *530]

ende die rechtuerdicheyt.

13

Weest saectmoedich om te hooren dwoert Godts, ⁺dat ghy verstaen moecht, ende met wijsheyt wtspreken een warachtighe antwoerde.

+ D

14

Hebdi verstant, soo antwoert uwen naesten, maer anders, soo laet v hant op uwen mont zijn, dat ghy niet gheuanghen en wort in een ongheleert woert, ende bescaemt.

15

Eere ende glorie is in die redene van eenen verstandighen. Maer die tonghe vanden onuersienighen is zijn bederffenisse.

16

En wort niet ghenoemt een oorblaser, ende en wort niet gheuanghen met uwer tonghen ende bescaemt.

17

Want ouer eenen dief is bescaemtheyt ende berou, ende een alderquaetste veruloekinghe is ouer eenen die dobbel van tonghen is. Maer den oorblaser is haet ende viantscap ende versmaetheyt.

18

Doet recht den cleynen, ende den grooten ghelijckelijck.