Den gheheelen Bybel, Inhoudende het oude ende nieuwe Testament (Leuvense bijbel 1548)

[p. *527]

Dat boeck Ecclesiasticus

Hier begint dat boeck Ecclesiasticus Iesu des soon Syrach, ende ierstmael die prologhe des ouversetters wten hebreeusschen in griecx.

1

[1] VAN vele ende groote dinghen is ons door die wet ende propheten ende ander die hem geuolcht hebben, wijsheyt ghetoont, in die welcke men Israhel moet prijsen ter saken van wijsheyt ende gheleertheyt. Want niet alleen en moeten sij sprekende gheleert sijn, maer oock moghen die vreemde leerende ende scrijuende seer gheleert worden. [2] Ende mijn grootvader Iesus doen hy hem langhen tijt ghegeuen hadde tot die neersticheyt van te lesen die wet ende die propheten ende die ander boecken die ons van onsen ouders gheleuert sijn, soo heeft hy ooc iet willen scrijuen van desen dinghen die ter leeringhen ende wijsheyt behooren, op dat die ghene die begheeren te leeren, ende kennisse van die te crijghen, souden meer ende meer metter herten daer op mercken, ende versterct worden tot een wettelijc leuen. [3] Aldus vermaen ik v lieden te comen met goetwillicheyt, ende met meerder neersticheyt dit te lesen, ende oock ons te vergheuen in die dinghen daer wij volghende die ghelijckenisse der wijsheyt schijnen te ontbreken in die versaminge der woorden, want die hebreeussche woorden verliesen haer gratie als sij ouverghesedt sijn in een ander tale, Ende niet alleen dese dinghen, maer die wet ende die propheten ende die ander scriftueren van dander boecken en hebben gheen cleyn ondersceedt als sij in haer seluen gheseyt worden. [4] Want int achtendertichste iaer ten tijden van Ptolomeus Euergetis des conincks nae dat ick in Egipten comen was, ende doen ick daer langhen tijt gheweest hadde, soo heb ick daer gheuonden achterghebleuen boecken van gheen cleyn oft versmadelijcke leeringhen. [5] Hierom soo heuet my goet ende nootelijck ghedocht, dat ick oock eenighe neersticheyt ende arbeydt daer toe doen soude om desen boeck ouer te setten, ende met veel wakens heb ic neersticheyt daer toe ghedaen in die spacie van eenen tijt tot die dinghen die ten eynde brenghen, om desen boeck wt te gheuen, ooc om die ghene die hen herte daer toe stellen willen ende leeren hoe dat sij die manieren van leuen behooren in te setten, die nae des Heeren wet hebben opghestelt te leuen.