Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺MAer den ongoddelijcken quam sonder ghenade die gramscap ouer totten wtersten toe want hy wist te voren wel haerlieder toecomende dinghen,

+ A

2

want doen sij toeghelaten hadden datsij hen seluen souden wtleyden, ende doen sij die met grooter sorchuuldicheyt te voren wt ghesonden hadden, soo volchden hen wercken des berous nae.

3

Want doen sij noch den rouwe onder handen hadden, ende weenende waren aen die grauen der dooden, soo hebben sij voor hen ghenomen een ander ghedachte der onwetenheyt, ende die sij biddende wt gheworpen hadden, die hebben sij als vluchtighe veruolcht,

4

want den noot die sij wel weerdich waren brachtse tot desen eynde, ende si verloren die ghedenckenisse der dinghen die gesciet waren, op dat die pijninghe soude volbringhen tghene dat den tormenten noch ghebrack,

5

ende om dat voorwaer v volck wonderlijck soude doorghaen, maer dat sij een nieuwe doot vinden souden.

6

Want alle creatuere worden tot sijn natuere van ierst wederom ghefigureert, dienende uwen gheboden, op dat v kinderen onghequetst souden bewaert worden,

7

⁺want een wolcke ouerlommerde hen legheren, ende wt dat water datter te voren was is drooghe eerde ghesien, ende in die roode zee eenen wech sonder ledtsel, ende een groeyende velt van die ouergroote diepte,

+ B

8

waer door alle dat gheslachte ghinck dat met uwer handt bedect worde siende v myrakelen ende wonderlijcke teekenen,

9

want ghelijc paerden weydden sij die spijse aff, ende ghelijck lammeren hebben sij hen verhuecht, v grootmakende Heere, diese verlost hebt.

10

Want sij waren noch ghedachtich der dinghen die in hen pelgrimagie gheschiet waren hoe dat die eerde voor den aert der beesten vlieghen wtghebracht heeft, ende hoe dat den vloet voor visschen opwierp een menichte van vorsschen.

11

Ende ten laetsten hebben sij ghesien een nieuwe scepsel van voghelen, doen sij door die quaetlusticheyt daer toe ghebracht waren dat sij spijse begheerden der wellustigher brasserien,

12

Want in die aensprake der begheerten sijn hen van der zee quackelen opghecomen, ⁺ende quellinghen sijn den sondaren ouercomen, niet sonder die vertooninghen die te voren ghesciet waren door die cracht der vloeden, want sij leden te rechte nae hen boosheden,

+ C

13

want sij stelden op een misprijselijcke onurijheyt der gasten, want die sommighe en ontfinghen gheen ombekende vreemdelinghen, die ander dwonghen goede gasten tot slauernie.

14

Ende niet alleen dese dinghen, maer sij hadden noch een ander aensien, want sij die wtlanders noode ontfinghen,

15

maer die ghene die dese met blijscappen ontfanghen hadden, die ghebruyct hadden die selue rechten, hebben sij met die alder wreetste smerten ghepijnicht.

16

Maer si sijn gheslaghen met blentheyt, ghelijc die ander aen die doeren vanden rechtuerdighen, doen sij met haestighe blentheyt bedect waren, soo socht een ieghelijck den inganc sijnder doeren,

17

want als die elementen in hen seluen verkeert worden, ghelijck in een orghele die maniere des gheluyts verandert wort, ⁺ende die alle hen gheluydt behouden. Waer aff datment sekerlijck mach oordeelen wt den ghesichte,

+ D

18

want die dieren des velts werden verkeert in dieren des waters, ende alle die swemmende dieren waren ghinghen voorts op die eerde.

19

Het vier hadde macht int water bouen sijn cracht, ende dwater vergadt die natuere van wtblusschen.

20

Contrarie die vlammen en hebben niet ghequelt het vleesch der bederuelijcker beesten die met hen wandelden, noch sij en smolten niet die goede spijse die lichtelijck ghesmolten wort ghelijck het ijs. Want in alle dinghen hebdy v volck groot ghemaect Heere ende eerlijc ende ghy en hebtse niet versmaet in allen tijden ende tot allen plaetsen hen bystandich sijnde.

Hier eyndet dat boeck der wijsheyt.