Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺SOne en beneemt die almisse des armen niet, ende v ooghen en keert niet aff vanden armen.

+ A

2

Een hongherige ziele en versmaet niet, ende en verstoort den armen niet in sijn armoede.

3

Het herte vanden behoeftighen en wilt niet quellen, ende en vertrect den benauden die gaue niet.

4

Dat bidden vanden verdructen en verworpt niet, ende en keert v aensicht niet aff vanden behoeftighen.

5

Vanden behoeftighen en keert v ooghen niet aff om die gramscap, ende en wilt gheen oersake laten, den ghenen die v soecken achter rugghe te vermalendyden.

6

Want tghebet des gheens die v vermalendijt in die bitterheyt sijnder zielen sal verhoort worden, hy sal hem verhooren die hem ghemaect heeft.

7

Maect v ghespreecsaem der vergaderingehen vanden armen, ende den priester verootmoedicht v ziele, ende den ouersten neycht v hooft.

8

Neycht den armen sonder droefheyt v oore, ende betaelt v scult, ende antwoerdt hem vredelijck met saechtmoedicheyt.

9

Verlost hem die onrecht lijdt wt die hant vanden houerdighen, ⁺ende en nemes niet suerlijck in v ziele.

+ B

10

Int ordeelen weest den weesen bermhertich als een vader, ende voer eenen man haerder moeder,

11

ende ghy sult sijn als een sone des alderhoochsten onderdanich, ende hy sal uwer bermhertich sijn meer dan een moeder.

12

Die wijsheyt blaest haren kinderen dleuen in, ende sij ontfanct die ghene die haer soecken, ende sij sal voer gaen in den wech der rechtuerdicheyt,

13

ende die haer bemint, die bemint het leuen, ende die tot haer waken sullen haer ghenoechlijcheyt omuanghen.

14

Die haer houden die sullen dleuen beeruen, ende waer sij ingaen sal, daer sal Godt ghebenedijden.

15

Die haer dienen, sullen ghehoorsaem wesen den heylighen, ende die ghene die haer lief hebben, die bemint Godt.

16

Die haer hoort sal die Heydenen ordeelen, ende die haer aenscouwet sal betrouwende blijuen.

17

Eest dat hy haer ghelooft soo sal hy haer beeruen, ⁺ende haer creatueren sullen in beuestinghe zijn,

+ C

18

want in die becoringhe wandelt sij met hem, ende voer al soe verkiest sij hem.

19

Vreese ende anxt ende proeuinghe sal sij op hem brenghen, ende sij sal hem pijneghen, doer die quellinghe van haer leeringhe, tot dat sij hem proeue in sijn ghedachten, ende ghelooue sijnder zielen.

20

Ende sij sal hem vast maken, ende den rechten wech sal sij tot hem brenghen, ende sij sal hem verblijden,

21

ende haer verborghen dinghen hem ontdecken, ende op hem als scatten vergaderen wetenheyt ende tverstant der rechtuerdicheyt.

22

Maer eest dat hy verdoelt, soo sal sij hem verlaten, ende sal hem leueren in die hant sijns viants.

23

Sone bewaert den tijt, ende vliet van tquaet.

24

Voer v ziele en scaemt v niet te segghen dat waer is.

25

Want daer es een scaempte sonde aenbrenghende, ende daer is een scaempte aenbrenghende glorie, ende gratie.

26

En neemt gheen aensicht wt teghen v aensicht, noch teghen v ziele een loghene.

27

En wilt uwen naesten in sijnen val niet ontsien,

28

noch en wederhoudt dat woert niet inden tijt der salicheyt. En verberghet v wijsheyt niet in haer schoonheit.

29

⁺Want doer die tonghe wort die wijsheyt bekent, ende tverstant, ende die wetenheyt, ende gheleertheyt int woert vanden verstandighen, ende die vasticheyt in die wercken der rechtuerdicheyt.

+ D

30

En segt niet teghen dwoert der waerheyt in eenigher manieren, ende van die loghene uwer ongheleertheyt wert bescaemt.

31

En scaemt v niet te belijden v sonden, ende en worpt v niet tonder allen mensche om die sonde.

32

En wilt niet wederstaen teghen daensicht vanden machtighen, ende en arbeyt niet teghen den stroem des vloets.

33

Om die rechtuerdicheyt strijdt voer v ziele, ende totter doot toe vecht voer die rechtuerdicheyt ende Godt sal voer v strijdende verwinnen v vianden.

34

En wilt haestich wesen in v tonghe, ende onnut ende slap in uwe wercken.

35

En wilt niet sijn als eenen leuw in huys, onmworpende v huysghenooten, ende verdruckende die ghene die onder v sijn.

36

V handt en sij niet wtghestrect om te ontfanghen, ende om te gheuen toe ghesloten.